ភ្នំពេញ ៖ យើងជិះទូកជាមួយគ្នា ដូចនេះក្រុមការងារទាំងអស់ត្រូវខិតខំធ្វើឲ្យបានល្អ ធ្វើឲ្យដូចភ្លៀងរលឹម ដោយបន្តសហការ និងសាមគ្គីភាពផ្ទៃក្នុង ដោះស្រាយជូនដល់ប្រជាពលរដ្ឋដែលជួបប្រទះបញ្ហាផ្សេងៗ ជាពិសេសសក្តាប់សតិអារម្មណ៍ប្រជាពលរដ្ឋតាមមូលដ្ឋានឲ្យបានច្បាស់ នោះយើងនិងទទួលបានសម្លេងគាំទ្រយ៉ាងច្រើន ក្នុងការបោះឆ្នោតសកលនាថ្ងៃទី២៣កក្កដា ខាងមុខនេះ។
ប្រទេសកម្ពុជា គឺជាផ្ទះរបស់យើងទាំងអស់គ្នា ហើយយើងគ្រប់គ្នាមានកាតព្វកិច្ចចូលរួមថែរក្សាការពារ និងអភិវឌ្ឍន៍ឲ្យបានល្អប្រសើរឡើង មិនត្រូវឲ្យជនណាម្នាក់ឫក្រុមមួយក្តាប់តូចធ្វើបដិវត្តន៍ពណ៍ ដើម្បីផ្តួលរំលំរដ្ឋាភិបាលដែលកើតឡើងពីការបោះឆ្នោតស្របច្បាប់នោះទេ។ លោកបញ្ជាក់ថា យើងកុំសន្តិភាពជាមួយពួកនេះពេក ហើយនៅមូលដ្ឋានរបស់យើងមិនត្រូវទុកចន្លោះឲ្យពួកប្រឆាំងទាំអនេះធំពេកនោះទេ។
ក្នុងនាមយើងជាមន្ត្រីបក្សរបស់គណៈបក្សប្រជាជនកម្ពុជា ត្រូវបកស្រាយឲ្យបានច្បាស់ប្រាប់ដល់ប្រជាពលរដ្ឋនៅសភាពការបច្ចប្បន្នដែលរដ្ឋាភិបាលបានទប់ស្កាត់ និងបង្ក្រាបបដិវត្តន៍ពណ៍កន្លងមក ទាំងនេះគឺជាការលើកឡើងរបស់លោកសុខ សម្បត្តិ ប្រធានគណៈកម្មាគណបក្សខណ្ឌបឹងកេងកង ក្នុងការជួបប្រជុំជាមួយសមាជិកអចិន្ត្រៃគណបក្សប្រជាជនកម្ពុជា សង្កាត់ និងខណ្ឌ នាថ្ងៃទី២១ ខែមីនា ឆ្នាំ២០២៣ នេះនៅស្នាក់ការគណៈបក្សប្រជាជនកម្ពុជាខណ្ឌបឹងកេងកង។
លោកបន្តថា បដិវត្តន៍ពណ៍ គឺសុទ្ធតែមានគម្រោងផែនការរៀបចំជាមុនយ៉ាងច្បាស់លាស់ និងមានការគាំទ្រពីបរទេស ដូចទៅនឹងព្រឹត្តិការណ៍មុនពេល ក្នុងអំឡុងពេល និងក្រោយពេលការបោះឆ្នោតឆ្នាំ២០១៣ គឺពិតជារូបភាពនៃបដិវត្តន៍ពណ៍ ឫការប៉ុនប៉ងធ្វើបដិវត្តន៍ពណ៍មិនបានសម្រេច។ សកម្មភាពទាំងអស់ដែលយើងបានឃើញ គឺសុទ្ធតែមានការរៀបចំផែនការទុកជាមុនយ៉ាងច្បាស់ សំដៅផ្តួលរំលំគណបក្សប្រជាជនកម្ពុជា និងផ្លាស់ប្តូរមេដឹកនាំកម្ពុជាពិតប្រាកដ។
ក្នុងឱកាសនោះផងដែរលោកសុខ សម្បត្តិ ក៍បានលើកឡើង ពីស្មារតីទទួលខុសត្រូវខ្ពស់របស់ក្រុមការងារទាំងអស់នៅថ្នាក់ភូមិ សង្កាត់ និងថ្នាក់ខណ្ឌ ដែលតែងតែអនុវត្តនូវគោលនយោបាយទិសដៅរបស់គណបក្ស ពិសេសជាទូទៅមានមនោសញ្ចេតនាជាប់ជាមួយប្រជាពលរដ្ឋទូទៅ ដូចអ្វីដែលសម្តេចអគ្គមហាសេនាបតីតេជោ ហ៊ុន សែន បានគិតគូពីប្រទេសជាតិនិងប្រជាពលរដ្ឋ ខិតខំនាំមកនូវសន្តិភាព និងការអភិវឌ្ឍរហូតដល់ទទួលបានជោគជ័យសម្រាប់ប្រទេសជាតិនិងប្រជា ពលរដ្ឋទាំងមូល៕
