កីឡាបរទេស ៖ ម៉ាស៊ីនរកគ្រាប់បាលរបស់ក្លិបហង្សក្រហម Liverpool គឺកីឡាករMohamed Salah ទោះជាមិនសប្បាយចិត្តជាមួយគ្រូបង្វឹកលោក Jurgen Klopp បន្តិចបន្តួចយ៉ាងណាក៍ដោយ ក៍កីឡាកររូបនេះមិនចាកចេញពីក្រុម ដោយរូបគេនឹងបន្ដលេងឱ្យ Liverpool ទៀតនាការប្រកួតខាងមុខៗទៀត។
លោក Jurgen Klopp បានអះអាងថាខ្សែប្រយុទ្ធ Mohamed Salah មិនមានអ្វីត្រូវបារម្ភឡើយ ព្រោះរូបគេនៅជាកីឡាករ Liverpool និងធ្វើបានល្អដដែល។Salah នៅសល់កុងត្រាដល់ឆ្នាំ២០២៣ ហើយរូបគេជាកីឡាករទទួលបានប្រាក់ឈ្នួលខ្ពស់ជាងគេម្នាក់ក្នុងក្លឹបផងដែរ ដោយ១សប្ដាហ៍ទទួលបាន២សែនផោន។យ៉ាងណាមិញ មួយរយៈកន្លងទៅនោះ ស្រាប់តែមានដំណឹងថារូបគេចង់ចាកចេញពីក្រុមហើយ ក្រោយពីមិនសប្បាយចិត្តជាមួយលោក Klopp ដែលមិនឱ្យរូបគេធ្វើប្រធានក្រុមប្រកួតកន្លងទៅ។តែទោះជាយ៉ាងនេះក្ដី សម្រាប់លោក Klopp ផ្ទាល់វិញមើលឃើញថាមិនមានអ្វីជាបញ្ហាឡើយ។ Salah នៅផ្ដោតអារម្មណ៍បានល្អ ទាំងចិត្ត គំនិត និងកាយសម្បទា។ រូបគេនឹងបន្ដលេងឱ្យ Liverpool ទៀតនាប្រកួតខាងមុខ។ Salah កំពុងតែសប្បាយចិត្តនៅក្លឹបដដែល៕
