ភ្នំពេញ ៖ យុវជនខ្មែរថាវរៈចំនួន២នាក់ គឺកញ្ញា ឈឿន ដារាវី និងលោក ហ៊ុន វណ្ណៈ ស្ថិតក្នុងចំណោមក្រុមយុវជន៦នាក់ដែលត្រូវសមត្ថកិច្ចចាប់ខ្លួន ពីបទញុះញង់ បង្កឲ្យមានភាពវឹកវរដល់សន្តិសុខសង្គមនោះ ត្រូវបានតុលាការសម្រេចចោទប្រកាន់ និងបញ្ជូនទៅឃុំខ្លួនបណ្ដោះអាសន្នរួចហើយ កាលពីល្ងាចថ្ងៃទី១៤ ខែសីហា ឆ្នាំ២០២០ នេះបើតាមការបញ្ជាក់ពី លោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ កាលពីព្រឹកថ្ងៃទី១៥ ខែសីហា ឆ្នាំ២០២០ នេះ។
ក្រុមយុវជនខ្មែរថាវរៈទាំង២នាក់ ដែលត្រូវចាប់ខ្លួននេះ ស្ថិតក្នុងចំណោមក្រុមយុវជន៦នាក់ ត្រូវបានសមត្ថកិច្ចឃាត់ខ្លួន ទាក់ទងបទល្មើសជាក់ស្ដែង បង្កភាពរញ៉េរញ៉ៃ និងអសន្តិសុខសង្គម ក៏ដូចជាការតវ៉ាដាក់សម្ពាធលើតុលាការឲ្យដោះលែង លោក រ៉ុង ឈុន កាលពីថ្ងៃទី១៣ ខែសីហា ឆ្នាំ២០២០។
ក្រុមយុវជនដែលត្រូវបានចាប់ខ្លួននោះរួមមាន ៖ ទី១-កញ្ញា ឈឿន ដារ៉ាវី (ចាប់តាមដីកា),ទី២- លោកហ៊ុន វណ្ណៈ, ទី៣-លោកថា ឡាវី, ទី៤-កញ្ញាជា គន្ធីន, ទី៥-កញ្ញា យ៉ង សៀងហៃ, និងទី៦-លោក ស្វាយ សំណាង។
លោកឧត្ដមសេនីយ៍ ស ថេត ស្នងការនគរបាលរាជធានីភ្នំពេញ បានថ្លែងប្រាប់អ្នកសារព័ត៌មាន កាលពីល្ងាចថ្ងៃទី១៣ ខែសីហា ថា សមត្ថកិច្ចចាប់ខ្លួនមនុស្សទាំង៦នាក់ ក្នុងនោះមានម្នាក់ ត្រូវបានចាប់ខ្លួនតាមដីការបស់តុលាការ និង៥នាក់ទៀត ជាបទល្មើសជាក់ស្ដែង ដោយសារពួកគេ បង្កភាពរញ៉េរញ៉ៃ និងបង្កអសន្តិសុខសង្គម។
ចំណែក លោកឧត្ដមសេនីយ៍ឯក ឆាយ គឹមឃឿន អ្នកនាំពាក្យអគ្គស្នងការនគរបាលជាតិបានអះអាងថា ការចាប់ខ្លួននេះ សមត្ថកិច្ចចោទប្រកាន់ពីបទបង្កភាពវឹកវរ និងប៉ះពាល់ដល់សណ្ដាប់ធ្នាប់សង្គម តាមមាត្រា៤៩៥ និង៤៩៥ នៃក្រមនីតិវិធីព្រហ្មទណ្ឌ ហើយសំណុំរឿងនេះ នឹងបញ្ជូនទៅតុលាការ ដើម្បីចាត់ការតាមនីតិវិធីផ្លូវច្បាប់ ក្រោយពីសមត្ថកិច្ចបញ្ចប់នីតិវិធី។
លោកឧត្ដមសេនីយ៍ឯកបញ្ជាក់ថា កញ្ញា ឈឿន ដារ៉ាវី សមត្ថកិច្ចចាប់ខ្លួនដោយអនុវត្តតាមដីការបស់តុលាការ ដោយចោទប្រកាន់ពីបទញុះញង់ បង្កឲ្យមានផលប៉ះពាល់ដល់សន្តិសុខសង្គម ហើយបច្ចុប្បន្នកំពុងអនុវត្តតាមនីតិវិធី។ ចំពោះ លោកឧត្ដមសេនីយ៍ឯក ឆាយ គឹមឃឿន បានប្រាប់ឲ្យសង្គមស៊ីវិល ដែលចោទប្រកាន់ថា ការចាប់ខ្លួននោះ ជាការរំលោភរដ្ឋធម្មនុញ្ញ ទៅមើលរដ្ឋធម្មនុញ្ញឡើងវិញ។
គួររំលឹកថា ការចាប់ខ្លួននេះ បន្ទាប់ពីរដ្ឋបាលរាជធានីភ្នំពេញ បានចេញសេចក្ដីណែនាំមួយបញ្ជាក់ថា រាល់សកម្មភាពជួបប្រជុំ ប្រមូលផ្ដុំ ដែលគ្មានការជូនដំណឹងជាលាយលក្ខណ៍អក្សរមករដ្ឋបាលរាជធានីភ្នំពេញ ត្រូវចាត់ទុកជាទង្វើខុសច្បាប់ ស្ដីពីការធ្វើបាតុកម្មដោយសន្តិវិធី ដែលអាជ្ញាធរមានសមត្ថកិច្ច ត្រូវចាត់វិធានការតាមច្បាប់ជាធរមាន។ចំណែកអ្នកនាំពាក្យក្រសួងយុត្តិធម៌ បញ្ជាក់ថា ការប្រមូលផ្ដុំគ្នាទាមទារឲ្យដោះលែងលោករ៉ុង ឈុន គឺជាការដាក់សម្ពាធមកលើតុលាការ ដែលអាចប្រឈមចំពោះផ្លូវច្បាប់៕
