កៀវ ៖ ប្តីប្រពន្ធអ៊ុយក្រែន លើកថ្ងៃមករៀបការថ្ងៃទី២៤ ខែកុម្ភៈ ឆ្នាំ២០២២ ជាពេលដែលរុស្ស៊ីចាប់ផ្តើមវាយប្រហារលើអ៊ុយក្រែន ហើយបន្ទាប់ពីរៀបការពួកគេមិនចំណាយពេលវេលានៅជាមួយគ្នាយ៉ាងសប្បាយរីករាយទាំងទីជិត និងទីឆ្ងាយនោះទេ ប៉ុន្តែបែរជាយកពេលវេលាក្រេបចន្ទទឹកឃ្មុំដើម្បីកាន់កាំ..ភ្លើ.ងការពារប្រទេសជាតិទៅវិញ។
តាមការផ្សាយរបស់សារព័ត៌មាន CNN បានបង្ហាញថា កូនកម្លាំងឈ្មោះ Sviatoslav Fursin អាយុ២៤ឆ្នាំ និងកូនក្រមុំឈ្មោះ Yaryna Arieva អាយុ២១ឆ្នាំគ្រោងរៀបមង្គលការនាខែឧសភាខាងមុខ ប៉ុន្តែដោយសារសង្គ្រាមបានផ្ទុះឡើងនៅពេលរុស្ស៊ីបានវាយប្រហារលើអ៊ុយក្រែន អ្នកទាំងពីរបានប្រញាប់រៀបការយ៉ាងឆាប់រហ័ស។
អ្នកទាំងពីរបានរៀបមង្គលការនៅព្រះវិហារ St. Michael’s Cathedral ក្នុងទីក្រុងកៀវ ប្រទេសអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ជាពេលដែលរុស្ស៊ីចាប់ផ្តើមវាយប្រហារលើអ៊ុយក្រែន។
កូនក្រមុំ Arieva អាយុ២១ឆ្នាំបាននិយាយថា ៖«យើងប្រហែលជាស្លាប់ ហើយយើងចង់រស់នៅជាមួយគ្នាមុនពេលស្លាប់។ វាជាពេលវេលាសប្បាយរីករាយបំផុតនៅក្នុងជីវិត»។អ្វីដែលកាន់តែគួរឲ្យចាប់អារម្មណ៍ទៀតនោះ នៅថ្ងៃទីមួយនៃមង្គលការរបស់ប្តីប្រពន្ធថ្មោងថ្មីទាំងពីរមិនបានទៅលំហែកាយ ឬក្រេបចន្ទទឹកឃ្មុំឡើយ។ ផ្ទុយទៅវិញពួកគេបានស្លៀកពាក់ឈុតទាហាន និងកាន់កាំភ្លើងដើម្បីការពារប្រទេសជាតិ។ កូនក្រមុំបាននិយាយថា ៖«ស្ថានភាពលំបាកណាស់។ យើងនឹងទៅច្បាំងដើម្បីទឹកដីរបស់យើង»។ អ្នកទាំងពីរបានស្គាល់គ្នាកាលពីឆ្នាំ២០១៩ក្នុងព្រឹត្តិការណ៍តវ៉ាមួយនៅទីក្រុងគៀវ៕
