ភ្នំពេញ ៖ កីឡាករផាន់ គ្រាន់ អ្នកប្រដាល់នៃពុទ្ធសេរីវង្សពោធិសែនជ័យ ត្រូវគេផហគូផ្គងឲ្យជួបកីឡាករអ៊ីរ៉ង់Mohammad Armak ខណៈកីឡាករសេក គឹមរួន និងកីឡាករវ័យក្មេងឈុត សេរីវណ្ណថង ជួបកីឡាករថៃនឿណាក់ផា ប៉.យុទ្ធភូមិ និងកីឡាករសេកសាន់ ប៉េឡេបុរីរ៉ាំ ដើម្បីសាកវិជ្ជាគុន នាថ្ងៃសៅទី០៦ ខែមេសា ឆ្នាំ២០១៩នេះ នៅលើសង្វៀនស៊ីអិនស៊ី។
កីឡាករផាន់ គ្រាន់ ជួបជាមួយកីឡាករអ៊ីរ៉ង់Mohammad Armak នេះត្រូវបានអ្នកតាមដានប្រដាល់អះអាងថា មានភាគរយឈ្នះច្រើនលើកីឡាករអីរ៉ង់ម្នាក់នេះ ព្រោះផាន់ គ្រាន់ គេជាអ្នកប្រដាល់ ជោកជាំជាមួយនឹងសង្វៀន ហើយម្យាងទៀតគេទើបឈ្នះបានលេខ៣នៃខ្សែក្រវាត់ក្នុងប្រភេទទម្ងន់៦៣.៥គីឡូក្រាមនេះផងដែរ។
ចំណែកកីឡាករអ៊ីរ៉ង់Mohammad Armak គេហ្វឹកហាត់នៅប្រទេសថៃដូចនេះស្នៀតខ្លាំងរបស់គេគឺជង្គង់ និងស្នៀតទាត់កាត់។ រីឯកីឡាករផាន់ គ្រាន់ស្នៀតខ្លាំងរបស់គេគឺកណ្តាប់ដៃ និងជង្គង់ផងដែរ ក៍ប៉ុន្តែគ្រាន់តែគេមានកម្ពស់រាងទាបបន្តិចប៉ុណ្ណោះ។ ចាំមើលកីឡាករផាន់ គ្រាន់ និងកីឡាករអ៊ីរ៉ង់Mohammad Armak នរណាជាអ្នកឈ្នះ?។
ចំពោះកីឡាករសេក គឹមរួន ត្រូវជួបជាមួយជួបកីឡាករថៃនឿណាក់ផា ប៉.យុទ្ធភូមិ ក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាទេនៅសង្វៀននេះ។ សេក គឹមរួន គេជាអ្នកប្រដាល់ជើងថ្មីទេតែគេបានឡើងបានឡើងប្រកួតទាំងលក្ខណៈមិត្តភាពជាតិ និងអន្តរជាតិញញឹកញាប់ដូចកីឡាករដទៃទៀតដែរ ដោយកីឡាកររូបនេះ ការប្រកួតរបស់គេកន្លងមក បើជួបគូប្រកួតខ្លាំងគេក៍ខ្លាំង តែជួបគូប្រកួតខ្សោយគេក៍ខ្សោយទៅតាមនោះដែរ តែគេប្រកួតឈ្នះច្រើនជាងចាញ់ ដែលបានធ្វើឲ្យអ្នកគាំទ្រចាប់អារម្មណ៍ពីមួយប្រកួតទៅមួយប្រកួតចង់ទស្សនានៃការឡើងរេញរបស់គេ។
ស្នៀតខ្លាំងរបស់កីឡាករសេក គឹមរួន គឺកណ្តាប់ដៃនិងស្នៀតជើងទាត់ ហើយគេជាកីឡាករមានចិត្តប្រដាល់ធំ ព្រមទាំងកម្លាំងស៊ុហ្វខ្លាំងថែមទៀត។ បើតាមក្រុមអ្នកវិភាគប្រដាល់អះអាងថា សម្រាប់ការប្រកួតនេះកីឡាករសេក គឹមរួន គឺសង្ឃឹមឈ្នះលើគូប្រកួតហាសិបភាគរយប៉ុណ្ណោះបើទោះជាពួកគេមិនដែលជួបគ្នាក៍ដោយ។ ចាំមើលរវាងកីឡាករសេក គឹមរួន និងកីឡាករថៃនឿណាក់ផា ប៉.យុទ្ធភូមិ នរណាជាអ្នកឈ្នះ?។
ដោយឡែកកីឡាករជើងថ្មី ឈុត សេរីវ៉ាន់ថង អ្នកប្រដាល់មកពីក្លិបរាហ៊ូកីឡា ខេត្តបាត់ដំបង ជួបជាមួយកីឡាករថៃសេកសាន់ ប៉េឡេបុរីរ៉ាំ ក្នុងប្រភេទទម្ងន់៥៧គីឡូក្រាម។ ឈុត សេរីវ៉ាន់ថង គេជាកីឡាករវ័យក្មេងដែលទើបនិងឡើងកូដ ហើយទើបឈ្នះពានក្នុងស្រុកថ្មីៗនេះទៀតផង។
ក្នុងការប្រកួតនេះត្រូវបានអ្នកតាមដានកីឡាប្រដាល់លើកឡើងថា ឈុត សេរីវណ្ណថង មានភាគរយឈ្នះច្រើនលើកីឡាករថៃសេកសាន់ ប៉េឡេបុរីរ៉ាំ បើទោះជាមិនទាន់ដឹងថាកីឡាករថៃម្នាក់នេះ មានវិជ្ជាគុនខ្លាំងប៉ុណ្ណានោះក៍ដោយ។ ចាំមើលរវាងកីឡាករជើងថ្មី ឈុត សេរីវ៉ាន់ថង និងកីឡាករថៃសេកសាន់ ប៉េឡេបុរីរ៉ាំ នរណាជាអ្នកឈ្នះ?៕
