ភ្នំពេញ ៖ បុរសម្នាក់បើករថយន្ត ក្នុងល្បឿនយ៉ាងលឿន រេចង្កូតទៅបុករះរទេះលក់មីឆា បាយឆា និងកន្លែងលក់គ្រឿងភេសជ្ជៈ ខ្ទាតកំពប់រាយប៉ាយ ពេញផ្លូវ សំណាងមិនមានអ្នកគ្រោះថ្នាក់ ដែលហេតុការណ៍នេះកើតឡើងកាលពីវេលាម៉ោង១១ និង៣០នាទីយប់ថ្ងៃទី២៣ ខែមករា ឆ្នាំ២០២៤ នៅចំណុចមុខផ្សារទំនើប អ៊ីអន៣ លើមហាវិថី៦០ម៉ែត្រ ក្នុងសង្កាត់ចក្រអង្រែក្រោម ខណ្ឌមានជ័យ ប៉ុន្តែជនបង្កមិនឈប់ដោះស្រាយនោះទេ បានព្យាយាមបើករត់គេចខ្លួនរហូតជនរងគ្រោះតាមឃាត់ប្រគល់ឲ្យសមត្ថកិច្ច។
ប្រភពពីកន្លែងកើតហេតុបានឲ្យដឹងថា ដំបូងគេបានឃើញរថយន្តម៉ាក fortuneពណ៌សមួយគ្រឿងពាក់ផ្លាកលេខ ភ្នំពេញ 2AQ-6138 បើកបរដោយបុរសម្នាក់ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីជើងមកត្បូងក្នុងល្បឿនយ៉ាងលឿន ខណៈពេលបើមកដល់ចំណុកើតហេតុខាងលើទល់មុខនិងផ្សារទំនើប អ៊ីអន៣ ក៏បានរេចង្កូតមកខាងឆ្វេងដៃជ្រុលទៅបុករះរទេះលក់ដូរមីឆា និងម៉ូតូសណ្តោងរ៉ឺម៉កលក់គ្រឿង ភេសជ្ជៈមួយចំនួនទៀតរងការខូចខាតសម្ភារៈជាច្រើន ហើយរថយន្តបង្កមិនព្រមឈប់ព្យាយាមបើករត់រហូតបម្រុងនិងបត់ចូលទៅក្នុងបុរីមួយកន្លែង តាមបណ្តោយផ្លូវ៥០ម៉ែត្រត្រូវខាងជនរងគ្រោះ តាមទាន់ឃាត់បានអ្នកបើកបរនិងរថយន្តប្រគល់ឱ្យសមត្ថកិច្ច។
ក្រោយពីសមត្ថកិច្ចមូលដ្ឋានចុះមកដល់ក៏បានទាក់ទង ទៅមន្ត្រីខាងជំនាញចរាចរណ៍ឲ្យចុះមកវាស់វែង យករថយន្តបង្ក និងអ្នកបើកបរទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីឲ្យភាគីសងខាងដោះស្រាយគ្នានៅពេលក្រោយ៕
