ភ្នំពេញ ៖ សមត្ថកិច្ចនៃការិយាល័យប្រឆាំងបទល្មើសជួញដូរមនុស្ស កងរាជអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់មកតុលាការ ដើម្បីចាត់ការតាមច្បាប់ ពាក់ព័ន្ធករណី ស្រវឹងគ្រឿងញៀនប្រើហិង្សាក្នុងគ្រួសារ ដោយការបំផ្លាញទ្រព្យសម្បត្តិ និងបានយកកាំបិតប៉័ងតោប៉ុនប៉ងកាប់សម្លាប់ឪពុកម្តាយខ្លួនឯងទៀតផង នារសៀលថ្ងៃទី២៥ ខែកញ្ញា ឆ្នាំ២០២០។
ព្រះរាជអាជ្ញាអមតុលាការកំពង់ធ្វើការសាកសួរអាកូនក្រពើរមិលគុណនេះ ហើយអំពើហឹង្សារនេះបានកើតឡើងកាលពីវេលាម៉ោង០១និង៣០នាទី ថ្ងៃទី២៣ ខែកញ្ញា ឆ្នាំ២០២០ ស្ថិតនៅចំណុចផ្ទះលេខ១៧៣ ក្រុមទី៣ ភូមិកប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ។ ជនដៃដល់ឈ្មោះ សំ សំណាង ភេទប្រុស អាយុ២២ឆ្នាំ មុខរបរមិនពិតប្រាកដ បច្ចុប្បន្នស្នាក់នៅផ្ទះលេខ១៧៣ ក្រុមទី៣ ភូមិកប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ។
សមត្ថកិច្ចអាវុធហត្ថរាជធានីភ្នំពេញបានឲ្យដឹងថា ជនសង្ស័យឈ្មោះ សំ សំណាង ជាមនុស្សធ្លាប់ប្រើប្រាស់គ្រឿងញៀន ហើយថែមទាំងធ្លាប់បានបំផ្លិចបំផ្លាញ និងលួចទ្រព្យសម្បត្តិនៅក្នុងគ្រួសារយកទៅលក់ ដើម្បីយកលុយទៅទិញថ្នាំញៀនប្រើប្រាស់ និងតែងតែមករករឿងក្រុមគ្រួសារម្តងហើយម្តងទៀត ថែមទាំងបានគំរាមកំហែងថានឹងកាប់សម្លាប់អ្នកនៅក្នុងផ្ទះចោលទាំងអស់។
ជាក់ស្តែងនៅវេលាម៉ោង១១និង៣០នាទី ថ្ងៃទី២២ ខែកញ្ញា ឆ្នាំ២០២០ ជនសង្ស័យខាងលើបានមករករឿងអុកឡុកក្នុងផ្ទះ ព្រមទាំងបានយកកាំបិតប៉័ងតោគំរាមកាប់សម្លាប់ឪពុកម្តាយខ្លួនផងដែរ តែត្រូវបានបងប្អូនជួយចាប់ឃាត់បំបែកទាន់ ឃើញដូចនេះទើបម្តាយបង្កើតក៏រត់ទៅប្តឹងសមត្ថកិច្ចមូលដ្ឋានអាវុធហត្ថខណ្ឌព្រែកពៅឃាត់ខ្លួនភ្លាមៗតែម្តង។ ក្រោយការឃាត់ខ្លួនជនសង្ស័យបានសារភាពថា រូបខ្លួន និងក្រុមគ្រួសារ ឧស្សាហ៍ឈ្លោះប្រកែកគ្នាជារឿយៗ ហើយពិតជាបានយកកាំបិតប៉័ងតោគំរាមអ្នកនៅក្នុងគ្រួសារ ពិតប្រាកដមែន ហើយកន្លងមកខ្លួនតែងតែបង្កអំពើហិង្សា និងបំផ្លិចបំផ្លាញទ្រព្យសម្បត្តិ និងជាអ្នកប្រើប្រាស់គ្រឿងញៀនជាប់ជាប្រចាំ ហើយនៅថ្ងៃកើតហេតុខ្លួនគេបានមកទារលុយឳពុកម្ដាយដើម្បីទិញគ្រឿងញៀន តែពេលគាត់មិនអោយទើបយកកាំបិតគំរាមតែម្ដងទៅ៕
