កីឡាបរទេស ៖ ក្នុងការប្រកួតបើកឆាកពានរង្វាន់ English Premier League ឆ្នាំ២០២០-២០២១ នេះក្រុមដែលគួរឱ្យចាប់អារម្មណ៍នោះគឺក្រុម Liverpool ប៉ះក្រុមLeeds United ដែលអាចបង្កើតគ្រាប់បាល់ក្រុមរហូតដល់ទៅ៧គ្រាប់ គឺក្រុម Liverpool បានយកឈ្នះទៅលើក្រុម Leeds United ក្នុងលទ្ធផលប្រដេញគ្នា៤-៣ នៅយប់ថ្ងៃទី១២ ខែកញ្ញា ឆ្នាំ២០២០នេះ។
សម្រាប់ការប្រកួតនេះដែរ ក្រុម Liverpool ដែលជាក្រុមការពារតំណែងជើងឯកវាយសម្រុកយ៉ាងខ្លាំង ប៉ុន្តែក៏ត្រូវក្រុម Leeds United វាយបកបានវិញជាបន្ដបន្ទាប់ផងដែរ។ ការប្រកួតនេះក្រោយពីស្មើគ្នា៣-៣ ហើយ នៅចុងម៉ោងក៏ស្រាប់តែ Rodrigo បង្កកំហុសធ្វើឱ្យក្រុម Liverpool មានឱកាសទទួលបានប៉េណាល់ទី១គ្រាប់ និងជាគ្រាប់បាល់ជ័យជម្នះផងដែរ។
ចំពោះកំហុសរបស់ Rodrigoនេះដែរ លោកMarcelo Bielsa អ្នកចាត់ការក្រុម Leeds United មិនបន្ទោសកូនក្រុមតែម្នាក់នោះទេ សម្រាប់កំហុសនេះ។ ដោយលោកអះអាងថាក្រុម Liverpool ធ្វើបានយ៉ាងល្អសម្រាប់ប្រកួតមួយនេះ ដែលធ្វើឱ្យពួកគេយកជ័យជម្នះបាន។ តែយ៉ាងណាមិញ លោក Marcelo ក៏មើលឃើញថាក្រុមខ្លួន បានបង្កើតឱកាស និងបង្ហាញថាពួកគេសក្ដិសមណាស់សម្រាប់ការប្រកួតនៅលីគកំពូលអង់គ្លេសឆ្នាំ២០២០-២០២១ នេះ៕
