ភ្នំពេញ ៖ កីឡាករជង្គង់ទិព្វ ឡុង សុភី អ្នកប្រដាល់របស់ក្លិបសាលវ័ន្តកីឡា ត្រូវជួបគ្នាជាមួយកីឡាករអ្នកលែងកណ្តាប់ដៃធ្ងន់ រឿង សោភ័ណ្ឌ អ្នកប្រដាល់នៃក្លិបម្កុដរាជសីហ៍ ក្នុងការប្រកួតផ្តាច់ព្រ័ត្រ ដើម្បីដណ្តើមប្រាក់១៦លានរៀល នាថ្ងៃសៅរ៍ទី១៤ ខែកញ្ញា ឆ្នាំ២០១៩នេះ លើសង្វៀនស៊ីអិនស៊ី។
ក្នុងការប្រកួតកន្លងមក រវាងរឿង សោភ័ណ្ឌ និងឡុង សុភី ប្រកួតឈ្នះគូប្រកួតដូចគ្នា ជាមួយកីឡាករបរទេស ម្ល៉ោះហើយទើបការប្រកួតនេះត្រូវបានអ្នកតាមដានវិស័យកីឡាប្រដាល់រំពឹងថា ពួកគេទាំង២ពិតជាធ្វើឱ្យកក្រើកសង្វៀននៅវគ្គផ្តាច់ព្រ័ត្រនេះជាក់ជាពុំខាន ព្រោះតែកីឡាករទាំងពីរខានជួបគ្នាយូរហើយតាំងពីឆ្នាំ២០១៦មក។
បើនិយាយអំពីបច្ចេកទេសរបស់កីឡាករទាំងពីរវិញ ឡុង សុភី នរណាក៏ទទួលស្គាល់ថា គេមានស្នៀតជង្គង់ល្អដែរ ព្រោះគេបានខាងកម្ពស់ដៃវែងជើងវែង ពេលប្រកួតរាល់លើកភាគច្រើន សុទ្ធតែផ្តួលគូតស៊ូពីក្បាច់ជង្គង់ពិឃាតរបស់គេនេះតែម្តង។ ការប្រកួតទាំងថ្នាក់ជាតិនិងអន្តរៈជាតិកន្លងមក សុភីគេចូលចិត្តប្រើស្នៀតកែងនិងជង្គង់ណាស់ ដែលអាចវាយចេញជាប្រយោលក៏បាន ចូលកៀកក៏បានគ្រប់កាលៈទេសៈ។ តែយ៉ាងណាឡុង សុភី ក៏មានចំណុចខ្សោយខ្លះដែរគឺត្រង់កម្លាំងស៊ុហ្វតែម្តង។
ចំណែកកីឡាកររឿង សោភ័ណ្ឌ វិញគេជាអ្នកប្រដាល់លេងស្នៀតកណ្តាប់ដៃ និងកែង រីឯស្នៀតជើងទាត់ និងជង្គង់របស់គេ ក៍ល្អហើយខ្លាំងផងដែរ។ ប៉ុន្តែទោះជាយ៉ាងនេះក្តី រឿង សោភ័ណ្ឌ ក៏មានចំណុចខ្សោយខ្លះដែរ គឺត្រង់គេមានកម្ពស់រាងទាបបន្តិច ដៃខ្លីជើងខ្លីវាយមិនសូវដល់គូប្រកួត ហើយបើដៃគូម្ខាងគេមានកម្ពស់ខ្ពស់ជាងនោះច្បាស់ជាយ៉ាប់របស់គេមិនខាន តែគេមានកម្លាំងពលំពេញ៥ទឹកមិនពិបាកឡើយ។
រឿង សោភ័ណ្ឌ កន្លងមកគេជាកីឡាករជើងខ្លាំងម្នាក់ដែលឡើងប្រកួតលើកណាក៏ពិបាករកដៃគូមកផ្តួលឱ្យគេឲ្យចាញ់ពិន្ទុ ឬសន្លប់នៅលើរេញណាស់។ អញ្ចឹងហើយទើបអ្នកស្នេហាកីឡាប្រដាល់ភាគច្រើនកំពុងនាំគ្នាយល់ថារឿង សោភ័ណ្ឌ គេជាកីឡាករដែលមានសក្តានុពល ហើយមានសមត្ថភាពគួរឱ្យសរសើរ ដោយម្នាក់ៗហាក់សម្តែងនូវទំនុកចិត្តចង់ទស្សនាយ៉ាងខ្លាំងនៅគ្រប់ ពេលកីឡាកររូបនេះឡើងរេញប្រកួតម្តងៗនោះ។
ក្រុមអ្នកតាមដាននិយាយថារឿង សៅភ័ណ្ឌ មួយរយៈនេះកំពុងក្តាប់សំណាងឈ្នះម្តងហើយម្តងទៀត ស្ទើរតែគ្រប់ការប្រកួតតែម្តង ខណៈដែលសំណាងដែលកីឡាកររូបនេះទទួលបាននោះ គឺមិនមែនបានដោយភាពចៃដន្យនោះទេ ប៉ុន្តែគឺបានពីសមត្ថភាពពិតៗ។ គូរប្រកួតទាំងជើងចាស់ និងជើងថ្មី សុទ្ធតែទទួលស្គាល់ថាកីឡាកររឿង សៅភ័ណ្ឌ ពិតជាពិបាកផ្តួល និងកំពុងធ្វើឱ្យពួកគេក្លាយជាអ្នកចាញ់ជាបន្តបន្ទាប់។ នៅក្នុងការប្រកួត ក្នុងប្រភេទទំងន់ ៦៩គីឡូក្រាមនេះ គេមិនទាន់ហ៊ានទស្សន៍ទាយមុននៅឡើយទេថា កីឡាករូបណាអាចមានសង្ឃឹមច្រើនជាងទេ ព្រោះបើនិយាយពីស្នៀតគុណកីឡាករទាំង២នាក់នេះវិញម្យាងម្នាក់មិនលើសខ្វះគ្នាប៉ុន្មាននោះទេ បើកីឡាករណាហ៊ានតែប្រហែសតែបន្តិចនោះច្បាស់ជាចាញ់មិនខាន ដូច្នេះគូនេះគ្មាននរណាហ៊ានទស្សន៍ទាយលទ្ធផលទុកមុននោះឡើយ។ ចាំមើលកីឡាករឡុង សុភី ឫកីឡាកររឿង សោភ័ណ្ឌ នណាជាអ្នកឈ្នះ៕
