កីឡាបរទេស ៖ បន្ទាប់ពីក្លិប PSG បានយកឈ្នះលើក្រុម FC Barcelona នៅទឹកដី Camp Nou ក្នុងលទ្ធផល៤ ទល់និង១ កាលពីពាក់កណ្តាលសប្តាហ៍នេះមក ហើយកីឡាករ Kylian Mbappe រកបាន Hat-Trick មក ក្លិប PSG បានដាក់តម្លៃរួចរាល់ហើយសម្រាប់ Mbappe នោះគឺ២០០លានអឺរ៉ូ ប្រសិនក្លិបណាធំៗមួយចង់បានរូបគេយកទៅរួមរស់នោះ។
តាមដំណឹងចុងក្រោយលេចលឺថា ក្លឹប Real Madrid មានបំណងចង់នាំយក Kylian Mbappe នៅទីផ្សារដោះដូរនាពេលខាងមុខ ហើយសម្រាប់ក្លឹបបារាំង PSG ពួកគេក៏នឹងព្រមលក់ដែរនៅត្រឹមឆ្នាំ២០២១ ដោយមិនអូសបន្លាយពេលឲ្យដល់ឆ្នាំ ២០២២ ដែលជាឆ្នាំផុតកុងត្រាគ្មានតម្លៃខ្លួននោះទេ។ដោយឡែកបន្ទាប់ពីការរកបាន Hat-Trick របស់ Kylian Mbappe នៅទឹកដី Camp Nou កាលពីថ្ងៃមុន ក៏ធ្វើឲ្យអនាគតរបស់កីឡាករបារាំងកាន់តែរង្គោះ.រង្គើ ហើយមានអ្នកគាំទ្រជាច្រើនចង់ដឹងថាគេនឹងចាកចេញឬបន្តកុងត្រាថ្មី។
បើតាមរបាយការណ៍ពី Le Parisien របស់បារាំងបានចុះផ្សាយ ក្លឹប PSG បានកំណត់តម្លៃរួចរាល់ហើយសម្រាប់ Mbappe នោះគឺ២០០លានអឺរ៉ូ ប្រសិនក្លឹបនៅអឺរ៉ុបណាចង់បាន។ ចំពោះទំហំតម្លៃកប់ពពកមួយនេះ តាមប្រភពក៏សង្កត់ធ្ងន់ថាបច្ចុប្បន្នមិនទាន់មានក្លឹបណាមួយហ៊ានចូលស្តីនោះទេ ណាមួយក៏ដោយសារបណ្តាក្លឹបធំៗជួបបញ្ហាហិរញ្ញវត្ថុក្នុងការរាត.ត្បាតជំងឺ COVID-19 នេះផង។
ក្រៅពីតម្លៃផ្ទេរចេញហើយ ក្លឹបទាំងអស់ក៏ត្រូវចរចាលើថ្លៃពលកម្មដ៏ក្រាស់ក្រែលមួយផ្សេងទៀត ព្រោះសព្វថ្ងៃ Mbappe ស៊ីថ្លៃ៣០លានអឺរ៉ូ/រដូវកាលឯណោះ។ នៅរដូវកាល ២០២០/២១ យុវជនវ័យ២២ឆ្នាំ គេរកបាន២១គ្រាប់និង Assist ៩លើកនៅការបង្ហាញខ្លួន២៩លើកឲ្យក្លឹប៕
