ភ្នំពេញ ៖ ក្នុងកិច្ចប្រជុំក្រុមការងារចុះជួយ ខណ្ឌ សង្កាត់ នាព្រឹកថ្ងៃទី១៦ ខែតុលានេះលោក ឃួង ស្រេង ប្រធានគណកម្មធិការគណបក្សប្រជាជនកម្ពុជារាជធានីភ្នំពេញ និងជាប្រធានក្រុមការងារចុះជួយខណ្ឌព្រែកព្នៅ បានមានប្រសាសន៍ថា ក្រុមការងារទាំងអស់ ត្រូវធ្វើអ្វីល្អៗបន្ថែមទៀត បន្ទាប់ពីយើងបានទទួលសម្លេងគាំទ្រពីប្រជាពលរដ្ឋយ៉ាងច្រើនកុះករក្នុងការបោះឆ្នោត ឃុំ សង្កាត់ កាលពីឆ្នាំ២០២២ កន្លងមកថ្មីៗនេះ ដោយយើងខិតខំបន្តទៀតដើម្បីឲ្យប្រជាពលរដ្ឋគាត់កាន់តែមានជំនឿ និងអូសទាញអ្នកដែលស្ទាក់ស្ទើរ ព្រមទាំងអ្នកថ្មីមកគាំទ្រ និងបោះឆ្នោតជូនគណបក្សប្រជាជនកម្ពុជា អោយច្រើនកុះករនាឆ្នាំ២០២៣ ខាងមុខនេះបន្តទៀត។
លោកបន្តថា គណបក្សសង្កាត់ត្រូវតែប្រឹងទ្វេដងបន្ថែមទៀត ថែទាំសមាជិកចាស់កុំឲ្យរំលងដោយត្រូវប្រមូលគ្នីគ្នាដើម្បីគាំទ្រ និងមុខសញ្ញាដែលត្រូវជម្រុញ ដើម្បីឲ្យស្រលាញ់គ្នាឲ្យបានច្រើន។ ជាងនេះទៅទៀតត្រូវគៀងគរពង្រីកសមាជិកថ្មី ជាពិសេសយុវជនដែលដល់អាយុគ្រប់បោះឆ្នោតនាឆ្នាំ២០២៣ខាងមុខ អោយទៅចុះឈ្មោះបោះឆ្នោត និងត្រូវបោះឆ្នោតជូនគណបក្សប្រជាជនកម្ពុជា ឲ្យបានគ្រប់ៗគ្នា។
លោកប្រធានក្រុមការងារ បានឲ្យដឹងទៀតថា ចាប់ពីពេលនេះទៅក្រុមការងារទាំងអស់ត្រូវបន្តសហការ និងសាមគ្គីភាពផ្ទៃក្នុង សហាការគ្នាទៅវិញទៅមក ដោយត្រូវចូលរួមដោះស្រាយជូនដល់ប្រជាពលរដ្ឋដែលជួបប្រទះបញ្ហាផ្សេងៗទាំងអស់គ្នា ជាពិសេសសក្តាប់សតិអារម្មណ៍ប្រជាពលរដ្ឋតាមមូលដ្ឋានឲ្យបានច្បាស់ លោកឧទាហរណ៍ថា បើមានទីធ្លាធំនោះគេមកដណ្តើមយើងបានមួយចំណែកណាខ្លះហើយ តែបើយើងប្រឹងប្រែងធ្វើឲ្យមានទីធ្លាតូចនោះគឺមិនមាននរណាមកដណ្តើមយើងបាននោះទេ។
ជាចុងក្រោយលោក ក៍បានលើកឡើងផងដែរ ពីស្មារតីទទួលខុសត្រូវខ្ពស់របស់មន្ត្រីបក្សទាំងអស់នៅថ្នាក់ខណ្ឌ សង្កាត់ និងភូមិ ដែលតែងតែអនុវត្តនូវគោលនយោបាយទិសដៅរបស់គណបក្ស ពិសេសជាទូទៅមានមនោសញ្ចេតនាជាប់ជាមួយប្រជាពលរដ្ឋទូទៅ ដូចអ្វីដែលសម្តេចអគ្គមហាសេនាបតីតេជោ ហ៊ុន សែន បានគិតគូពីប្រទេសជាតិនិងប្រជាពលរដ្ឋ ខិតខំនាំមកនូវសន្តិភាព និងការអភិវឌ្ឍន៍រហូតដល់ទទួលបានជោគជ័យសម្រាប់ប្រទេសជាតិនិងប្រជាពលរដ្ឋទាំងមូល។
គួបញ្ជាក់ថា ក្នុងឱកាសនោះផងដែរលោកឃួង ស្រេង ក៍បានឧប្បត្ថម្ភដល់សង្កាត់ទាំង៥ ក្នុង១សង្កាត់ទទួលបានអង្ក២តោន និងថវិការ២លានរៀលផងដែរ៕
