ភ្នំពេញ ៖ កីឡាករធឿន ធារ៉ា អ្នកប្រដាល់មកពីក្លិបក្រសួងកសិកម្មគុនខ្មែរ ជួបជាមួយកីឡាករថៃManav Thorng ខណៈកីឡាករពុទ្ធ សំបូរ អ្នកប្រដាល់របស់ក្លិបពុទ្ធសេរីវង្សពោធិសែនជ័យ ជួបប្រកួតជាមួយកីឡាករថៃPhit Dam ខណៈកីឡាករគឹម សន អ្នកប្រដាល់នៃក្លិបកងពលតូចទ័ពពិសេសឆ័ត្រ៩១១ ជួបប្រកួតជាមួយកីឡាករថៃ Phlang Num នៅលើសង្វៀនស៊ីអិនស៊ី នាថ្ងៃទី២៦ ខែតុលា ឆ្នាំ២០១៩នេះ។
កីឡាករធើន ធារ៉ា ជួបជាមួយកីឡាករថៃManav Thorng ក្នុងប្រភទទម្ងន់៦៩គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក តែកីឡាករថៃម្នាក់នេះធ្លាប់មកប្រកួតនៅស្រុកខ្មែជាច្រើនលើកមកហើយមានឈ្នះ មានចាញ់ជាមួយកីឡាករលំដាប់ៗរបស់កម្ពុជា ស្នៀតខ្លាំងរបស់គេគឺជង្គង់ ជើងទាត់កាត់ និងស្នៀតកាច់ផ្តួលគូប្រកួតឲ្យដួលទាំងជំហរ។
ចំណែកកីឡាករធើន ធារ៉ា បន្ទាប់ពីគេមានឈ្មោះល្បីនៅស្រុកថៃ និងក្នុងប្រទេសបានមួយរយៈមកគេអាក់ខានលែងបានប្រកួត តែពេលនេះគេបានប្តូរក្លិបមកហាត់នៅស្រុកខ្មែរហើយដោយហាត់ជាមួយលោកគ្រូអេភូថង ស្នៀតប្រកួតរបស់គេចាប់ផ្តើមខ្លាំងដូចមុនវិញហើយ។ ធើន ធារ៉ា កាលពីនៅល្បីស្នៀតខ្លាំងរបស់គេ កែង កណ្តាប់ដៃ និងជើងទាត់កាត់ ហើយគេមានកម្ពស់ខ្ពស់ជាអំណោយផលក្នុងការវាយលក្ខណគុនខ្មែរទៀតផង។ ចាំមើរវាងធើន ធារ៉ា និងកីឡាករថៃManav Thorng នរណាជាអ្នកឈ្នះ?។
ដោយឡែកកីឡាករពុទ្ធ សំបូរ ត្រូវជួបជាមួយកីឡាករថៃ Phit Dam ក្នុងប្រភេទទម្ងន់៦០គីឡូក្រាម អ្នកទាំង២នាក់នេះមិនដែលជួបគ្នាទេកន្លងមក នៅមិនទាន់ដឹងថាកីឡាករថៃម្នាក់នេះមានវិជ្ជាគុនខ្លាំងប៉ុណ្ណានោះទេ តែបើតាមការសង្កេតកន្លងមក ពួកគេខ្លាំងខាងស្នៀតជើងទាត់ ជង្គង់ និងស្នៀតកាច់ផ្តួល។
រីឯការប្រកួតរបស់ពុទ្ធ សំបូរ កន្លងមកគេមានកម្លាំងស៊ុហ្វខ្លាំង កលល្បិចប្រកួតល្អ និងមានផ្លែល្អ ហើយមួយទៀត សំបូរមានសមត្ថភាពប្រដាល់ខ្ពស់ថែមទៀត។ ប៉ុន្តែ ពុទ្ធ សំបូរ ក៏មិនអាចធ្វេសប្រហែសឬមើលស្រាលកីឡាករថៃ Phit Dam បានដែរ ដោយត្រូវប្រុងប្រយ័ត្នជាប់ជានិច្ច។ យ៉ាងណាការប្រកួតរវាងអ្នកប្រដាល់ទាំងពីរ គេនៅតែរំពឹងថាពុទ្ធ សំបូរ ជាអ្នកឈ្នះច្រើនជាងចាញ់។ ចាំមើលកីឡាករពុទ្ធ សំបូរ គេអាចយកឈ្នះលើកីឡាករថៃ Phit Dam ?។ ចំណែកកីឡាករគឹម សន ជួបប្រកួតជាមួយកីឡាករថៃ Phlang Num អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករទាំងពីរមានវិជ្ជាគុនខ្លាំងប៉ុណ្ណានោះទេ។ ចាំមើរវាងកីឡាករគឹម សន និងកីឡាករថៃ Phlang Num នរណាជាអ្នកឈ្នះ៕
