ភ្នំពេញ ៖ ក្នុងឱកាសបុណ្យអុំទូករយៈពេល៣ថ្ងៃក្នុងខែវិច្ឆកា ឆ្នាំ២០១៩ដែលចូលមកដល់នាពេលខាងមុខនេះ វិធានការចំពោះមុខ ដែលចាំបាច់បំផុត សម្រាប់រាជរដ្ឋាភិបាល គឺបញ្ហាសន្តិសុខ-សណ្ដាប់ធ្នាប់ ក្នុងនោះក៍មានកងកម្លាំងសមត្ថកិច្ចប៉ូលិស និងកម្លាំងកងរាជអាវុទ្ធហត្ថរបស់ខណ្ឌព្រែកព្នៅរបស់យើងផងដែរ ដែលត្រូវសហការជាមួយកងកម្លាំងសមត្ថកិច្ចប៉ូលិស និងកម្លាំងកងរាជអាវុទ្ធហត្ថរបស់ខណ្ឌផ្សេងទៀត តាមចំនុចគោលដៅនិមួយៗនោះ។
ក្នុងឪកាសប្រជុំគណៈបញ្ជាការឯកភាពរដ្ឋបាលខណ្ឌ កាលពីព្រឹកថ្ងៃទី១៧ ខែតុលា ឆ្នាំ២០១៩នេះលោកសុខ សម្បត្តិ បានមានប្រសាសន៍ថាសូមឲ្យកម្លាំងសមត្ថកិច្ចទាំងអស់ ត្រូវគោរពឲ្យបានខ្ជាប់ខ្ជួននៅវិន័យសេចក្តីថ្លៃថ្នូ និងសាមគ្គីឲ្យបានល្អ ក្នុងឱកាសបុណ្យអុំទូកឆ្នាំនេះ កងកម្លាំងសមត្ថកិច្ចប៉ូលិស និងកម្លាំងកងរាជអាវុទ្ធហត្ថរបស់ខណ្ឌព្រែកព្នៅរបស់យើងក៍ត្រូវសហការជាមួយកងកម្លាំងសមត្ថកិច្ចប៉ូលិស និងកម្លាំងកងរាជអាវុទ្ធហត្ថរបស់ខណ្ឌផ្សេងទៀត តាមចំនុចគោលដៅដែលបានគ្រោងទុកផងដែរ។
លោកបន្តថា ទន្ទឹមនឹងការបញ្ជូនកម្លាំងទៅរក្សា សន្តិសុខ សណ្តាប់ធ្នាប់នៅមុខព្រះបរមរាជវាំង កម្លាំងសមត្ថកិច្ចប៉ូលិស និងកងរាជអាវុទ្ធហត្ថរបស់យើងក៍មិនភ្លេចផងដែរ នូវសន្តិសុខសណ្តាប់ធ្នាប់របស់ប្រជាពលរដ្ឋនៅក្នុងខណ្ឌព្រែកព្នៅទាំងមូល ក្រែងមានជនឆក់ឪកាសមួយចំនួនវាប្រព្រឹត្តិ បទល្មើសផ្សេងៗនៅតាមភូមិ សង្កាត់ ពិសេសផ្នែកចរាចរណ៍តាមបណ្តោយផ្លូវជាតិលេខ៥តែម្តង ហើយតាមបណ្តាសង្កាត់ត្រូវមានវេនប្រចាំបញ្ជា ពិសេសដោយមិនត្រូវអោយជនណាម្នាក់អុកឡុក ឬញុះញុង និងធ្វើសកម្មភាពផ្សេងៗត្រូវទប់ស្កាត់ជាបន្ទាន់។
លោកអភិបាលខណ្ឌព្រែកព្នៅ បានមានប្រសាសាន៍ឲ្យដឹងទៀតថា នៅក្នុងពិធីអុំទូក អកអំបុក និងសំពះព្រះខែ រយៈពេល៣ថ្ងៃឆ្នាំ២០១៩នេះ មិនមែនមានតែបញ្ហាសន្តិសុខ-សណ្ដាប់ធ្នាប់តែម្យ៉ាងនោះទេដែលរាជរដ្ឋាភិបាលបានយកចិត្តទុកដាក់ខ្ពស់នោះ បញ្ហាសុខភាពរបស់ប្រជាពលរដ្ឋដែលមកចូលរួមក៏ជាផ្នែកមួយដ៏សំខាន់ផងដែរ ដូចនេះបងប្អូនប្រជាពលរដ្ឋដែលមកពីតាមបណ្តាខេត្តមកចូលរួមត្រូវមានការប្រុងប្រយ័ត្តខ្ពស់ ពិសេសក្មេងៗដូច។
ក្នុងឱកាសនោះផងដែរលោកសុខ សម្បត្តិ ក៏បានអំពាវនាវឲ្យប្រជាពលរដ្ឋគ្រប់គ្នា នៅក្នុងខណ្ឌព្រែកព្នៅ ត្រូវមានការប្រុងប្រយ័ត្ន និងភាពម្ចាស់ការខ្ពស់ ចៀសវាងបង្កឲ្យមានអគ្គិភ័យកើតឡើងជាយថាហេតុ ដែលបណ្ដាឲ្យខូចខាត ដល់ទ្រព្យសម្បត្តិ និងអាយុជីវិតក្នុងឱកាសបុណ្យអុំទូកឆ្នាំនេះផងដែរ។ ជាចុងក្រោយលោកក៍បានផ្តាំផ្ញើរដល់បណ្តាសង្កាត់ និងតាមភូមិទាំងអស់ក្នុងខណ្ឌព្រែកព្នៅ ត្រូវរៀបចំទទួលទានអំបុកជាតិ ថ្ងៃទី០៩វិច្ឆិកា ទាំងអស់គ្នា ដើម្បីការពារសន្តិភាពនៅគ្រប់មូលដ្ឋាន៕
