ភ្នំពេញ ៖ លោកទុយ សុខមាន ពីអ្នករត់ម៉ូតូឌុប និងដាក់មងយកត្រីលក់ ខ្លាយជាអ្នកចិញ្ចឹមត្រីក្នុងស្រះដែលមានបទពិសោធន៍ ហើយទទួលបានជោគជ័យ ក្នុងចំណោមអ្នកប្រកបរបរចិញ្ចឹមត្រី ត្រឹមខ្នាតមធ្យមជាច្រើនទៀតនាបច្ចប្បន្ននេះ នៅក្នុងភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ។
ត្រីជាសត្វរស់នៅក្នុងទឹកមួយប្រភេទដែលងាយស្រួលចិញ្ចឹម ពិសេសត្រីប្រាតែម្តង។បើទោះជាមុខរបរចិញ្ចឹមត្រីមួយនេះ ត្រូវការដើមទុនច្រើនសំរាប់អ្នកចិញ្ចឹមយ៉ាងណាក៍ដោយ ក៏នៅតែមានអ្នកចង់ប្រកបអាជីពជាអ្នកចិញ្ចឹមត្រីនៅក្នុងស្រៈច្រើនផងដែ ព្រោះវាអាចទទួលផលពីការចិញ្ចឹមនេះបានច្រើនក្នុងការចិញ្ចឹមមួយលើកៗ។
តួរយ៉ាងដូចជា លោកទុយ សុខមាន ជាប្រជាពលរដ្ឋរស់នៅសង្កាត់សំរោង បានប្រកបមុខរបរចិញ្ចឹមត្រីនេះប្រមាណជាង១០ឆ្នាំមកហើយ ហើយសព្វថ្ងៃលោកក៍នៅតែប្រកបរបរចិញ្ចឹមត្រីប្រាដូចមុនដដែល។ នៅក្នុងឆ្នាំនេះផងដែរលោកបានដាក់ចិញ្ចឹមត្រីប្រាចំនួនសរុប ៦០០០០ក្បាល ក្នុងស្រៈ ដែលមានផ្ទៃដីទទឹង៦០ម៉ែត្រ និងបណ្តោយ៨០ម៉ែត្រ។
លោកទុយ សុខ មានបានប្រាប់ឲ្យដឹងថា មុខរបរច្ចឹមត្រីតាមស្រៈនេះវាមិនសុទ្ធតែទទួលបានជោគជ័យទាំងអស់នោះទេនៅក្នុង១ឆ្នាំៗនោះ អ្នកខ្លះទទួលបានផលច្រើន រីឯអ្នកខ្លះទៀតទទួលបានផលតិចតាមដែលយើងមើលថែរវាបានដិតដល់ យ៉ាងណាក៍ដោយ ក៍មានប្រជាពលរដ្ឋច្រើនគួរសមដែរ នៅចង់បំពេញតម្រូវការផ្នែកកសិកម្មមួយនេះ ហើយបានព្យាយាមចិញ្ចឹមត្រី ប្រភេទខុសៗគ្នាតាមដែលខ្លួនបានដឹងតៗគ្នា និងសិក្សាកន្លងមក។
លោកប្រាប់ឲ្យដឹងទៀតថា ការចិញ្ចឹមកូនត្រីមានការលំបាក និងត្រូវការថែទាំច្រើន មុននឹងវាគ្រប់អាយុពី៣ទៅ៤ខែ ដែលអាចឲ្យយើងលក់ចេញបាននោះ។ ការមើលថែត្រីមិនមែនត្រឹមតែ ការអោយចំនីត្រីមួយថ្ងៃពីរដងគឺចប់នោះទេ គឺយើងត្រូវតាមដានមើលវាថាតើត្រីទាំងនោះមានអ្វីខុសប្រក្រតីដែររឺទេ ព្រោះពេលខ្លះត្រីអាចឈឺ ឫងាប់ដែលយើងមិនដឹងក៍មានដែរ។
លោកបន្តថា នៅក្នុងការមើលឲ្យដឹងថាត្រីឈឺរឺអត់នោះ ទាល់តែអ្នកចេះមើលទើបបានដឹងហើយការងាទាំងនេះ វាជាអ្នកបង្រៀនយើងទេដល់ពេលយើងចិញ្ចឹមវាយូទៅយើងអាចដឹងហើយថាត្រីនោះវាអន់ជាងគេ ហើយត្រីដែលខ្លួនវាមានដំបៅគឺជាត្រីឈឺ។ ពេលនោះយើងត្រូវព្យាបាលវា ដោយលាយថ្នាំក្នុងចំនីវាឲ្យវាស៊ី អាខ្លះបើវាឈឺធ្ងន់ធ្ងជាងគេហើយក៍ងាប់ទៅ តែអាខ្លះទៀតវាអាចជាវិញបានដូចធម្មតា។ ហើយនៅពេលខ្លះមេឃក្តៅខ្លាំងគ្មានខ្យល់ ហើយភ្លាមៗក៏មានភ្លៀងធ្លាក់មកពេលនោះត្រីនិងពុលដោយសារខ្វះ អុកស៊ីសែន នេះជាហេតុដែលអាចបង្កអោយត្រីងាប់មានចំនួនច្រើនក្នុងរយះពេលដ៍ខ្លីក៍មានដែរ។ ដូច្នេះដើម្បីកុំឲ្យត្រីងាប់ គេត្រូវទិញដុំអុកស៊ីសែនដើម្បីឲ្យត្រីដកដង្ហើមបាន។
លោកបន្ថែមថា គុណភាពទឹកពិតជាសំខាន់ខ្លាំងណាស់ក្នុងការចិញ្ចឹមត្រីនេះ បើសិន ជាយើងមានត្រីច្រើនគុណភាពទឹកត្រូវតែល្អហើយយើងត្រូវការទឹក គ្រប់គ្រាន់ដើម្បីបូមវាចេញបូមចូល។ ហើយយើងមិនអាចនិយាយបានថា ទឹកប្រើប្រាស់រាល់ថ្ងៃមានអុកស៊ីសែនគ្រប់គ្រាន់សម្រាប់ត្រីនោះទេ។ ឧទាហរណ៍ ត្រីប្រាជាប្រភេទត្រីរឹងមាំជាងគេនិងអាចរស់នៅក្នុងទឹកកខ្វក់ និងល្អក់បានជាងត្រីដទៃទៀត ដែលត្រូវការទឹកស្អាត។
លោកបានលើកឡើងពីការយល់ច្រឡំដែលអ្នកចិញ្ចឹមត្រីខ្លះតែងតែគិតថា ទឹកម៉ាស៊ីនគឺជាទឹកល្អសម្រាប់ត្រី ប៉ុន្ដែលោកបានពន្យល់ទៀតថា ពេលខ្លះ ទឹកពណ៌បៃតងមិនមែនមានន័យថា វាជាទឹកកខ្វក់សម្រាប់ត្រីនោះទេ ប៉ុន្ដែវាអាចល្អក់ដោយសារតែប្លង់តុងជាដើម។ចំពោះប្រូតេអ៊ីននៃចំណីរបស់ត្រី លោកពន្យលថា ចំណីមួយចំនួនមានតម្លៃថ្លៃ តែគុណភាពល្អ ពីព្រោះវាមានកម្រិតប្រូតេអ៊ីនច្រើនបើធៀបនឹងចំណីថោក។ អ្នកចិញ្ចឹមអាចលាយចំណីរដោយខ្លួនឯងបានតែត្រូវយល់ពីប្រភេទ និងការប្រើប្រាស់ចំពោះចំណីនីមួយៗផងដែរ។
បុរសដែលមានវ័យជា៥០ឆ្នាំរូបនេះបន្តទៀតថា កាលពីមិនទាន់ប្រកបមុខរបរនេះ លោកជាអ្នករត់ម៉ូតូឌុបនិង ជាអ្នកដាក់មងម្នាក់ប៉ុណ្ណោះ ហើយកាលដំបូងឡើយខ្ញុំមិនដែលនឹកនាមានបំណងចង់ធ្វើកសិកម្មអ្វីដែរទេព្រោះខ្ញុំគ្មានជំនាញសូម្បីបន្តិចអំពីសិកម្មចិញ្ចឹមត្រីនេះ។
គាប់ជួនថ្ងៃមួយ លោកបានចេញទៅរត់ម៉តូឌុបដូចសព្វមួយដង ហើយបានដឹកអ្នកដែលគេចិញ្ចឹមត្រី១ថ្ងៃពេញ នៅពេលនោះក៍បានសួរនាំពីនេះពីនោះពីគ្នាទៅវិញទៅមក ក៍ធ្លាក់ដល់ការចិញ្ចឹមត្រីនេះតែម្តង។ ហើយក៍បានដឹងតិចតួចក្នុងការចិញ្ចឹមត្រីនាខណៈនោះ ដោយជឿជាក់ថាខ្លួនអាចប្រកបរបរនេះបានទើបចាប់ផ្តើមពីនោះរហូតមក។
លោកសុខមាន បានប្រាប់ទៀតថា កាលលោកចាប់ផ្តើមចិញ្ចឹមដំបូងមិនសូវមានដើមទុន សំរាប់ចំណាយច្រើននោះទេហើយថែមទាំងជួលស្រៈគេថែមទៀត។ ដំបូងឡើយដោយសារតែត្រូវអោយចំណីត្រីអស់ច្រើនក្នុងមួយថ្ងៃៗ លោកនៅតែប្រកបរបរដាក់មងនិងរត់ម៉ូតូឌុបជារៀងរាល់ថ្ងៃដែលអាចរកប្រាក់បានគ្រាន់ទប់គ្នាដែរ កុំឲ្យចំណាយច្រើនពេក។ ព្រោះក្នុង១ថ្ងៃបើត្រីធំជិតបានលក់ចំណាយប្រមាណ២០ទៅ៣០ម៉ឺនរៀលឯណោះ។ ចំណែកប្រាក់មួយចំនួនទៀតគឺបានមកពី អ្នករកស៊ីទិញដូរត្រីម្នាក់ដោយសន្យាជាមួយគេថា ពេលត្រីលោកធំល្មមអាចលក់បាន លោកនឹងលក់ឲ្យទៅអ្នកដែលអោយប្រាក់លោកខ្ចីនោះ។
លោកទុយ សុខមាន ដែលមានកូន៣នាក់ក្នុងបន្ទុកគ្រួសារ បានទទួលស្គាល់ថា ទោះជាមានការចំណាយប្រាក់ច្រើនចំពោះ មុខរបរចិញ្ចឹមត្រីនេះយ៉ាងណាក៍ដោយ ក៍វាបានធ្វើអោយលោកមានជីវភាពធូធារជាងមុន ដោយលែងដាក់មងនិងរត់ម៉ូតូឌុបទៀត ហើយក៍បានទិញស្រៈ១ផ្ទាល់ខ្លួនឯងផងដែរ។ បើយើងមានស្រះទំហំទទឹង៦០ម៉ែត្រ បណ្តោយ៨០ម៉ែត្រ អាចរកចំណូលពីការលក់ត្រីបានប្រមាណជា១ម៉ឺនដុល្លា ក្នុងមួយឆ្នាំប្រសិនបើត្រីដែលយើងដាក់ចិញ្ចឹមនោះមិនងាប់ច្រើន។
នាបច្ចប្បន្ននេះ បើទោះជាមានបញ្ហាខ្លះៗខាងផ្នែកថវិកាក៍ដោយ ក៍លោកនៅតែសង្ឃឹមថានៅតែអាចរកប្រាក់បានពីការចិញ្ចឹមត្រីនេះទៅថ្ងៃអនាគត៕
