ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន និងសាច់ញាតិបងប្អូន រួមនិងលោកសុខ សម្បត្តិ អភិបាលនៃគណៈអភិបាលខណ្ឌព្រែកព្នៅ ព្រមទាំងមន្ត្រីសាលាខណ្ឌជាច្រើនរូបទៀតផងនោះ បាននាំយកនូវចង្ហាន់វន័ជនព្រម ទាំងគ្រឿង ឧបភោគ បរិភោគ មួយចំនួនដើម្បី ធ្វើពិធីកាន់បិណ្ឌវេនទី៨ នៅវត្ត៣ក្នុងខណ្ឌព្រែកព្នៅ រាជធានីភ្នំពេញ នាព្រឹកថ្ងៃទី០២ ខែតុលា ឆ្នាំ២០១៨នេះ។
នេះគឺជាការប្រតិបត្តិ ទៅតាមទំនៀមទំលាប់ប្រពៃណីពីដូនតា ដែលតែងតែប្រារព ធ្វើឡើងជារាងរាល់ឆ្នាំគឺចាប់ពីថ្ងៃ១រោច ដល់ថៃ្ង១៥រោចខែភទ្របទ ជាថ្ងៃភ្ជុំធំ។ ការរៀបចំធ្វើពិធីបុណ្យនេះឡើងក្នុងគោលបំណង ដើម្បីនាំយកចង្ហាន់ មានបាយ សម្ល នំចំណី ផ្លែឈើ ទៀនធូប ផ្កាភ្ញី ថវិកា និងទេយ្យទានមួយចំនួន ថ្វាយព្រះរតនត្រ័យ និងដាក់បាត្រប្រគេនដល់ព្រះសង្ឃ បួងសួងឧទ្ទិសកុសលផលបុណ្យជូនដល់ មាតា បិតា ជីដូនជីតា កូនចៅ និងញាត្តិការទាំងប្រាំពីរសន្តាន ដែលបានចែកស្ថានទៅក្នុងលោកខាងមុខឲ្យចាកផុតពីទុក្ខទោស ហើយបានទៅកើតក្នុងសុខគតិភពកុំបីឃ្លៀងឃ្លាតឡើយ។
ពិធីបុណ្យនេះ មិនត្រឹមតែបង្ហាញពីភាពកត្តញ្ញូរបស់កូនចៅ ចំពោះអ្នកមានគុណប៉ុណ្ណោះទេ ប៉ុន្ដែនៅ មានអត្ថនយ័សំខាន់មួយទៀត គឺការពិចារណានូវសង្សារវដ្ដ ដែលមនុស្សកើតមកតែងតែស្លាប់ទៅវិញ ជាធម្មតាដែលអាចជំរុញទឹកចិត្តអោយលះបង់អំពើបាបហើយខិតខំធ្វើតែអំពើល្អដើម្បីវៀរចាកពីអបាយភូមិទាំង៤ មាន នរក ប្រេតជា តិរិច្ឆាន និង អសុរកាយដើម។ ហើយបុណ្យកាន់បិណ្ឌនេះក៏ទុកថា ជាឱកាសសម្រាប់មនុស្សធ្វើសេចក្តីល្អ គឺល្អទាំងកាយ ទាំងវាចា ទាំងចិត្ត បើទោះជាធ្វើល្អបានតែក្នុងរយៈពេលដ៏ខ្លីនេះក៏ដោយ ក៏ជាឧបនិស្ស័យមួយដែលប្រសើរជាងអត់សោះ ហើយក៏ជាការក្រើនរំលឹកដល់ចិត្តមនុស្សឱ្យគិតដល់សេចក្តីល្អ និង ស្គាល់រសជាតិនៃសេចក្តីល្អផងដែរ។
បន្ទាប់ពីកម្មវិធី បង្សុកូល វេរចង្ហាន់និងគ្រឿងបរិក្ខាប្រគេនព្រះសង្ឃ ក្នុងវត្តមុនីប្រសិទ្ធីវង្ស រួចមក លោកជំទាវកិត្តិបណ្ឌិត ម៉ែន សំអន និងសាច់ញាតិបងប្អូន ព្រមទាំងមន្ត្រីសាលាខណ្ឌព្រែកព្នៅ បាននាំយកចង្ហាន់ មានបាយ សម្ល នំចំណី ផ្លែឈើ ទៀនធូប ផ្កាភ្ញី ថវិកា និងទេយ្យទានមួយចំនួនទៀតទៅប្រគានវត្ត២ទៀតក្នុងខណ្ឌព្រែកព្នៅគឺវត្តអង្គសេរីសួរស្តី និងវត្តច័ន្ទបុរីវង្ស បន្ទាប់មកទៅវត្តពីរទៀតក្នុងស្រុកពញ្ញាឮ ក្នុងនោះសាលាខណ្ឌព្រែកព្នៅ បានចូលរួមជាបញ្ច័យក្នុងមួយវត្តចំនួន៥០ម៉ឺនរៀលផងដែរ សរុប២លាន៥សែនរៀល។ ដែលជាបច្ចយ័តំកល់ជើងបិណ្ឌ សំរាប់ប្រើប្រាស់ក្នងការកសាងសមិទ្ធិផលនានា ក្នុងទីអារាមនេះអោយកាន់តែល្អប្រសើរសក្ដិសម ជាកន្លែងសក្ការៈ បូជាសំរាប់ជាប្រយោជន៍ដល់ពុទ្ធសាសនិកជនទូទៅ ឲ្យកាន់តែប្រសើរថែមទៀត៕
