ភ្នំពេញ ៖ សមាជិកគណបក្សប្រជាជនកម្ពុជា ត្រូវរួបរួមសាមគ្គីគ្នាជាធ្លុងមួយ កុំជឿតាមការញុះញ៉ង់ពីអ្នកដទៃឲ្យសោះ ព្រោះវាអាចធ្វើឲ្យយើងបែកបាក់គ្នា ហើយបេក្ខភាពដែលមានសមត្ថភាព ក្នុងសន្និបាតជ្រើសរើសនេះគឺសម្រាប់រយៈពេល៥ឆ្នាំទៅមុខទៀត ត្រូវបំរើសេវា និងជួយប្រជាពលរដ្ឋទាន់ពេលវេលា មិនប្រកាន់បក្សពួក និងគ្រួសារនិយមនោះឡើយ។
ការធ្វើសន្និបាតជ្រើសរើសរកបេក្ខភាពដែលមានសមត្ថភាព ឲ្យធ្វើចៅសង្កាត់ និងក្រុមប្រឹក្សាសង្កាត់ គឺមានសារៈសំខាន់ណាស់ ដើម្បីបម្រើប្រជាពលរដ្ឋដោយពិតប្រាកដ មិនធ្វើបាបប្រជាពលរដ្ឋ មិនមើលងាយអ្នកក្រ ត្រូវផ្តល់សិទ្ធិសេរីភាពឲ្យស្មើៗគ្នា និងត្រូវដាក់ខ្លួនជាអ្នកបំរើប្រជាពលរដ្ឋដោយពិតប្រាកដ។
ទាំងនេះជាការលើកឡើងរបស់រស់ សុផាន់ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានទី១ក្រុមការងារចុះជួយខណ្ឌព្រែកព្នៅ តំណាងដ៏ខ្ពង់ខ្ពស់ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈកម្មាធិកាគណបក្សប្រជាជនកម្ពុជារាជធានីភ្នំពេញ និងជាប្រធានក្រុមការងារចុះជួយខណ្ឌព្រែកព្នៅ ក្នុងពិធីសន្និបាតគណៈកម្មាធិការគណបក្សប្រជាជកម្ពុជា សង្កាត់ព្រែកព្នៅ នាព្រឹកថ្ងៃទី០៨ ខែមករា ឆ្នាំ២០២២ នៅទីស្នាក់ការគណបក្សខណ្ឌព្រែកព្នៅ។
លោកបន្តថា ការជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ក្នុងសង្កាត់ព្រែកព្នៅនេះគឺសរុបចំនួន៣៥នាក់ ពេញសិទ្ធចំនួន១១នាក់ ហើយអ្នកពេញសិទ្ធទាំង១១នាក់នេះហើយ គឺជាមេដឹកនាំ និងជាអ្នកសម្របសម្រួល កែតម្រូវ ដើម្បីអភិវឌ្ឍន៍ និងជំរុញផ្តល់សេវាឲ្យកាន់តែល្អបន្ថែមក្នុងមូលដ្ឋានបន្ត៥ឆ្នាំទៅមុខទៀត។
គួរបញ្ជាក់ថា ការបោះឆ្នោតឃុំ-សង្កាត់ អាណត្តិទី៥នេះនឹងប្រព្រឹត្តទៅ នៅថ្ងៃទី០៥ ខែមិថុនា ឆ្នាំ២០២២ខាងមុខ៕
