ភ្នំពេញ ៖ កីឡាករកម្ពុជា២រូប និងកីឡាករថៃ២រូប ជួបគ្នាក្នុងវគ្គបាក់កណ្តាលផ្តាច់ព្រ័ត្រឆ្ពោះទៅដណ្តើមខ្សែក្រវាត់ មានកីឡាករលន បញ្ញា អ្នកប្រដាល់នៃសមាគមន៍កីឡាប្រដាល់ក្រសួងការពារជាតិ ជួបកីឡាករពុទ្ធ សំបូរ អ្នកប្រដាល់របស់ក្លិបពុទ្ធសេរីវង្សកីឡាពោធិសែនជ័យ ខណៈកីឡាករថៃ២រូបមានកីឡាករលីងលំ ជួបកីឡាករដាវវិសេដ នៅលើសង្វៀនស៊ីអិនស៊ី នាថ្ងៃសៅរ៍ទី២៤ ខែសីហា ឆ្នាំ២០១៩។
កីឡាករលន បញ្ញា ត្រូវជួបជាមួយកីឡាករពុទ្ធ សំបូរ ក្នុងប្រភេទទម្ងន់៦០គីឡូក្រាម។កីឡាករលន បញ្ញា គេជាកីឡាករស្រករក្រោយទេតែស្នៀតខ្លាំងរបស់គេខ្លាំងទាំងព្រមតែម្តង ក្នុងនោះបើគេទាត់មួយជើងហើយកណ្តាប់ដៃក៍ចេញតាមក្រោយដែរ ហើយស្នៀតកែងបុកកាណូតក៍គ្រោះថ្នាក់ដែរ កីឡាករល្មមៗមិនអាចទប់ជាមួយគេបានប្រាំទឹកនោះទេ ហើយគេមានកម្ពស់ខ្ពស់ទៀត ដែលអាចបោះជង្គង់ខ្លីក៍បានវែងក៍បាន តែយ៉ាងណាលន បញ្ញា គេមិនសូវខ្លាំងខាងកម្លាំងស៊ុហ្វនោះទេ។
ចំណែកកីឡាករពុទ្ធ សំបូរ ស្នៀតប្រយុត្តិនៅលើសង្វៀនមិនចាញ់កីឡាករលន បញ្ញា ប៉ុន្មានទេ ហើយកន្លងមកគេមានកម្លាំងស៊ុហ្វខ្លាំង កលល្បិចប្រកួតល្អ និងមានផ្លែល្អ ហើយមួយទៀត សំបូរមានសមត្ថភាពប្រដាល់ខ្ពស់ថែមទៀតផង។ យ៉ាងណាការប្រកួតរវាងអ្នកប្រដាល់ទាំងពីរ ត្រូវបានអ្នកតាមដានប្រដាល់លើកឡើងថាលន បញ្ញា ជាអ្នកឈ្នះច្រើនជាងចាញ់។ ចាំមើលកីឡាករពុទ្ធ សំបូរ គេអាចយកឈ្នះលើកីឡាករលន បញ្ញា បានឡើងទៅវគ្គផ្តាច់ព្រ័ត្រដែរឬយ៉ាងណា?។
ដោយឡែកការជួបគ្នារវាងកីឡាករថៃលីងលំ និងកីឡាករដាវវិសេដ វិញមិនទាន់ដឹងថានរណាខ្លាំងជាងនរណានោះទេ តែកីឡាករថៃស្នៀតខ្លាំងរបស់គេគឺជើងទាត់កាត់ ជង្គង់ និងស្នៀតកាច់ផ្តួល ស្រដៀងៗគ្នា។ តែទោះជាយ៉ាងនេះក្តីការជួបគ្នារវាងអ្នកទាំង២នាក់នេះត្រូវបានអ្នកតាមដានលើកឡើងថា មិនមែនជាគូប្រកួតដែលជក់ចិត្តនោះទេ ព្រោះពួកគេត្រូវបានអ្នកនាំកីឡាយកមក ហើយជិះឡានជាមួយគ្នាដូចនេះការវាយរបស់ពួកគេគឺមិនអស់ពីសមត្ថភាពនោះទេ។
អ្នកតាមដានកីឡាប្រដាល់លើកឡើងទៀតថា កីឡាករថៃទាំងពីរនាក់នេះបើមកជួបគ្នាក៍ប្រកួតមិនអស់ពីសមត្ថភាព ហើយអាចមានកីឡាករម្នាក់ផ្សេងមកជំនួសផងក៍មិនដឹង ព្រោះពួកគេតម្រូវឲ្យកីឡាករណាម្នាក់ឡើងមកជួបប្រកួតជាមួយកីឡាករកម្ពុជា លន បញ្ញា និងពុទ្ធ សំបូរ បើកីឡាករណាជាអ្នកឈ្នះនោះ។ ចាំមើលរវាងកីឡាករថៃទាំងពីរអ្នកនេះនរណាជាអ្នកឈ្នះឡើងទៅជួបកីឡាករកម្ពុជា វគ្គផ្តាច់ព្រ័ត្រ?៕
