ភ្នំពេញ ៖ កាលពីល្ងាចថ្ងៃទី២៨ ខែធ្នូ ឆ្នាំ២០១៨នេះ នៅស្នាក់ការគណៈបក្សប្រជាជនកម្ពុជាខណ្ឌព្រែកព្នៅ បានធ្វើពិធីផ្សព្វផ្សាយលទ្ធផនៃសន្និបាតគណៈកម្មាធិការកណ្តាល លើកទី៤១ អាណត្តិទី៥ របស់គណៈបក្សប្រជាជនកម្ពុជា ដល់មន្ត្រីបក្សថ្នាក់មូលដ្ឋានខណ្ឌព្រែកព្នៅ ដែលមានការចូលរួមពី រស់ សុផាន់ អនុប្រធានក្រុមការងារចុះជួយខណ្ឌព្រែកព្នៅ លោកសុខ សម្បត្តិ ប្រធានគណៈកម្មការគណៈបក្សខណ្ឌព្រែកព្នៅ និងប្រធាន អនុប្រធាន ព្រមទាំងមន្ត្រីបក្សថ្នាក់មូលដ្ឋានជាច្រើនរូបទៀតផងដែរ។
បន្ទាប់ពីលោកម៉ៅ បូរ៉ា ប្រធានក្រុមប្រឹក្សាខណ្ឌព្រែកព្នៅ បានឡើងអានរបាយការណ៍ស្តីពីសភាពការណ៍ទូទៅ និងទិសដៅបន្តរួចមក លោកសុខ សម្បតិ បានមានប្រសាសន៍ថា ពិធីផ្សព្វផ្សាយនេះមាន១១ចំណុច ហើយសូមឲ្យប្រធាន អនុប្រធាន ព្រមទាំងមន្ត្រីបក្សថ្នាក់មូលដ្ឋាន ផ្សព្វផ្សាយអង្គសន្និបាតនេះដល់ប្រជាពលរដ្ឋឲ្យមានប្រសិទ្ធភាពខ្ពស់។
ក្នុងពិធីផ្សព្វផ្សាយនោះដែរក៍ក្នុងគោលបំណងពង្រឹងការងារគណបក្សថ្នាក់មូលដ្ឋាន ឲ្យបានរឹងមាំដើម្បីឆ្ពោះទៅការងារបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ អាណត្តិទី៣ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ ខាងមុខឲ្យទទួលបានជោគជ័យ។
លោកបន្តថា សមាជិកសមាជិកា ក្រុមការងារទាំងអស់ត្រូវបន្ដខិតខំ ដោយយកចិត្តទុកដាក់ចុះជាប់ជាមួយប្រជាពលរដ្ឋ នៅតាមមូលដ្ឋានដើម្បីបង្កើននូវភាពស្និទ្ធស្នាលជាមួយប្រជាពលរដ្ឋ ពិសេសស្វែងរកព៌តមានដែលជាតម្រូវការ និងសំណូមពរចាំបាច់របស់ ប្រជាពលរដ្ឋដែលកំពុងប្រឈម ដើម្បីយកបញ្ហាទាំងនោះ មកពិភាក្សា ដោះស្រាយនិង ត្រូវមានស្មារតីទទួលខុសត្រូវខ្ពស់លើការងាររបស់ខ្លួន។ ជាងនេះទៅទៀតត្រូវតាមដានការស់នៅ និងសុខភាពរបស់ក្រុមប្រឹក្សាសង្កាត់ឲ្យបានល្អ ធ្វើយ៉ាងណាឲ្យក្រុមប្រឹក្សាសង្កាត់របស់យើងបានទៅបោះឆ្នោតទាំងអស់គ្នា ហើយយើងត្រូវប្រឹងប្រែងពុះពាររក្សាឲ្យបាននូវអាសនៈ ដែលយើងមានកន្លងមក។
ដោយឡែកលោរស់ សុផាន់ បានលើកឡើងថា ថ្នាក់ខណ្ឌ និងសង្កាត់មិនត្រូវមើលរំលងភូមិសង្កាត់មានសុវត្ថិភាពទាំង៩ចំណុចនោះទេ ហើយសមាជិកសមាជិកា ក្រុមការងារទាំងអស់ត្រូវបន្តសហការ និងសាមគ្គីភាពផ្ទៃក្នុងឲ្យបានរឹងមាំ ពិសេសត្រូវពង្រឹង ប្រធាន អនុប្រធានសាខាបក្ស ក្រុមបក្ស ឲ្យបានរឹងមាំនិងឲ្យពួកគាត់ ស្វែងយល់ឲ្យបាន ស៊ីជម្រៅ ពីសភាពការណ៍វិវឌ្ឍរបស់ស្រុកទេសនាពេលបច្ចុប្បន្ន ទើបអាចជម្រុញ សកម្មភាពការងារ រួមទទួលបានជោគជ័យទាំងអស់គ្នា។
ជាចុងក្រោយលោកបានក្រើនរំលឹកដល់សមាជិកសមាជិកា ក្រុមការងារទាំងអស់ត្រូវបន្តសហការ និងសាមគ្គីភាពផ្ទៃក្នុងឲ្យបានរឹងមាំ ពិសេសត្រូវពង្រឹង ប្រធាន អនុប្រធានសាខាបក្ស ក្រុមបក្សឲ្យបានរឹងមាំបន្ថែមទៀត បើល្អហើយត្រូវបន្តធ្វើល្អបន្តទៀត ដើម្បីសកម្មភាពការងារ រួមទទួលបានជោគជ័យទាំងអស់គ្នា ទាំងថ្នាក់ក្រោមជាតិ និងថ្នាក់ជាតិ៕
