ភ្នំពេញ ៖ បុណ្យដាភូមិ ឬបុណ្យសែនស្រូវ (បច្ចប្បន្នគេហៅបុណ្យដាភូមិ ឬបុណ្យឡើងអ្នកតា) ដើម្បីរំឭកគុណដល់ទឹក ដី ភ្លើង និងអាកាសធាតុ សម្រាប់ការបង្កបង្កើនស្រូវក្នុងមួយឆ្នាំៗ និងជាប្រពៃណីមួយ ដែលត្រូវបានភូមិសំរោងកណ្តាល ក៍ដូចជាបណ្ដាភូមិតាមជាយក្រុងនិងស្រុកស្រែចំការ តែងតែរៀបចំធ្វើជារៀងរាល់ឆ្នាំ ក្នុងអំឡុងខែមករា កុម្ភៈ ឬខែមិនា ទៅតាមភូមិនីមួយៗ។
ភូមិសំរោងកណ្តាល ក៏ដូចជាភូមិដទៃទៀតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ដែលតែងតែប្រារពពិធី«បុណ្យដាលាន ឬសែនស្រូវ»ជារៀងរាល់ឆ្នាំមិនដែលអាក់ខាន ក្រោយពីអ្នកភូមិ បានប្រមូលផលស្រូវរួចរាល់ រីឯកន្លែងខ្លះទើបបង្កបង្កើនផល ដើម្បីសុំស្រណុកសុខសប្បាយដល់សត្វពាហណៈ និងមនុស្សម្នាក្នុងភូមិទាំងមូល។
កាលពីថ្ងៃទី១៦-១៧ខែកុម្ភៈ ឆ្នាំ២០១៩នេះក្រៅពីភូមិសំរោងកណ្តាល ក៏នៅមានភូមិផ្សេងៗទៀតដែរ ដែលបានប្រារពពីធី«បុណ្យដាលាន ឬសែនស្រូវ»ដូចគ្នានេះ។ ប្រជាពលរដ្ឋក្នុងភូមិទាំងមូល បានស្រុះស្រួលគ្នា រៀបចំពិធី«បុណ្យដាលាន» ដើម្បីបង្កើតនូវភាពសប្បាយរីករាយ ការជួបជុំសាច់ញាតិបងប្អូន ជាពិសេស ការបង្ហាញនូវ«ផលស្រូវ» ដែលពួកគាត់កំពុងធ្វើ និងទទួលបានក្នុងឆ្នាំនេះ។
ចាស់ៗព្រឹទ្ធាចារ្យក្នុងភូមិបានលើកឡើងថា ពិធី«បុណ្យដាលាន ឬសែនស្រូវ» នេះធ្វើឡើងតាមប្រពៃណីជារៀងរាល់ឆ្នាំ ក្នុងអំឡុងខែមករា កុម្ភៈ ឬខែមិនា ទៅតាមភូមិនីមួយៗ ដើម្បីរំឭកគុណដល់ទឹក ដី និងអាកាសធាតុ ដែលជាកត្តាសំខាន់ដល់ការបង្កបង្កើនស្រូវ បច្ចប្បន្នគេហៅបុណ្យដាភូមិ ឬបុណ្យឡើងអ្នកតា។
ពីធីបុណ្យនេះក៏មាននិមន្តព្រះសង្ឃសូត្រមន្តដើម្បី សុំសិរីសួស្ដីជូនដល់ពលរដ្ឋ ក៏ដូចជាសុំឲ្យការបង្កបង្កើនស្រូវ ឲ្យបានផលច្រើនរាល់ឆ្នាំ និងក៏មានរាប់បាត្រដាឆ្លងជាកិច្ចបង្ហើយបុណ្យផងដែរ។ ពីមុនក្នុងពិធីបុណ្យនេះគេលេងល្ខោន ឬចាប៉ីឆ្លងឆ្លើយ ទៅតាមចំណង់ចំណូលចិត្ត និងសទ្ធារបស់អ្នកភូមិ។ ឯបច្ចុប្បន្ននេះ គេចូលចិត្ត«ជួលធុងបាស់» ឬ«វង់ភ្លេងសម័យ» ដើម្បីរាំកម្សាន្តជំនួសវិញ។ ចំពោះការរៀបចំបុណ្យនេះ តាមភូមិខ្លះគេធ្វើឡើងជាលក្ខណៈគ្រួសារនីមួយៗ ដោយមានការធ្វើនំបញ្ចុក ឫម្ហូបអាហាជាច្រើនទៀត ទៅតាមចំណងចំណូលចិត្តរបស់ពួកគេ និងប្រមូលផ្តុំនូវទ័យ្យទានទាំងឡាយ នៅក្នុង«សាលាបុណ្យ»ក្នុងភូមិ ដើម្បីវេប្រគេនព្រះសង្ឃ។ ជាមួយគ្នានោះដែរ ក៏សម្រាប់ទទួលសាច់ញាតិបងប្អូន និងមិត្តភ័ក្រ ដែលបានចូលរួមក្នុងភូមិ និងមកពីទីជិត ទីឆ្ងាយជាដើមផងដែរ។
សូមបញ្ជាក់ថា កាលពីដើមមកចាស់ៗគាត់បានធ្វើពិធីសែនស្រូវនៅតាមវាលស្រែឯណោះទេ ដោយយកស្រូវដែលកំពុងចេញផ្លែ យកបន្តិចម្នាក់ៗមកគរលើគ្នា រួចធ្វើពីធីបួងសួងសុំសេចក្តីសុខសេចក្តីចំរើន និងសុំឲ្យស្រូវឆ្នាំនេះទទួលបានផលច្រើន។
លុះតក្រោយៗរៀងមកគេធ្វើពិធីបុណ្យដាលាន ឬបុណ្យសែនស្រូវនៅក្នុងភូមិជំនួសវិញ ដើម្បីបង្ហាញគ្នាទៅវិញទៅមក ពីផលស្រូវដែលទទួលបាន ហើយក៍ដើម្បីជាការជួបជុំបងប្អូនជិតឆ្ងាយដែលបានមកចូលរួមជួបជុំបងប្អូនក្នុងភូមិកំសាន្តសប្បាយ ក្រោយពីការនឿយហត់។
ពិធីនេះចាប់ផ្តើមពីម៉ោងមួយរសៀលថ្ងៃទីមួយ ដោយមានពីធីលេងភ្លេងចូលរូបពីលោកតាម្ចាស់ស្រុកចូលស្ថិតក្នុងរូបបុគ្គលណាម្នាក់បួងសួងសុំសេចក្តីសុខ រួចហើយសូត្រមន្ត និងសម្តែងធម៌ទេសនា ពេលយប់រាំកម្សាន្ត។ ពេលព្រឹកថ្ងៃទីពីររាប់បាត ដាឆ្លងជាកិច្ចបង្ហើយបុណ្យ៕
