ភ្នំពេញ ៖ កីឡាករឌុម កែវដា អ្នកប្រដាល់របស់ក្លិបម្កុដរាជសីហ៍ គៀកស្មារនិងកីឡាករសួន ចាន់នី អ្នកប្រដាល់នៃក្លិបបក្សីស្លាបដែក ជួបកីឡាករថៃឆលីមឆ័យ និងកីឡាករគ្រៀងក្រៃ ត.សិលាឆ័យ ខណៈកីឡាករវេង សុភ័ក្រ អ្នកប្រដាល់របស់ក្លិបកងពលតូចឆ័ត្រយោង៩១១ ជួបកីឡាករអ៊ីរ៉ង់Lali Dastjerdi នៅលើសង្វៀនស៊ីអ៊ិនស៊ី នាល្ងាចថ្ងៃសៅរ៍ទី១៤ ខែធ្នូ ឆ្នាំ២០១៩នេះ។
កីឡាករ ឌុម កែវដា ត្រូវជួបប្រកួតជាមួយកីឡាករថៃឆលីមឆ័យ ក្នុងប្រភេទទម្ងន់៦៣.៥គីឡូក្រាម អ្នកទាំងពីរក៍មិនដែលជួបគ្នាដែរ។កីឡាករជើងខ្លាំង ឌុម កែវដា បច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។ ចាំមើលកីឡាករឌុម កែវដា អាចយកឈ្នះលើកីឡាករថៃឆលីមឆ័យ បានដែរឫយ៉ាងណា?។
កីឡាករសួន ចាន់នី ត្រូវជួបជាមួយកីឡាករថៃឈ្មោះគ្រៀងក្រៃ ត.សិលាឆ័យ ក្នុងប្រភេទទម្ងន់៦០គីឡូក្រាម ស្នៀតខ្លាំងរបស់កីឡាករថៃគឺជើងទាត់ ជង្គង់ និងស្នៀតកាច់ផ្តួល រីឯកីឡាករកម្ពុជាសួន ចាន់នី វិញមួយរយះចុងក្រោយនេះក្នុងពិភពប្រដាល់ គ្មានអ្នកណាមិនស្គាល់ស្នាដៃ និងកេរ្តិ៍ឈ្មោះរបស់គេនោះឡើយ។ ពេលឡើងប្រកួតម្តងៗមិនថាតែប្រកួតដណ្តើមខ្សែក្រវ៉ាត់ឫ ប្រកួតលក្ខណមិត្តភាពទេគឺ តែងតែ ប្រកួតមិនលាក់កម្លាំងនោះឡើយ។ អ្នកប្រដាល់មានដៃវែងជើងវែងសួន ចាន់នី ជាអ្នកប្រដាល់ជើងខ្លាំងទម្ងន់មធ្យមប្រចាំកម្ពុជាម្នាក់នាពេលបច្ចប្បន្នដែល ធ្លាប់ប្រកួតជាមួយអ្នកប្រដាល់បរទេសជាច្រើននាក់មកហើយ គឺឈ្នះច្រើនជាងចាញ់ព្រោះស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះទេ។ ចាំមើលកីឡាករសួន ចាន់នី ជាអ្នកឈ្នះឬកីឡាករថៃគ្រៀងក្រៃ ត.សិលាឆ័យ?។
ដោយឡែកកីឡាករវេង សុភ័ក្រ ជួបជាមួយកីឡាករអ៊ីរ៉ង់Lali Dastjerdi ក្នុងប្រភេទទម្ងន់៦១គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករអ៊ីរ៉ង់ម្នាក់នេះមានវិជ្ជាគុនខ្លាំងប៉ុណ្ណានោះដែរ។ ចំណែកកីឡាករពូកែខាងប្រើកណ្តាប់ដៃនិងជង្គង់ វេង សុភ័ក្រ ត្រូវបានអ្នកវិភាគប្រដាល់អះអាងថា មានភាគរយឈ្នះច្រើនជាងចាញ់ ពេលជួបជាមួយកីឡាករជនជាតិអ៊ីរ៉ង់Lali Dastjerdi ព្រោះបច្ចប្បន្ននេះវេង សុភ័ក្រ គេជាអ្នកប្រដាល់ជើងខ្លាំងវ័យក្មេងម្នាក់ដែរ ដែលឡើងប្រកួតកម្រចាញ់គូរប្រកួតណាស់ព្រោះរូបគេ ប្រកួតមិនចេះលាក់ កម្លាំងនិងមានស្នៀតពិសេសដើម្បីផ្តួលដៃគូឲ្យសន្លប់ថែមទៀតផង។
អ្នកប្រដាល់រូបនេះ មានបទពិសោធន៍និងតិចនិកក្នុងការប្រកួតច្រើន ដូចជាកីឡាករជើងចាស់ផងដែរ បើទោះជាគេទើបចូលប្រឡូកវិស័យកីឡាប្រដាល់ក្បាច់ខ្មែរបុរាណ ព្រោះគេមានកណ្តាប់ដៃធ្ងន់ និងរហ័ស ឯកម្លាំងស៊ុហ្វក៏រឹងមាំផងដែរ។ អញ្ចឹងហើយទើបអ្នកស្នេហាកីឡាប្រដាល់ភាគច្រើននៅតែគាំទ្រកីឡាករវេង សុភ័ក្រ ថាគេជាកីឡាករដែលមានសក្តានុពល ហើយមានសមត្ថភាពគួរឱ្យសរសើរ ដោយម្នាក់ៗហាក់សម្តែងនូវទំនុកចិត្តចង់ទស្សនាយ៉ាងខ្លាំងនៅគ្រប់ពេលកីឡាកររូបនេះឡើងរេញប្រកួតម្តងៗនោះ។ ចាំមើលកីឡាករវេង សុភ័ក្រ និងកីឡាករអ៊ីរ៉ង់Lali Dastjerdi នណាជាអ្នកឈ្នះ?៕
