ភ្នំពេញ ៖ នាថ្ងៃសៅរ៍ទី២០ ខែមិថុនា ឆ្នាំ២០២០នេះ កីឡាករសួន ចាន់នី អ្នកប្រដាល់របស់ក្លិបបក្សីស្លាបដែកនៃសមាគមកីឡាក្រសួងមហាផ្ទៃ ឡើងសងសឹកកីឡាករប៉ោ ភារិទ្ធ អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម ខណៈកីឡាករលី រិទ្ធី អ្នកប្រដាល់មកពីក្លិបមីស្ទីលីគុនខ្មែរ ឡើងតតាំងនិងកីឡាករឡុង សុវណ្ណឌឿន អ្នកប្រដាល់របស់ក្លិបសាលវ័នកីឡា នៅលើសង្វៀនស៊ីអិនស៊ី។
បន្ទាប់ពីចាញ់២លើកកន្លងមក កីឡាករសួន ចាន់នី កើតទុកមិនសុខចិត្តសុំមកសងសឹកកីឡាករប៉ោ ភារិទ្ធ ដែលប្រមាណជា១០ប្រកួតចុងក្រោយវាយមិនដែលចាញ់មកនោះ ក្នុងប្រភេទទម្ងន់៦៣.៥គីឡូក្រាម ការជួបគ្នាលើកនេះត្រូវបានអ្នកស្នេហាវិស័យកីឡាប្រដាល់ សន្និដ្ឋានមុនថា ភាគរយក្នុងការឈ្នះគឺប៉ោ ភារិទ្ធ មានភាគរយឈ្នះច្រើនជាងសួន ចាន់នី បើពួកគេបានហ្វឹកហាត់ដូចគ្នា។
កីឡាករប៉ោ ភារិទ្ធ គេមានកណ្ដាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ និងមានកាយសម្បទារឹងមាំ ចិត្តប្រដាល់ធំ និងមានកលល្បិចខ្ពស់ក្នុងការប្រកួត ហើយធ្លាប់ជួបប្រកួតជាមួយថៃច្រើននាក់ គឺអាចធ្វើឲ្យសួន ចាន់នី ពិបាកគ្រប់ពេលក្នុងការជួបគ្នាម្តងៗនោះ បើទោះជាសួន ចាន់នី ស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះក៍ដោយ។ ចាំមើលសួន ចាន់នី អាចសងសឹកលើប៉ោ ភារិទ្ធ បានឬយ៉ាងណា?។
ដោយឡែកកីឡាករស្រករក្រោយលី រិទ្ធី ឡើងមកសុំសាកល្បងវិជ្ជាគុននិងកីឡាករជើងចាស់ឡុង សុវណ្ណឌឿន ដែលការប្រកួតនេះត្រូវបានអ្នកតាមដានកីឡាប្រដាល់លើកឡើងថាឡុង សុវណ្ណឌឿន មានភាគរយឈ្នះច្រើនទៅលើលី រិទ្ធី ព្រោះគេជាកីឡាករជើងចាស់ហើយបានប្រកួតញឹកញ៉ាប់ជាងលី រិទ្ទី ដែលទើបនិងឮឈ្មោះក្នុងពិភបប្រដាល់គុនខ្មែរនាពេលថ្មីៗនេះតែប៉ុណ្ណោះ។
បើទោះជាកីឡាករឡុង សុវណ្ណឌឿន ជាអ្នកប្រដាល់ចាស់វស្សាក្តី ការប្រកួតនេះក៍មិនត្រូវមើលស្រាលកីឡាករលី រិទ្ធី ដែរព្រោះថាបើហ៊ានប្រហេសច្បាស់ជាចាញ់មិនខាន។ ចាំមើលធើន ធារ៉ា និងឡុង សុវណ្ណឌឿន នរណាជាអ្នកឈ្នះ?៕
