ភ្នំពេញ ៖ កីឡាករជើងខ្លាំងទម្ងន់មធ្យមមឿង សុខហ៊ុច អ្នកប្រដាល់ពុទ្ធសេរីវង្សពោសែនជ័យកីឡា ឡើងសាកកណ្តាប់ដៃជាមួយកីឡាករថៃផាន់វិត រីឯកីឡាករឃីម បូរ៉ា អ្នកប្រដាល់មកពីក្លិបរស្មីភូមិគៀបខេត្តបន្ទាយមានជ័យ ត្រូវឡើងសងសឹកកីឡាករថៃទួនប៉េ នៅលើសង្វៀនស៊ីអិនស៊ី នាថ្ងៃសៅរ៍ទី១៥ ខែមិថុនា ឆ្នាំ២០១៩នេះ ។
កីឡាករមឿង សុខហ៊ុយ ដែលត្រូវជួបជាមួយកីឡាករជនជាតិថៃផាន់វិត ក្នុងប្រភេទទម្ងន់៦៥គីឡុក្រាម ដែលអ្នកទាំង២នាក់នេះមិនដែលជួបគ្នាទេនាពេលកន្លងមក។ មួយរយៈចុងក្រោយនេះមឿង សុខ ហ៊ុច ត្រូវបានគេមើលឃើញថា ដើរលុកលុយរករឿងតាមបណ្តាសង្វៀនទួរទស្សន៍ជាមួយអ្នកប្រដាល់បរទេសខ្លាំងៗ ពិសេសកីឡាករថៃជាច្រើននាក់ដែលមានលទ្ធផលគួរឲ្យសសើរ។
មឿង សុខហ៊ុច គេមានកាយសម្បទារឹងមាំ ព្រមទាំងមានស្នៀតកែង និងជង្គង់ ដែលធ្វើឲ្យគូរប្រកួតរបស់ខ្លួន ពិបាកទប់ទល់ និងជាស្នៀតសម្រាប់ផ្ដួលគូរប្រកួតដ៍អស្ចារទៀតផង។ការវាយចេញរបស់សុខហ៊ុច ធ្ងន់ហើយរហ័ស ជាពិសេសស្នៀតជើងទាត់ និងជង្គង់ របស់គេខ្លាំងណាស់អាចបញ្ចេញបានភ្លាមៗស្របជាមួយដៃតែម្តង។ ប៉ុន្តែយ៉ាងណា មឿង សុខហ៊ុច ក៏មានចំណុចខ្សោយខ្លះដែរ គឺត្រង់វាយចេញហើយមិនសូវការពាវិញនោះទេដែលធ្វើឲ្យដៃគូប្រកួតឆាប់ដឹងពីចំណុចខ្សោយទាំងនេះ ហើយណាមួយគេប្រកួតស្ទើររាល់សប្តាហ៍ ដូចនេះវិជ្ជាគុនរបស់គេមិនសូវរីកចំរើនដូចមុននោះទេ។ ចាំមើលមឿង សុខហ៊ុច ជាអ្នកឈ្នះ ឬកីឡាករថៃផាន់វិត?។
ដោយឡែកកីឡាករឃីម បូរ៉ា ឡើងសងសឹកកីឡាករថៃ ទួនប៉េ ដែលធ្លាប់ចាញ់កីឡាករថៃម្នាក់នេះក្នុងប្រកួតវគ្គជម្រុះខ្សែក្រវាត់កន្លងមក។ កីឡាករទួនប៉េ គេចេះគ្រប់ស្នៀត ពិសេសកណ្តាប់ដៃរបស់គេតែម្តង ដែលធ្វើឲ្យកីឡាករកម្ពុជា ជាច្រើននាក់សណ្តាប់ និងចុះចាញ់។
ចំណែកកីឡាករឃីម បូរ៉ា វិញជាអ្នកប្រដាល់ជើងខ្លាំងកម្ពុជាមួយរូប ដែលបច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ដើម្បីផ្ដួលគូប្រកួតរបស់ខ្លួន។ តែកីឡាករកម្ពុជារូបនេះចិត្តប្រដាល់របស់គេតូច រួមផ្សំជាមួយកម្លាំងស៊ុហ្វមិនសូវខ្លាំងផងនោះ ធ្វើឲ្យកីឡាកររូបនេះមិនសូវហ៊ានប្តូរជាមួយគូប្រកួតណាដែលដើរចូលវាយកំញើញខ្លួននោះឡើយ។ ទោះជាយ៉ាងនេះក្តីឃីម បូរ៉ា គេវាយតាមបច្ចេកទសដកថយមែនតែគេវាយសងមួយៗវិញចំគោលដៅបានល្អ ការប្រកួតរាល់លើកបើគេដឹងពីចំណុចខ្សោយគូប្រកួតហើយ គេវាយមិនប្រស់នោះទេ។ ចាំមើលការជួបគ្នានេះកីឡាករកម្ពុជាឃីម បូរ៉ា អាចសងសសឹកលើកីឡាករថៃទួនប៉េបានដែរឬយ៉ាងណា?៕
