ភ្នំពេញ ៖ កីឡាករជើងខ្លាំងសួន ចាន់នី អ្នកប្រដាល់របស់ក្លិបបក្សីស្លាបដែក ឡើងតតាំងនិងកីឡាករឡុង បេនលឿន ខណៈកីឡាករជើងខ្លាំងស្រករក្រោយសូត្រ វាសនា កូនសិស្សលោកគ្រូសួន ប៊ុនសូត្រ ត្រូវជួបជាមួយកីឡាករអេលិត ឡុងឡី កូកសិស្សរបស់លោកគ្រូស៊ន អេលិត នៅលើសង្វៀនស៊ីអិនស៊ី នាថ្ងៃសៅរ៍ទី១៣ ខែមិនា ឆ្នាំ២០២១នេះ។
កីឡាករសួន ចាន់នី មួយរយះចុងក្រោយនេះក្នុងពិភពប្រដាល់ គ្មានអ្នកណាមិនស្គាល់ស្នាដៃ និងកេរ្តិ៍ឈ្មោះរបស់គេនោះឡើយ ដោយពេលឡើងប្រកួតម្តងៗមិនថាតែប្រកួតដណ្តើមខ្សែក្រវ៉ាត់ឫ ប្រកួតលក្ខណមិត្តភាពទេគឺ តែងតែប្រកួតមិនលាក់កម្លាំងនោះឡើយ។ អ្នកប្រដាល់មានដៃវែងជើងវែងសួន ចាន់នី ជាអ្នកប្រដាល់ជើងខ្លាំងទម្ងន់មធ្យមប្រចាំកម្ពុជាម្នាក់នាពេលបច្ចប្បន្នដែល ធ្លាប់ប្រកួតជាមួយអ្នកប្រដាល់បរទេសជាច្រើននាក់មកហើយ គឺឈ្នះច្រើនជាងចាញ់ព្រោះស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះទេ។ បច្ចុប្បន្នសួន ចាន់នី គេវាយមិនឈ្នះតែកីឡាករយេន ឌីណាម្នាក់ប៉ុណ្នោះ ក្រៅពីនោះមានឈ្នះមានចាញជាមួយកីឡាករលំដាប់ឈួមុខដូចគ្នា។
រីឯកីឡាករឡុង បេនលឿន ស្នៀតខ្លាំងរបស់គេភាគច្រើនគឺជើងទាត់ ជង្គង់ និងស្នៀតកាច់ផ្តួលអោយគូប្រកួតដួលទាំងជំហរ រីឯខាងកណ្តាប់ដៃ និងកែងគេអាចប្រើបាន តែមិនខ្លាំងប៉ុន្មានទេ តែគេមានកម្លាំងស៊ុហ្វខ្លាំងវាយ៥ទឹកមិនលំបាកនោះទេ។ យ៉ាងណាឡើងមកជួបសួន ចាន់នី ពេលនេះត្រូវបានអ្នកគាំទ្រវិស័យកីឡាប្រដាល់គុនខ្មែរលើកឡើងថា ឡុង បេនលឿន អាចសង្ឃឹមឈ្នះមានត្រឹមហាសិបភាគរយប៉ុណ្ណោះ។ ចាំមើលកីឡាករឡុង បេនលឿន និងសួន ចាន់នី នរណាជាអ្នកឈ្នះ?។
ដោយឡែកកីឡាករជើងថ្មី សូត្រ វាសនា ត្រូវជួបជាមួយកីឡាករអេលិត ឡុងឡី ក្នុងប្រភេទទម្ងន់៦០គីឡូក្រាម អ្នកទាំងពីមិនធ្លាប់ជួបគ្នាទេកន្លងមកក្នុងកម្មវិធីនេះ។ កីឡាករសូត្រ វាសនា គេមានស្នៀតកណ្តាប់ដៃ និងកែងវាយចេញបានល្អ វាយមួយៗមែនតែចំគោលដៅ កីឡាកររូបនេះវ័យក្មេងមែនតែវាយមិនងាយច្រឡោតជាមួយគូប្រកួតនោះទេ ហើយវាយមិនមើលស្រាលដៃគូឡើយ តែយ៉ាងណាការប្រកួតដែលគេមើលថាអាចផ្តួលបានគឺគេមិនប្រោសនោះទេ។
ចំណែកកីឡាករអេលិត ឡុងឡី គេក៍ជាកីឡាករស្រករក្រោយដែរស្នៀតខ្លាំងរបស់គេគឺកណ្តាប់ដៃ និងកែង ដែលអាចវាយប្រយោលក៍បានចូលគៀកក៍បាន ហើយគេមានកម្លាំងស៊ុហ្វខ្លាំង គូប្រកួតល្មមៗមិនអាចតតាំងជាមួយគេបាន៥ទឹកនោះទេ។ ចាំមើលកីឡាករសូត្រ វាសនា ជាអ្នកឈ្នះ ឬកីឡាករអេលិត ឡុឡី?៕
