បរទេស ៖ បន្ទាប់ពីមេដឹកនាំអាមេរិក និងចិន បានព្រមានដាក់គ្នាទៅវិញទៅមក ជុំវិញបញ្ហាកោះតៃវ៉ាន់ ក្នុងអំឡុងពេលការហៅទូរស័ព្ទ រយៈពេលជាងពីរម៉ោង កាលពីថ្ងៃព្រហស្បតិ៍ទី២៨ខែកក្កដា រួចមកនាវាផ្ទុកយន្តហោះអាមេរិក និងក្រុមវាយប្រហាររបស់ខ្លួន បានវិលត្រឡប់ទៅកាន់សមុទ្រចិនខាងត្បូងវិញហើយ បន្ទាប់ពីចូលចតនៅកំពង់ផែ ក្នុងប្រទេសសិង្ហបុរី។
លោកប្រធានាធិបតី Joe Biden បានប្រាប់សមភាគីចិនលោក Xi Jinping ថា សហរដ្ឋអាមេរិកសូមប្រឆាំងយ៉ាងដាច់អហង្ការ ចំពោះសកម្មភាពឯកតោភាគីណាមួយ ដើម្បីផ្លាស់ប្តូរឋានៈរបស់កោះតៃវ៉ាន់។ ប៉ុន្តែលោកបានបន្ថែមថា គោលនយោបាយរបស់សហរដ្ឋអាមេរិកលើកោះនេះ មិនបានផ្លាស់ប្តូរទេ។
ចំណែកទីក្រុងប៉េកាំងនិយាយថា លោក Xi បានប្រាប់ទៅលោក Biden ឲ្យគោរពតាមគោលការណ៍ចិនតែមួយ ដោយព្រមានថា “អ្នកណាដែលលេងជាមួយភ្លើងនឹងរលាក”។ ក្នុងអំឡុងពេលការសន្ទនាតាមទូរស័ព្ទ លោក Biden និងលោក Xi ក៏បានពិភាក្សាគ្នាផងដែរ អំពីការរៀបចំកិច្ចប្រជុំទល់មុខគ្នាដែលអាចធ្វើទៅបាន។
សេតវិមាននិយាយថា ក្រៅពីបញ្ហាតៃវ៉ាន់ មេដឹកនាំទាំងពីរបានពិភាក្សាអំពីបញ្ហាជាច្រើនផ្សេងទៀត រួមទាំងការប្រែប្រួលអាកាសធាតុ និងសន្តិសុខសុខភាពជាដើម។ គួរបញ្ជាក់ថា ភាពតានតឹងជុំវិញបញ្ហាកោះតៃវ៉ាន់ បានកើនឡើងខ្លាំង មុនដំណើរទស្សនកិច្ចសម្រាប់ប្រធានសភាអាមេរិកលោកស្រី Nancy Pelosi ទៅកោះតៃវ៉ាន់។ ចំណែកក្រសួងការបរទេសអាមេរិកនិយាយថា លោកស្រី Pelosi មិនបានប្រកាសអំពីការធ្វើដំណើរណាមួយទេ ប៉ុន្តែចិនបានព្រមានអំពី “ផលវិបាកធ្ងន់ធ្ងរ” ប្រសិនបើលោកស្រីសម្រេចចិត្តធ្វើទស្សនកិច្ចបែបនេះមែន។
កាលពីសប្តាហ៍មុន លោក Biden បានប្រាប់អ្នកយកព័ត៌មានថា យោធាគិតថា វាមិនមែនជាគំនិតល្អឡើយ ប៉ុន្តែសេតវិមានរបស់លោកបានហៅវោហាសាស្ត្ររបស់ចិន ប្រឆាំងនឹងការធ្វើដំណើរបែបនេះថាជារឿងមិនមានប្រយោជន៍ និងមិនចាំបាច់ទាល់តែសោះ។
បន្ទាប់ពីមេដឹកនាំអាមេរិក និងចិន បានព្រមានដាក់គ្នាទៅវិញទៅមក ជុំវិញបញ្ហាកោះតៃវ៉ាន់ នាវាផ្ទុកយន្តហោះអាមេរិក និងក្រុមវាយប្រហាររបស់ខ្លួន បានវិលត្រឡប់ទៅកាន់សមុទ្រចិនខាងត្បូងវិញហើយ បន្ទាប់ពីចូលចតនៅកំពង់ផែ ក្នុងប្រទេសសិង្ហបុរី។ នេះជាការដាក់ពង្រាយនៅក្នុងតំបន់ជម្លោះ ខណៈភាពតានតឹងជាមួយចិន កំពុងកើនឡើងខ្លាំងជុំវិញដំណើរទស្សនកិច្ច ទៅកាន់កោះតៃវ៉ាន់ដោយមេដឹកនាំសភាអាមេរិកលោកស្រី Nancy Pelosi។ មន្ត្រីក្នុងកងនាវាចរទី៧ របស់កងទ័ពជើងទឹកសហរដ្ឋអាមេរិក បានបញ្ជាក់អំពីការដាក់ពង្រាយនាវាផ្ទុកយន្តហោះ USS Ronald Reagan ទៅកាន់ផ្លូវពាណិជ្ជកម្មដ៏សំខាន់ ប៉ុន្តែមិនបានធ្វើអត្ថាធិប្បាយលើសំណួរអំពីភាពតានតឹងជុំវិញការធ្វើដំណើររបស់លោកស្រី Pelosi នោះទេ។
មេបញ្ជាការ Hayley Sims បាននិយាយនៅក្នុងសេចក្តីថ្លែងការណ៍មួយទៅកាន់ Reuters ថា “នាវា USS Ronald Reagan និងក្រុមវាយប្រហាររបស់ខ្លួន កំពុងដំណើរការ ដោយធ្វើប្រតិបត្តិការនៅក្នុងសមុទ្រចិនខាងត្បូង បន្ទាប់ពីដំណើរទស្សនកិច្ចប្រកបដោយជោគជ័យទៅកាន់កំពង់ផែសិង្ហបុរី”។លោក Sims បន្ថែមថា នាវា Reagan កំពុងបន្តប្រតិបត្តិការធម្មតាតាមកាលវិភាគ ដែលជាផ្នែកមួយនៃការល្បាតជាប្រចាំ ដើម្បីគាំទ្រដល់តំបន់ឥណ្ឌូប៉ាស៊ីហ្វិកសេរី និងបើកចំហ។
នៅពេលស្នើសុំការអត្ថាធិប្បាយ ក្រសួងការបរទេសចិនបានសង្កត់ធ្ងន់ថា សហរដ្ឋអាមេរិកបានបង្ហាញសាច់ដុំជាថ្មីម្ដងទៀត នៅក្នុងសមុទ្រចិនខាងត្បូងជាមួយនឹងការធ្វើនាវាចរណ៍។
អ្នកនាំពាក្យក្រសួងការបរទេសចិន លោក Zhao Lijian បានប្រាប់សន្និសីទសារព័ត៌មានមួយកាលពីថ្ងៃព្រហស្បតិ៍ទី២៨ខែកក្កដាថា “អ្នកគ្រប់គ្នាមើលឃើញហើយ វាច្បាស់ណាស់ពីរឿងនេះ ដែលថា អ្នកណាជាអ្នកគំរាមកំហែងធំបំផុតចំពោះសមុទ្រចិនខាងត្បូង និងសន្តិភាព និងស្ថិរភាពក្នុងតំបន់អាស៊ី”៕
