ព្រះសីហនុ ៖ នៅព្រឹកថ្ងៃទី ១១ ខែ មិថុនា ឆ្នាំ ២០១៨ លោកឧត្ដមសេនីយ៍ ហេង ប៊ុនទី មេបញ្ជាការអាវុធហត្ថខេត្ត ព្រះសីហនុ បានអោយដឹងថា កម្លាំងកងរាជអាវុធហត្ថរបស់លោកកំពុងតាមប្រម៉ាញ់ស្រីជើងឆើតឈ្មោះ មឿន ស្រីទូច ដែលកំពុងរត់គេចខ្លួនបន្ទាប់ពីនាងប៉ុនប៉ងសម្លាប់នាយអាវុធហត្ថខេត្តព្រះសីហនុម្នាក់ពេលចុះបំពេញភារកិច្ចមិនបានសម្រេច ។
តាមការរៀបរាប់របស់លោកអនុសេនីយ៍ឯក ញា វិសិទ្ធ បានរៀបរាប់ទាំងឈឺចុកចាប់ថា បន្ទាប់ពីទទួលបានពាក្យបណ្តឹងរបស់ប្រជាពលរដ្ឋជាកម្មករចាំចំការនៅចំណុចខាងលើនេះថា មានករណីជម្លោះកើតឡើងរវាងកម្មករចាំចំការ និងកម្មករចាំចំការ ដោយឈ្មោះ មឿង ស្រីទូច ដែលកន្លងមកអះអាងថា ជាក្មួយបង្កើតរបស់ថ្នាក់ដឹកនាំជាន់ខ្ពស់នៅរាជធានីភ្នំពេញ បានបញ្ជាឲ្យកម្មកររបស់ខ្លួនប្រើហិង្សាដុតបំផ្លាញម៉ូតូកម្មករចាំចំការភាគីម្ខាងទៀត។
បន្ទាប់ពីទទួលពាក្យបណ្តឹង និងទទួលបទបញ្ជារបស់ ឯកឧត្តម យន្ត មីន អភិបាលខេត្តព្រះសីហនុ និង ជាប្រធានគណៈបញ្ជាការឯកភាពខេត្ត និងបទបញ្ជារបស់លោកមេបញ្ជាការកងរាជអាវុធហត្ថខេត្ត នៅម៉ោងប្រមាណជិត១១ ថ្ងៃទី០៩ ខែ មិថុនា ឆ្នាំ ២០១៨ កម្លាំងកងរាជអាវុធហត្ថមន្ទីរស្រាវជ្រាវយុត្តិធម៌បានចុះដល់កន្លែងកើតហេតុ និងទីតាំងដីចំការអ្នកស្រី មឿង ស្រីទូច ក្នុងគោលបំណងពិនិត្យ និងអញ្ជើញ អ្នកស្រី មឿង ស្រីទូច ព្រមទាំងបក្សពួកមកសួរនាំ ដើម្បីកសាងសំណុំរឿងទៅតាមនីតិវិធី។
ពេលកម្លាំងសមត្ថកិច្ចកងរាជអាវុធហត្ថទៅដល់ភ្លាម មឿង ស្រីទូច បានទូរស័ព្ទឆ្វែងឆ្វាត់ ទំនងជារកការជួយអន្តរាគមន៍ ពេលនោះលោក ញា វិសិទ្ធបានអញ្ជើញ មឿងស្រីទូច និងបក្សពួកដែលគេអះអាងថា ជាអង្គរក្សឲ្យមកកាន់ទីបញ្ជាការ ដើម្បីសួរនាំទៅតាមនីតិវិធី។
លោកបន្តបន្ថែមទៀតថា លោកក៏ឡើងជិះរថយន្ត៥៧០ជាមួយមឿង ស្រីទូច បន្ទាប់ពីលោកឡើងជិះនៅក្នុងរថយន្តខាងលើ មឿង ស្រីទូច ឡើងទៅកាន់ចង្កូតបើកបរ និប្តូរឲ្យអង្គរក្សរបស់គេមកអង្គុយជិតលោកវិញ ហើយឡុកសោរទ្វាររថយន្តហាក់បីដូចជាមានគំរោងផែនការក្នុងការធ្វើសកម្មភាពអ្វីមួយ។ ប៉ុន្តែលោកញា វិសិទ្ធ យល់ឃើញថា យើងមានកម្លាំងនៅក្នុងរថយន្តស៊ីរ៉ែនបើកតាមពីក្រោយផងដែរ ទំនងជាមិនមានរឿងអ្វីកើតឡើងបានទេ ។ តែអ្វីៗមិនដូចការគិតទុកជាមុនឯណា គ្រាន់តែឡើងអង្គុយនៅក្នុងរថយន្តភ្លាម មឿង ស្រីទូច និងអង្គរក្សបានបញ្ជាឲ្យលោកបិទទូរស័ព្ទមិនឲ្យធ្វើការទាក់ទង មិនខុសពីក្លាយខ្លួនពីសមត្ថកិច្ចមកជាចំណាប់ខ្មាំងវិញ។ ហើយពួកគេបានបើករថយន្តក្នុងល្បឿនលឿនដូចហោះសំដៅទៅភ្នំពេញ ធ្វើឲ្យរថយន្តកម្លាំងសមត្ថកិច្ចតាមមិនទាន់។ ដោយឃើញទិដ្ឋភាពមិនអំណោយផល លោកក៏សម្រេចចិត្តបើកទ្វាររថយន្ត រួចលោតចុះទាំងបង្ខំទៅខាងឆ្វេងដៃ បណ្តាលឲ្យរងរបួសដាច់រយះស្លឹកត្រចៀកខាងស្តាំស្ទើរបាត់ទាំងស្រុង និងមានស្នាមជាំឈឺចុកចាប់ពេញខ្លួនប្រាណ។
បន្ទាប់មករថយន្តកម្លាំងសមត្ថកិច្ចដែលបើកប្រដេញតាមក្រោយបានដឹករូបលោកមកកាន់គ្លីនិកមិត្តភាពឃ្លាំងលើ ដើម្បីសង្គ្រោះ ដោយឡែក មឿង ស្រីទូច និងអង្គរក្សនៅក្នុងរថយន្តចំនួន០២នាក់ទៀតបានបើករថយន្តគេចខ្លួនបាត់ដោយសុវត្ថិភាព។
ក្រោយហេតុការណ៍កើតឡើងក៏មានវត្តមានលោក យន្ត មីន អភិបាលខេត្តចុះសួរសុខទុក្ខ និងពិនិត្យមុខរបួសដល់គ្លីនិកផងដែរ ជាការយកចិត្តទុកដាក់ខ្ពស់ និងលើកទឹកចិត្តពីថ្នាក់ដឹកនាំប្រធានគណៈបញ្ជាការឯកភាពខេត្ត ។
ពេលនេះសមត្ថកិច្ចកំពុងតាមចាប់ខ្លួនស្រីជើងខ្លាំងឈ្មោះ មឿន ស្រីទូច ដើម្បីយកមកផ្ដន្ទាទោសចំពោះមុខច្បាប់ ។
កន្លងមកឈ្មោះ មឿន ស្រីទូច និង បក្ខពួក បានយកឈ្មោះថ្នាក់ដឹកនាំជាច្រើនមកប្រើដើម្បីគំរាមកំហែងគូរភាគីជំលោះក្នុងរឿងវិវាទដីធ្លីនៅខេត្តព្រះសីហនុ តែត្រូវបានថ្នាក់ដឹកនាំបដិសេធជាបន្ទាប់មិនទទួលស្គាល់ទង្វើរបស់ឈ្មោះ មឿន ស្រីទូច និង បក្ខពួកទេ ។
