កណ្តាល៖ នៅបញ្ជាការដ្ឋានកងរាជអាវុធហត្ថខេត្តកណ្តាល ព្រឹកថ្ងៃច័ន្ទ ២កើត ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៣ ខែសីហា ឆ្នាំ២០១៨ លោកឧត្តមសេនីយ៍ត្រី សំ តុលា មេបញ្ជាការ កងរាជអាវុធហត្ថខេត្តកណ្ដាល បានអញ្ជើញ ធ្វើការត្រួតពិនិត្យកម្លាំង និងមធ្យោបាយសម្ភារៈ គ្រឿងបំពាក់ ដើម្បីត្រៀមអន្តរាគមន៍ ក្នុងកិច្ចការធានាលើការងាររក្សាសន្តិសុខ សណ្តាប់ធ្នាប់ ជូនប្រជាពលរដ្ឋ ការពារដាច់ខាតការប៉ុនប៉ងណាមួយទៅលើរដ្ឋាភិបាលស្របច្បាប់ ដែលប្រជាពលរដ្ឋបានបោះឆ្នោតគាំទ្រកន្លងទៅ ពិសេសត្រៀមលក្ខណៈសម្បត្តិគ្រប់បែបយ៉ាង ដើម្បីប្រតិបត្តិការបានទាល់ពេលវេលា ក្នុងការជួយសង្គ្រោះប្រជាពលរដ្ឋ ដែលរងគ្រោះដោយសារគ្រោះមហន្តរាយផ្សេងៗ ដូចជាប្រជាពលរដ្ឋដែលរងគ្រោះដោយទឹកជំនន់នៅក្នុងរដូវវស្សានេះ។
លោកឧត្ដមសេនីយ៍ត្រី សំ តុលា បានថ្លែងចំពោះមុខកងកំលាំងថា: យើងអនុវត្តន៏នូវភារកិច្ចស្នូលរបស់កងរាជអាវុធហត្ថគឺ បង្ការ បង្ក្រាប និងសង្គ្រោះ ពិសេសប្រសាសន៍ដឹកនាំ ព្រមទាំងការយកចិត្តទុកដាក់ដ៏ខ្ពង់ខ្ពស់ពីសំណាក់ឯកឧត្ដមនាយឧត្តមសេនីយ៍ សៅ សុខា អគ្គមេបញ្ជាការស្តីទី នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស និង ឯកឧត្តម បណ្ឌិត ម៉ៅ ភិរុណ អភិបាលខេត្ត និងជាប្រធានគណ:បញ្ជាការឯកភាពខេត្តកណ្តាល ដែលលោកតែងតែយកចិត្តទុកដាក់ខ្ពស់ក្នុងការដាស់តឿនក្រើនរម្លឹកដល់ មេបញ្ជាការគ្រប់កងឯកភាពទាំងបីប្រភេទឲ្យ ពង្រឹងការយកចិត្តទុកដាក់បញ្ហាសន្តិសុខ សណ្តាប់ធ្នាប់សង្គម បង្ក្រាបរាល់បទល្មើសគ្រប់ប្រភេទពិសេសនៅពេលនេះយកចិត្តទុកដាក់ខ្ពស់ចុះជួយប្រជាពលរដ្ឋរងគ្រោះដោយទឹកជំនន់។
លោកវរ:សេនីយ៍ត្រី បានបន្តទៀតថា: ការត្រួតពិនិត្យនាពេលនេះ គឺដើម្បីត្រៀមលក្ខណៈឱ្យបានគ្រប់គ្រាន់ មានភាពងាយស្រួលក្នុងការចេញកម្លាំងរក្សាសន្តិសុខ សណ្តាប់ និង ជួយសង្គ្រោះដល់ប្រជាពលរដ្ឋ បានទាន់ពេលវេលា និងមានប្រសិទ្ធិភាពខ្ពស់បំផុត៕ ដោយ សនសុភ័ក្ដ
