ភ្នំពេញ ៖ លោក សុខ សម្បត្តិ អភិបាលខណ្ឌព្រែកព្នៅ និងមន្ដ្រីរាជការសាលាខណ្ឌ រួមនឹងប្រជាពុទ្ធបរិស័ទនៅរាជធានីភ្នំពេញ និងចំណុះជើងវត្តផង បានមូលមតិគ្នាជាឯកឆ័ន្ទដង្ហែ កឋិនទាន សាមគ្គី១ ទៅកាន់វត្តបឹងប្រិយ៍ ស្ថិតក្នុងសង្កាត់ពន្យាំង ខណ្ឌព្រែកព្នៅ រាជធានីភ្នំពេញ ប្រមូលបច្ច័យបានជាង៣ម៉ឺនដុល្លា។
អង្គកឋិនទានសាមគ្គីដង្ហែទៅកាន់វត្តបឹងប្រិយ៍ នេះស្ថិតក្នុងសង្កាត់ពន្សាំង ខណ្ឌព្រែកព្នៅ ប្រមូលបច្ច័យបានជាង៣ម៉ឺនដុល្លា នាព្រឹកថ្ងៃ០៤កើត ខែកក្តិក ឆ្នាំច សំរិទ្ធិស័ក ពុទ្ធសករាជ២៥៦២ ត្រូវនឹង ថ្ងៃទី១១ ខែវិច្ឆិកា ឆ្នាំ២០១៨នេះ ដើម្បីវេរប្រគេនព្រះសង្ឃដែលគង់ចាំព្រះវស្សាអស់កាលត្រីមាស និងដើម្បីប្រមូលបច្ច័យសម្រាប់ឧបត្ថម្ភក្នុងការកសាង ព្រះវិហារ១ខ្នងកម្ពស់២ជាន់។
តាមទំនៀមទំលាប់ប្រពៃណីព្រះពុទ្ធសាសនា នៅចុងវស្សាន្ដរដូវ រយៈពេល២៩ថ្ងៃគឺចាប់ពីថ្ងៃ ១រោជ ខែភទ្របុទ្ររហូតដល់ថ្ងៃពេញបូរមីខែកត្តិក ពុទ្ធបរិស័ទតែងប្រារព្ធធ្វើបុណ្យកឋិនទានវេរ ប្រគេនព្រះសង្ឃដែលបានបញ្ចប់ចំណាំព្រះវស្សាជារៀងរាល់ឆ្នាំ ហើយការធ្វើនេះ បើតាមពុទ្ធបញ្ញត្តិក្នុង១ឆ្នាំ វត្តនិមួយៗ ទទួលបានអង្គឋិនតែម្ដងប៉ុណ្ណោះ។ បុណ្យនេះមានក្លឹមសារសំខាន់ សំរាប់ពុទ្ធសាសនិកជនជាអ្នកគោរពស្រឡាញ់ ទ្រទ្រង់ព្រះពុទ្ធសាសនា ដោយបាននាំមកនូវត្រៃចីវរជាប្រធាន អមដោយបរិក្ខាជាច្រើនទៀត ដែលជាប្រដាប់ ប្រើប្រាស់ក្នុងជីវភាពរបស់ព្រះសង្ឃ។
ក្រៅពីអត្ថន័យខាងលើពិធីបុណ្យនេះ ក៏ជាការបង្ហាញនូវទឹកចិត្តជ្រះថ្លា ក្នុងការបំពេញកុសល ប្រកបដោយ ជំនឿលើមាគ៌ាព្រះពុទ្ធសាសនា ហើយក៏ជាកាឆ្លុះបញ្ចាំងពី ការរួបរួមសាមគ្គីគ្នា រវាងអាជ្ញាធរ មន្ដ្រីរាជការ ប្រជាពលរដ្ឋ ដែលមានព្រះសង្ឃផង ក្នុងការជួយទ្រទ្រង់និងលើកដំកើងដល់វិស័យ ព្រះពុទ្ធសាសនា ឲ្យបានថ្កុំថ្កើងរុងរឿង។
បច្ច័យសង្កត់ត្រៃអង្គកឋិនទាននេះ មន្ត្រីសាលាខណ្ឌព្រែកព្នៅ បច្ច័យសរុបមានចំនួន ៦លាន៣៥ម៉ឺន និង៣៣០ដុល្លាអាមេរិក ចំណែកបច្ច័យសរុបសង្កាត់ត្រ័យក្នុងអង្គកឋិនទាននេះទាំងមូល មានចំនួន៣៧.១៣៥ដុល្លា សម្រាប់ប្រើប្រាស់ក្នុងការកសាង ព្រះវិហារ១ខ្នងមានកម្ពស់២ជាន់ ដែលកំពុង ដំណើរការកសាង មិនទាន់រួចរាល់នៅឡើយ។ ព្រះគ្រូសូត្រស្តាំវត្តបឹងប្រិយ៍មានថេរដីការថា ព្រះវិហារនេះ ចាប់ដំណើការកសាងមកជាង៣ឆ្នាំមកហើយ កំពស់២ជាន់ ធ្វើអំពីឥដ្ឋប្រក់ក្បឿង សម្រេចបានប្រមាណជាហាសិបភាភាគរយហើយ ប៉ុន្ដែកំពុងជួបប្រទះការខ្វះខាតបច្ច័យជាច្រើនទៀតដើម្បីកសាងឲ្យបានរួចរាល់។ ក្នុងឱកាសនោះលោកសុខ សម្បត្តិ អភិបាលនៃគណៈអភិបាលខណ្ឌព្រែកព្នៅ និងភរយា ព្រមទាំងមន្ត្រីសាលាខណ្ឌ បានអញ្ជើញឡើងលើព្រះវិហារ ហើយលោកនិងគៀងគរដល់ពុទ្ធបរិស័ទជិតឆ្ងាយបន្ថែមទៀតតាមលទ្ធភាព ដើម្បីបានបច្ច័យមកកសាងព្រះវិហារនេះឲ្យបានរួចរាល់៕
