បើមិនចង់ឲ្យផ្ទុះសង្គ្រាម នៅក្នុងតំបន់ មេហេសបូឡាប្រាប់អាមេរិក ឲ្យបញ្ឈប់ការវាយប្រហារតំបន់ហ្គាហ្សា

បរទេស ៖ ប្រមុខក្រុមហេសបូឡាបានប្រាប់សហរដ្ឋអាមេរិក ឲ្យបញ្ឈប់ការវាយប្រហារ លើតំបន់ហ្គាហ្សា បើមិនចង់ឲ្យផ្ទុះសង្គ្រាម នៅក្នុងតំបន់។ ហេសបូឡា ដែលជាបក្សនយោបាយនៅប្រទេសលីបង់ មានទំនាក់ទំនងជិតស្និទ្ធជាមួយនឹងក្រុមសកម្មប្រយុទ្ធឥស្លាម រួមទាំង ប៉ាឡេស្ទីនហាម៉ាស់។

ថ្លែងតាមទូរទស្សន៍ចេញពីរដ្ឋធានីបេរូត ប្រទេសលីបង់ កាលពីថ្ងៃសុក្រ សប្តាហ៍នេះ ប្រធានក្រុម  Hezbollah  លោក Hassan Nasrallah បានប្រាប់ទៅសហរដ្ឋអាមេរិក ថា ក្រុមដែលគាំទ្រដោយអ៊ីរ៉ង់របស់លោក បានត្រៀមខ្លួនរួចជាស្រេច ដើម្បីប្រឈមមុខនឹងនាវាចម្បាំងរបស់សហរដ្ឋអាមេរិក ដោយគូសបញ្ជាក់ថា អាមេរិកត្រូវតែបញ្ឈប់ការវាយប្រហារ លើតំបន់ហ្គាហ្សា។

គួរបញ្ជាក់ថា ចាប់តាំងពីក្រុមសកម្មប្រយុទ្ធហាម៉ាស់បើកការវាយប្រហារ កាលពីថ្ងៃទី ៧ ខែតុលា ដែលមិនធ្លាប់មានពីមុន ទៅលើអ៊ីស្រាអែល ចេញពីតំបន់ហ្គាហ្សាស្ទ្រីបមក នៅព្រំដែនភាគខាងត្បូងនៃប្រទេសលីបង់ ត្រូវបានគេមើលឃើញថា មានការកើនឡើងនូវការការប៉ះទង្គិច របួសនិងស្លាប់មនុស្ស ជាបន្តបន្ទាប់ ដោយភាគច្រើន ជាទាហានអ៊ីស្រាអែល៕