ភ្នំពេញ ៖ កីឡាករជើងខ្លាំងសួន ចាន់នី អ្នកប្រដាល់របស់ក្លិបបក្សីស្លាបដែក ឡើងតតាំងនិងកីឡាករថៃម៉ៃសុទ្ធ ប៉េឡេប៊ូរីរ៉ាំ រីឯកីឡាករឡុង ជិន អ្នកប្រដាល់មកពីក្លិបខ្លារខិនមានរិទ្ធ ជួបកីឡាករភូតាក់វ៉ាន់ បេឡេបុរីរ៉ាំ ខណៈកីឡាករស្រករក្រោយពុទ្ធ ម៉ាណូយ អ្នកប្រដាល់នៃក្លិបពុទ្ថសេរីវង្សកីឡាពោធិសែនជ័យ ត្រូវជួបជាមួយកីឡាករបារាំងMaurin Charlie ក្នុងលក្ខណៈមិត្តភាពអន្តរៈជាតិ នាថ្ងៃសៅរ៍ទី២៦ ខែមករា ឆ្នាំ២០១៩នេះ នៅលើសង្វៀនស៊ីអិនស៊ី ។
កីឡាករសួន ចាន់នី ត្រូវជួបជាមួយកីឡាករថៃឈ្មោះថៃម៉ៃសុទ្ធ ប៉េឡេប៊ូរីរ៉ាំ ក្នុងប្រភេទទម្ងន់៦០គីឡូក្រាម។ មួយរយះចុងក្រោយនេះក្នុងពិភពប្រដាល់ គ្មានអ្នកណាមិនស្គាល់ស្នាដៃ និងកេរ្តិ៍ឈ្មោះរបស់កីឡាករសួន ចាន់នី នោះឡើយ បើទោះជាសមត្ថភាពរបស់គេ នៅមិនទាន់ដូចកីឡាករ រៀមច្បងដែលល្បីកន្លងមកក៍ដោយ។ ជាក់ស្ដែងនៅលើសង្វៀនស្ទើរគ្រប់ប៉ុស្ដិ៍សួន ចាន់នី បានឡើងប្រកួតឈានមកដល់គូឯក និងជាគូដណ្តើមខ្សែក្រវាត់ទៀតផងហើយ មិនដែលលក់តម្លៃខ្លួនក្នុងការប្រកួតទេកន្លងមកនោះទេ។
សួន ចាន់នី ពេលឡើងប្រកួតម្តងៗមិនថាតែប្រកួតដណ្តើមខ្សែក្រវ៉ាត់ឫ ប្រកួតលក្ខណមិត្តភាពទេគឺ តែងតែ ប្រកួតមិនលាក់កម្លាំងនោះឡើយ។ ស្របគ្នាដែលកីឡាករសួន ចាន់នី ឡើងរេញពេលណាក៏បានបង្ហាញភាពខ្លាំងហើយដណ្ដើមបានជ័យជម្នះលើ គូប្រកួតជាច្រើនផងនោះ ទើបកាន់តែធ្វើឲ្យកីឡាកររូបនេះ ជាប់ឈ្មោះក្នុងបញ្ជីអ្នកខ្លាំងស្រករក្រោយជាច្រើនផងដែរ។ អ្នកប្រដាល់មានដៃវែងជើងវែងសួន ចាន់នី ជាអ្នកប្រដាល់ជើងខ្លាំងទម្ងន់មធ្យមប្រចាំកម្ពុជាម្នាក់នាពេលបច្ចប្បន្នដែល ធ្លាប់ប្រកួតជាមួយអ្នកប្រដាល់បរទេសជាច្រើននាក់មកហើយ គឺឈ្នះច្រើនជាងចាញ់ព្រោះស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះទេ។ ចាំមើលកីឡាករសួន ចាន់នី ជាអ្នកឈ្នះឬកីឡាករថៃម៉ៃសុទ្ធ ប៉េឡេប៊ូរីរ៉ាំ?។
ចំណែកកីឡាករឡុង ជិន ត្រូវជួបជាមួយកីឡាករថៃ ភូតាក់វ៉ាន់ បេឡេបុរីរ៉ាំ ក្នុងប្រភឹទទម្ងន់៥៧គីឡូក្រាម។ ការប្រកួតនេះត្រូវាបនអ្នកវិភាគប្រដាល់លើកឡើងថា ឡុង ជិន ជាអ្នកប្រដាល់វ័យក្មេងមានស្នៀតប្រដាល់ល្អ វាយចេញចូលលឿន និងរហ័ស និងមានបច្ចេកទេសក្នុងការប្រកួតល្អដែរ។ មួយទៀត គេវាយរហ័ស ដករហ័ស ចេញចូលលឿន និងមានផ្លែល្អថែមទៀត។ គេជាអ្នកប្រដាល់ស្រករក្រោយទេ តែគេមានស្នៀតប្រដាល់ល្អ ហើយធ្លាប់ផ្ដួលអ្នកប្រដាល់រួមជាតិ ដែលជាជើងខ្លាំងៗច្រើននាក់ហើយ។ ដូច្នេះក្នុងការប្រកួតនេះ ឡុង ជិន ច្បាស់ជាឈ្នះលើកីឡាករថៃរភូតាក់វ៉ាន់ បេឡេបុរីរ៉ាំ ជាក់ជាមិនខាន។
ដោយឡែកកីឡាករស្រករក្រោយពុទ្ធ ម៉ាណូយ ត្រូវជួបជាមួយកីឡាករបារាំងMaurin Charlie ក្នុងប្រភរទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយក៍មិនទាន់ដឹងថា កីឡាករជនជាតិបារាំងរូបនេះមានវិជ្ជាគុនខ្លាំងប៉ុណ្ណានោះដែរ។ ចំណែកកីឡាករកម្ពុជា ជាកីឡាករជើងថ្មីដែលទើបវាយឡើងមកប្រកួតជាមួយកីឡាករបរទេស ហើយនេះជាឱកាសដែលតម្រូវឲ្យគេបញ្ចេញសមត្ថភាពហើយ បើការប្រកួតនេះគេយកឈ្នះលើកីឡាករបារាំង ឬផ្តួលដៃគូឲ្យសន្លប់នោះ គេនិងមានឈ្មោះបោះសំលេងមិនខាន។ ចាំមើលពុទ្ធ ម៉ាណូយ ជាអ្នកឈ្នះឬកីឡាករបារាំងMaurin Charlie?៕
