កីឡាបរទេស ៖ លោក Klopp អ្នកចាត់ការក្រុម Liverpool បានសរសើរដល់កូនក្រុមរបស់ខ្លួនគឺកីឡាករ Fabinho ខ្លាំងមែនទែនក្នុងការប្រកួតយកឈ្នះលើក្រុម Chelsea ក្នុងលទ្ធផល ២-០ ហើយលោកយល់ថាពានរង្វាន់កីឡាករលេងល្អ សម្រាប់តែបានលើ Fabinho នេះហើយ។
ក្រុម Liverpool បានយកឈ្នះលើក្រុម Chelsea ក្នុងលទ្ធផល ២-០ សម្រាប់ការប្រកួតសប្ដាហ៍ទី២នៃពានរង្វាន់ English Premier League។សម្រាប់ការប្រកួតនេះដែរ លោក Klopp បានសរសើរដល់កីឡាករ Fabinho ខ្លាំងមែនទែន ដែលយប់មិញនេះលេងក្នុងតំណែងខ្សែការពារកណ្ដាល។ ក្រុម Liverpool មានកីឡាកររបួសនៅតំបន់ការពារ២នាក់កឺ Joe Gomez និង Joel Matip ដូច្នេះហើយ អ្នកចាត់ការ Klopp ក៏ដាក់ Fabinho ឱ្យលេងនៅតំបន់ការពារនេះវិញ។
ជាលទ្ធផលឃើញថាកីឡាករប្រេស៊ីលនេះលេងបានយ៉ាងល្អ។ តួយ៉ាងរូបគេបានបិទមួយទល់មួយជាមួយខ្សែប្រយុទ្ធ Timo Werner បានជាច្រើនលើកផងដែរក្នុងការប្រកួតដែលជួយឱ្យក្រុម Liverpool ទទួលបានជ័យជម្នះ។ លោក Klopp យល់ថាពានរង្វាន់កីឡាករលេងល្អ សម្រាប់តែបានលើ Fabinho នេះហើយ៕
