ឧត្តរមានជ័យ ៖ ពលរដ្ឋខ្មែរ៣នាក់ ត្រូវអាជ្ញាធរថៃ បញ្ជូនខ្លួនមកឱ្យកម្ពុជាវិញ តាមច្រកអន្តរជាតិជាំ ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ នៅរសៀលថ្ងៃទី២៤ ខែមិថុនា ឆ្នាំ២០២០ ក្រោយជាប់ទោសជិត៥ឆ្នាំ ក្នុងទឹកដីថៃ ពីបទឆ្លងដែនខុសច្បាប់។
តាមរបាយការណ៍របស់ស្នងការដ្ឋាន នគរបាលខេត្តឧត្តរមានជ័យ បានឱ្យដឹងនៅថ្ងៃទី២៥ ខែមិថុនា ឆ្នាំ២០២០នេះថា ប្រជាពលរដ្ឋខ្មែរទាំង៣នាក់ ដែលថៃបញ្ជូនមក ត្រូវបានថៃចាប់ខ្លួននៅថ្ងៃទី០៨ ខែកញ្ញា ឆ្នាំ២០១៦ ពីបទឆ្លងដែនកាប់ឈើគ្រញូងខុសច្បាប់ ចូលតាមច្រកចំការគរ ស្ថិតក្នុងភូមិសាស្ត្រខេត្តបន្ទាយមានជ័យ និងយកទៅឃុំខ្លួននៅខេត្តអំណាចចារើន ប្រទេសថៃ។
ប្រជាពលរដ្ឋខ្មែរទាំង៣នាក់មានទី១. ឈ្មោះ គង់ ផេន ភេទប្រុសអាយុ២៣ឆ្នាំ រស់នៅស្រុកសំឡូត ខេត្តបាត់ដំបង, ទី២. ឈ្មោះ ផុន ហុន ភេទប្រុសអាយុ២៩ឆ្នាំ រស់នៅភូមិកញ្ជាំង ឃុំស៊ុមមួយ ស្រុកសំឡូត ខេត្តបាត់ដំបង និងទី៣. ឈ្មោះ ម៉ម វិត ភេទប្រុស អាយុ២៥ឆ្នាំ រស់នៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបង។
ក្រោយពីបានត្រួតពិនិត្យសុខភាព ពិនិត្យរកជំងឺកូវីដ-១៩ និងសម្អាតខ្លួនប្រាណដោយទឹកអាល់កុលពីមន្ត្រីចត្តាឡីសាក់ប្រចាំច្រករួចមក សមត្ថកិច្ចបានធ្វើការអប់រំ ណែនាំឱ្យបញ្ឈប់សកម្មភាពឆ្លងដែន ខុសច្បាប់តទៅទៀត និងបានអនុញ្ញាតឱ្យវិលត្រឡប់ទៅលំនៅដ្ឋានវិញរៀងៗខ្លួន៕
