ភ្នំពេញ ៖ កីឡាករសួន ចាន់នី អ្នកប្រដាល់របស់ក្លិបបក្សីស្លាបដែកនៃសមាគមកីឡាក្រសួងមហាផ្ទៃ ឡើងសងសឹកកីឡាករយ៉េន ឌីណា អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម ខណៈអេ ណារ័ត្ន អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម ឡើងជួបជាមួយកីឡាករសេក ចាន់រាជ អ្នកប្រដាល់មកពីក្លិបអង្គរមានជ័យខេត្តសៀមរាប ដើម្បីសាកស្នៀតគុននៅលើសង្វៀនស៊ីអិនស៊ី នាថ្ងៃអាទិត្យទី២១ ខែមីនា ឆ្នាំ២០២១។
បន្ទាប់ពីចាញ់ជាច្រើនលើកកន្លងមក កីឡាករសួន ចាន់នី កើតទុកមិនសុខចិត្តសុំមកសងសឹកលើកីឡាករយ៉េន ឌីណា ដែលប្រមាណជាង១០ប្រកួតហើយវាយមិនដែលចាញ់មកនោះ ក្នុងប្រភេទទម្ងន់៦៣.៥គីឡូក្រាម ការជួបគ្នាលើកនេះត្រូវបានអ្នកស្នេហាវិស័យកីឡាប្រដាល់ សន្និដ្ឋានមុនថា ភាគរយក្នុងការឈ្នះគឺយ៉េន ឌីណា មានភាគរយឈ្នះច្រើនជាងសួន ចាន់នី នេះបើពួកគេបានហ្វឹកហាត់ដូចគ្នា។
កីឡាករយ៉េន ឌីណា គេមានកណ្ដាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ និងមានកាយសម្បទារឹងមាំ ចិត្តប្រដាល់ធំ និងមានកលល្បិចខ្ពស់ក្នុងការប្រកួត ហើយធ្លាប់ជួបប្រកួតជាមួយថៃច្រើននាក់ គឺអាចធ្វើឲ្យសួន ចាន់នី ពិបាកគ្រប់ពេលក្នុងការជួបគ្នាម្តងៗ បើទោះជាសួន ចាន់នី ស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះក៍ដោយ ក៍មិអាចយកឈ្នះលើយ៉េន ឌីណា បានដែរបានត្រឹមស្មើរពិន្ទុម្តងប៉ុណ្ណោះ។ ចាំមើលសួន ចាន់នី អាចសងសឹកលើយ៉េន ឌីណា បានឬយ៉ាងណា?។
ដោយឡែកកីឡាករអេ ណារ័ត្ន ត្រូវជួបជាមួយកីឡាករសេក ចាន់រាជ ក្នុងប្រភេទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេនៅសង្វៀននេះកន្លងមក។ អ្នកប្រដាល់គុនខ្មែរវ័យក្មេងអេ ណារ័ត្ន ដែលកំពុងមានឈ្មោះបោះសំឡេង មួយរូប នាបច្ចប្បន្ននេះ រូបគេខ្លាំងខាងកណ្តាប់ដៃ និងជង្គង់ ហើយការវាយរល់លើរូបគេមិនត្រូវការ ស្ទាបស្ទង់ដៃគូច្រើននោះទេ ដ្បិតទម្លាប់របស់គេឡើងរេញគឺ ចូលបុកវាយមិនរាថយឡើយ បើទោះបីលទ្ធផល ឈ្នះឬ ចាញ់ បែបណាក្ដី។
ចំណែកកីឡាករសេក ចាន់រាជ បន្ទាប់ពីគេបាត់មុខពីសង្វៀនមួយរយៈមកវិលមកវិញឃើញថា ស្នៀតប្រកួតរបស់គេនៅល្អដូចមុនដដែល ទាំងកម្លាំងស៊ុហ្វ ស្នៀតជើងទាត់ ជង្គង់ គឺនៅអាចប្រើបានដដែលពិសេសគឺស្នៀតកណ្តាប់ដៃនិងកែងដែលអាចវាយប្រយោលក៍បានចូលកៀកក៍បាន ហើយស្នៀតខ្លាំងរបស់គេនេះហើយដែលបានគូប្រកួតទាំងជើងចាស់និងជើងថ្មីនាពេលកន្លងមក ព្រោះគេមានចិត្តប្រដាល់ធំមិនរ៊ាថយចំពោះគូប្រកួតណាម្នាក់ឡើយ បើទោះជាគេមានបទពិសោធន៍ច្រើនជាងក៍ដោយ។ ចាំមើលកីឡាករសេក ចាន់រាជ និងកីឡាករអេ ណារ័ត្ន នរណាជាអ្នកឈ្នះ?៕
