ភ្នំពេញ ៖ កីឡាករជើងខ្លាំងស្រករក្រោយម៉ឺន មេឃា អ្នកប្រដាល់សមាគមន៍កីឡាប្រដាល់ក្រសួងការពារជាតិ បានក្លាយជាម្ចាស់ខ្សែក្រវ៉ាត់ ទម្ងន់៦០គីឡូក្រាម បន្ទាប់ពីប្រកួតជម្រុះអស់រយៈពេលប្រមាណជា៣ខែកន្លងមកនេះ ហើយបានយកឈ្នះវគ្គផ្តាច់ព្រ័ត្យលើកីឡាករថៃលីងលំ នៅលើសង្វៀនស៊ីអិនស៊ី កាលពីព្រឹកថ្ងៃសៅរ៍ទី២១ ខែកញ្ញា ឆ្នាំ២០១៩នេះ។
ក្នុងការប្រកួតវគ្គផ្តាច់ព្រ័ត្យនេះកីឡាករទាំងពីរ បានបង្ហាញការតស៊ូយ៉ាងស្វិតស្វាញ ដើម្បីដណ្ដើមយកជ័យជម្នះរៀងៗខ្លួន។ កីឡាករម៉ឺន មេឃា ដែលជាជើងខ្លាំង មានជំនឿចិត្តខ្ពស់បានបញ្ចេញស្នៀតប្រកបដោយមោទនភាព និងអំណួតបំផុត វាយសម្រុកទៅកាន់បង្គោលខៀវ ចំណែកកីឡាករថៃលីងលំ វិញក៏មិនចុះញ៉មនឹងកាលៈទេសៈដ៏តានតឹងនោះដែរ ទើបកាន់តែធ្វើឲ្យឆាកប្រយុទ្ធរបស់កីឡាករមួយគូនេះ ទទួលបានសម្រែកហ៊ោកញ្ជ្រៀវយ៉ាងកងរំពងជាខ្លាំងតែម្តង។
នៅទឹកទី២ និងទី៣កីឡាករថៃលីងលំ បានព្យាយាមវាយសន្ធាប់ខ្លាំងចូលចាប់ដើម្បីអុកជង្គង់ ប៉ុន្តែម៉ឺន មេឃា មិនបានសម្រុក ឬវាយបកខ្លាំងៗនោះទេ ពោលគឺគ្រាន់តែទប់ប៉ុណ្ណោះ។ ចូលដល់ទឹកទី៤ កីឡាករទាំងពីរក៏បានសម្រុកគ្នាទៅវិញទៅមក ហើយនៅពាក់កណ្ដាលផ្លូវនៃទឹកទី២នោះម៉ឺន មេឃា បានប្រើកណ្ដាប់ដៃ វាយចូលផ្ទៃមុខរបស់លីងលំផ្ទួនៗពីរដៃចំផ្ទៃមុខ បណ្តាលឲ្យចង់បាត់បង់ស្មារតីម្តងៗ។
ក្រោយបញ្ចប់ការប្រកួតភ្លាមៗ មានអ្នកគាំទ្រជាច្រើននាំគ្នាសប្បាយចិត្តជំនួសកីឡាករម៉ឺន មេឃា។ ម៉ឺន មេឃា បានប្រាប់ថាមុនការប្រកួតគេត្រៀមខ្លួនបានច្រើនហើយហ្វឹកហាត់បានជាប់លាប់ទៀត ហើយស្នៀតខ្លាំងរបស់កីឡាករថៃលីងលំ គឺខ្លាំងបានតែជងញកង់ប៉ុណ្ណោះ ដូចនេះហើយទើបខ្លួនបានហាត់ស្នៀតវាយបក និងមិនអោយកីឡាករថៃចូលចាប់វ៉ៃជង្គង់បានដោយស្រួលៗនោះទេ។
ជ័យជំនះនេះ បានធ្វើឲ្យម៉ឺន មេឃា ក្លាយជាជើងឯកម្ចាស់ខ្សែក្រវាត់កម្ពុជាសង្វៀនគុនខ្មែរទម្ងន់៦០គីឡូក្រាម និងជាម្ចាស់ប្រាក់រង្វាន់៦,០០០ដុល្លារអាម៉េរិក។ ចំណែកឯកីឡាករថៃលីងលំ ទទួលបានចំណាត់ថ្នាក់លេខ២នោះ ទទួលបានប្រាក់រង្វាន់ចំនួន៣,០០០ដុល្លារអាម៉េរិក៕
