ភ្នំពេញ ៖ កីឡាករឡុង សុវណ្ណឌឿន អ្នកប្រដាល់របស់ក្លិបសាលវ័ន្តកីឡា ដឹកដៃកីឡាករឡុង ជិន អ្នកប្រដាល់នៃក្លិបខ្លារខិនមានរិទ្ធ ឡើងដណ្តើមប្រាក់លានពីកីឡាករប្រេស៊ីលPAULO SERGIO និងកីឡាករថៃភិតអិនថង នៅលើសង្វៀនស៊ីអិនស៊ី នាថ្ងៃទី២៩ ខែមិថុនា ឆ្នាំ២០១៩នេះ។
កីឡាករឡុង សុវណ្ណឌឿន គេនឹងត្រូវជួបប្រកួតជាមួយអ្នកប្រដាល់ប្រេស៊ីលឈ្មោះPAULO SERGIO ដោយប្រកួតក្នុងប្រភេទទម្ងន់៦៩គីឡូក្រាម អ្នកទាំងពីរមិនធ្លាប់ជួបគ្នាទេពីមុនមក ហើយមិនទាន់ដឹងថាកីឡាករប្រេស៊ីលម្នាក់នេះមានវិជ្ជាគុនខ្លាំងប៉ុណ្ណានោះដែរ តែបើកីឡាករហ្វឹកហាត់នៅប្រទេសថៃភាគច្រើនពួកគេពូកែស្នៀតជើងទាត់ ជង្គង់ និងស្នៀតកាច់ផ្តួល។
ចំណែកឡុង សុវណ្ណឌឿន គេក៏ជាកីឡាករជើងខ្លាំងទម្ងន់ធ្ងន់មួយរូប ក្នុងចំណោមអ្នកប្រដាល់ជួមុខរបស់ប្រទេសកម្ពុជានាពេលបច្ចប្បន្ននេះ។កីឡាករឡុង សុវណ្ណឌឿន គេជាអ្នកលេងស្នៀតកណ្តាប់ដៃ និងកែង រីឯស្នៀតជើងទាត់ និងជង្គង់របស់គេ ក៍ល្អហើយខ្លាំងថែមទៀត។ ប៉ុន្តែយ៉ាងណា សុវណ្ណឌឿន ក៏មានចំណុចខ្សោយខ្លះដែរ គឺត្រង់គេវាយចេញរាងយឺតបន្តិចប៉ុណ្ណោះ តែគេមានកម្លាំងពលំពេញ៥ទឹកមិនពិបាកឡើយ។ឡុង សុវណ្ណឌឿន គេជាកីឡាករជើងចាស់និងខ្លាំងម្នាក់ដែលឡើងប្រកួតលើកណាក៏ពិបាករកដៃគូមកផ្តួលឱ្យគេចាញ់ពិន្ទុ ឬឱ្យសន្លប់នៅលើរេញណាស់។ អញ្ចឹងហើយទើបអ្នកស្នេហាកីឡាប្រដាល់ភាគច្រើននៅតែគាំទ្រកីឡាករឡុង សុវណ្ណឌឿន ថាជាកីឡាករដែលមានសក្តានុពល ហើយមានសមត្ថភាពគួរឱ្យសរសើរ ដោយម្នាក់ៗហាក់សម្តែងនូវទំនុកចិត្តចង់ទស្សនាយ៉ាងខ្លាំងនៅគ្រប់ ពេលកីឡាកររូបនេះឡើងរេញប្រកួតម្តងៗនោះ។ ចាំមើលកីឡាករឡុង សុវណ្ណឌឿន នឹងកីឡាករប្រេស៊ីលPAULO SERGIO នេះនណាជាអ្នកឈ្នះ?។
ដោយឡែកកីឡាករឡុង ជិន ត្រូវជួបជាមួយកីឡាករថៃភិតអិនថង ក្នុងប្រភឹទទម្ងន់៦០គីឡូក្រាម អ្នកទាំងពីរក៍មិនធ្លាប់ជួបគ្នាដែរក្នុងកម្មវិធីនេះ តែយ៉ាងណាកីឡាករថៃម្នាក់នេះធ្លាប់មកប្រកួតនៅប្រទេសកម្ពុជា ជាច្រើនលើកមកហើយមានឈ្នះមានចាញ់ ដែលស្នៀតខ្លាំងរបស់គេគឺជើងទាត់កាត់ ជង្គង់ និងស្នៀតកាច់ផ្តួល។
រីឯកីឡាករឡុង ជិន ជាអ្នកប្រដាល់វ័យក្មេងមានស្នៀតប្រដាល់ល្អ វាយចេញចូលលឿន និងរហ័ស និងមានបច្ចេកទេសក្នុងការប្រកួតល្អផងដែរ។ មួយទៀតគេវាយរហ័ស ដករហ័ស ចេញចូលលឿន និងមានផ្លែល្អថែមទៀត ដែលគូប្រកួតល្មមៗមិនអាចដឹងពីចំណុចខ្សោយរបស់គេនោះទេ។ ចាំមើលក្នុងការប្រកួតនេះតើកីឡាករកម្ពុជា ជាអ្នកឈ្នះទទួលបានប្រាក់លានឬកីឡាករថៃ៕
