បរទេស ៖ កីឡាករThibaut Courtois អ្នកចាំទីក្រុម Real Madrid បានបញ្ជាក់ថាខ្លួនព្រមទទួលការរិះគន់ទាំងអស់ពីអ្នកគាំទ្រ ក្រោយពីបង្ហាញទម្រង់លេងមិនល្អទាល់តែសោះ ប៉ុន្មានប្រកួតចុងក្រោយនេះ។
កីឡាករCourtois ជាអ្នកចាំទីដៃទី១របស់ក្រុម Real Madrid ប៉ុន្តែប៉ុន្មានប្រកួតមកនេះ រូបគេតែងតែរបូតគ្រាប់បាល់ជានិច្ច រហូតធ្វើឱ្យអ្នកគាំទ្រមិនសប្បាយចិត្តនោះទេ។ ជាក់ស្ដែងពេលលេងទល់ក្រុម Club Brugge កន្លងទៅនេះ ១តង់ របូត២គ្រាប់ទៅហើយ ដែលធ្វើឱ្យលោក Zidane ត្រូវប្ដូររូបគេចេញ។តែក្រោយមកទៀតក៏ស្រាប់តែមានដំណឹងថាកីឡាករជម្រើសជាតិបែលហ្សិករូបនេះមានបញ្ហាក្រពះទើបមិនអាចបន្ដលេងបាន ហើយជំងឺនេះ ក៏នឹងធ្វើឱ្យរូបគេមិនអាចលេងទល់ក្រុម Granada នៅចុងសប្ដាហ៍នេះផងដែរ។
សាមីខ្លួនក៏បាននិយាយសុំទោសអ្នកគាំទ្រ ហើយព្រមទទួលការរិះគន់គ្រប់យ៉ាងក្រោយពីបង្ហាញទម្រង់លេងមិនល្អទាល់តែសោះ ប៉ុន្មានប្រកួតចុងក្រោយនេះ។ មួយវិញទៀត Courtois ថាសម្ពាធពីអ្នកគាំទ្រ នឹងធ្វើឱ្យខ្លួនត្រលប់ទៅរកភាពល្អប្រសើរវិញមិនខាន៕
