បរទេស ៖ អ្នកដំណើរចំនួន១០នាក់ បាត់បង់ជីវិត និង៥០នាក់ទៀតរងរបួស បន្ទាប់ពីរថភ្លើងដឹកអ្នកដំណើរមួយគ្រឿង បានធ្លាក់ផ្លូវនៅភាគខាងកើតប្រទេសអ៊ីរ៉ង់ កាលពីព្រឹកថ្ងៃពុធទី០៨ខែមិថុនានេះ តែយ៉ាងណាបើតាមទូរទស្សន៍រដ្ឋអ៊ីរ៉ង់បានផ្សាយថា ចំនួនអ្នកស្លាប់និងរបួសអាចកើនឡើងទៀត ថ្វីបើព័ត៌មានលម្អិតដំបូងអំពីគ្រោះមហន្តរាយនេះ នៅតែមិនទាន់ដឹងច្បាស់ក៏ដោយ។
តាមសេចក្តីរាយការណ៍ទូរទស្សន៍រដ្ឋអ៊ីរ៉ង់បានឲ្យដឹងថា ទូរថភ្លើងចំនួនបួនក្នុងចំណោមប្រាំពីរ បានធ្លាក់ផ្លូវ ក្នុងពេលងងឹតនាព្រឹកព្រលឹម ក្បែរទីក្រុងវាលខ្សាច់ Tabas។ ក្រុមជួយសង្គ្រោះបានជិះរថយន្តសង្គ្រោះបន្ទាន់ និងឧទ្ធម្ភាគចក្រចំនួន ៣គ្រឿងទៅកាន់កន្លែងកើតហេតុនៅតំបន់ដាច់ស្រយាលមួយនេះ។
ហេតុការណ៍នៅលើផ្លូវដែកដែលតភ្ជាប់ទៅកណ្តាលទីក្រុង Yazd មួយនេះ កំពុងស្ថិតក្រោមការស៊ើបអង្កេត។ គួរបញ្ជាក់ថា គ្រោះថ្នាក់រថភ្លើងមួយទៀតកាលពីឆ្នាំ២០១៦ បានសម្លាប់មនុស្សរាប់សិបនាក់ និងរបួសជាច្រើននាក់។
គ្រោះមហន្តរាយរថភ្លើងអាក្រក់បំផុតរបស់ប្រទេសអ៊ីរ៉ង់ បានកើតឡើងក្នុងឆ្នាំ ២០០៤ នៅពេលរថភ្លើងដែលផ្ទុកដោយប្រេងសាំង ជី ស្ពាន់ធ័រ និងកប្បាស បានជួបគ្រោះថ្នាក់នៅជិតទីក្រុងប្រវត្តិសាស្ត្រ Neyshabur ដោយសម្លាប់មនុស្សប្រហែល ៣២០ នាក់ របួស ៤៦០ នាក់ និងបំផ្លាញភូមិចំនួន៥៕
