កីឡាបរទេស ៖ លោក Fernando Santos ថាកីឡាករCristiano Ronaldo នៅតែបន្តជាប្រធានក្រុមដដែលបើទោះជាគេខឹងមួយពេលគ្រវែងផ្លាកប្រធានក្រុមចោលទៅលើដីក៍ដោយ ព្រោះគេគ្រាន់តែចង់ឈ្នះ ហើយគេផ្តល់គ្រប់យ៉ាងសម្រាប់តែជម្រើសជាតិប៉ុណ្ណោះ“លើកលែងតែគេមានការប៉ះទង្គិចជាមួយអ្នកចាត់ការ ឬមិត្តរួមក្រុមរបស់គេ នោះទើបយើងពិចារណាអំពីរឿងហ្នឹង”។
ក្រោយមានរឿងចម្រូងចម្រាសនៅការប្រកួតរវាងព័រទុយហ្គាល់-ស៊ែប៊ីដែលឈានដល់ការគ្រវែងផ្លាកប្រធានក្រុមចោលទៅលើដី ដែលជាសកម្មភាពរបស់ Cristiano Ronaldo ក៏នាំឲ្យកើតមានចម្ងល់ថា តើតារាឆ្នើមរូបនេះនឹងមានសិទ្ធដើរតួជាប្រធានក្រុមទៀតឬអត់នៅប្រកួតបន្ទាប់?។
ត្បិតបើមានការរិះគន់ពីមតិរបស់មនុស្សមួយចំនួនថា CR7 ធ្វើបែបហ្នឹងមិនត្រឹមត្រូវ តែតាមការលើកឡើងរបស់អ្នកចាត់ការលោក Fernando Santos បាននិយាយថា វាមិនជាកំហុសឆ្គងអ្វីនោះទេ ហើយគ្រប់យ៉ាងគឺគេធ្វើដើម្បីជម្រើសជាតិទាំងមូល បែបនេះតំណែងប្រធានក្រុមនៅតែបន្តធម្មតា។
លោក Santos បាននិយាយមុនត្រៀមប៉ះលុចហ្សំបួរបែបនេះថា៖ “វាគ្រាន់តែបង្ហាញពីការខកចិត្តមួយពេលតែប៉ុណ្ណោះ ដោយ Cristiano នៅតែបន្តជាប្រធានក្រុម ហើយគេគឺជាគំរូសម្រាប់អ្នករាល់គ្នា”។លោកសង្កត់ធ្ងន់៖ “លើកលែងតែគេមានការប៉ះទង្គិចជាមួយអ្នកចាត់ការ ឬមិត្តរួមក្រុមរបស់គេ នោះទើបយើងពិចារណាអំពីរឿងហ្នឹង តែនេះគ្មានអ្វីកើតឡើងផង ដោយគេតែងតែចង់ឈ្នះ ហើយគេផ្តល់គ្រប់យ៉ាងសម្រាប់តែជម្រើសជាតិប៉ុណ្ណោះ”។
គួរបញ្ជាក់ថា រឿងគ្រវែងផ្លាកប្រធានក្រុមចោលទៅលើដីនេះបានផ្ទុះខ្លាំង ក្រោយពេលដែលគ្រាប់បាល់របស់ Ronaldo ដែលចូលផុតទីចង់កន្លះម៉ែត្រទៅហើយ បែរជាមិនផ្តល់ឲ្យ ទង្វើបែបនេះបានធ្វើឲ្យCR7 ក៏ដូចជាអ្នកគាំទ្ររបស់ព័រទុយហ្គាល់ មានការខឹងសម្បាជាខ្លាំង ដោយដល់ថ្នាក់ Ronaldo ដើរចេញពីការប្រកួតមុនបញ្ចប់តង់ទៀតផង។ហើយត្រូវអ្នកចាត់ការក្រុមជម្រើសជាតិលោក Fernandon Santos បាននិយាយរិះគន់ថា FIFA គួរតែពិចារណាមើលលើការបំពាក់បច្ចេកវិទ្យាទាំងនោះនៅការប្រកួត ហើយលោកពិតជាសោកស្តាយព្រោះក្រោយចប់គឺអាជ្ញាកណ្តាលត្រឹមតែនិយាយពាក្យសុំទោស តែប៉ុណ្ណោះ៕
