រដ្ឋមន្ត្រីការបរទេសស្តីទីអាហ្វហ្គានីស្ថានថា ក្រុមចលនាតាលីបង់ នៅតែប្តេជ្ញាចិត្តមិនឈ្លានពានប្រឆាំងនឹងប្រទេសដទៃទៀតឡើយ

0
157

បរទេស ៖ រដ្ឋមន្ត្រីការបរទេសស្តីទីនៅក្នុងរដ្ឋាភិបាលអាហ្វហ្គានីស្ថានបណ្តោះអាសន្ន លោក Amir Khan Muttaqi បានប្រាប់ប្រព័ន្ធផ្សព្វផ្សាយកាលពីថ្ងៃពុធថា ក្រុមចលនាតាលីបង់ (ក្រុមខុសច្បាប់នៅក្នុងប្រទេសរុស្ស៊ី) នៅតែប្តេជ្ញាចិត្តថានឹងមិនចាត់វិធានការឈ្លានពានប្រឆាំងនឹងប្រទេសដទៃទៀតឡើយ។

លោកបាននិយាយតាមរយៈអ្នកបកប្រែថា «យើងបានបង្ហាញភស្តុតាងជាក់ស្តែងជាមួយនឹងសកម្មភាពរបស់យើងថា ដែនដីអាហ្វហ្គានីស្ថាននឹងមិនត្រូវបានប្រើប្រាស់ដើម្បីប្រឆាំងនឹងនរណាម្នាក់ឡើយ ហើយចាប់តាំងពីថ្ងៃដែលយើងបានប្តេជ្ញាចិត្តនៅក្នុងកិច្ចព្រមព្រៀងទីក្រុងដូហាមក យើងនៅតែប្តេជ្ញាចំពោះឃ្លាមួយនេះ»។

ក្រុមចលនាតាលីបង់បានបើកប្រតិបត្តិការដ៏ធំមួយសម្រាប់បង្កើតការគ្រប់គ្រងអាហ្វហ្គានីស្ថានបន្ទាប់ពីសហរដ្ឋអាមេរិកបានប្រកាសដកកងទ័ពចេញកាលពីនិទាឃរដូវឆ្នាំមុន។ កាលពីថ្ងៃទី១៥ ខែសីហា ប្រធានាធិបតីអាហ្វហ្កានីស្ថាន លោក Ashraf Ghani បានចាកចេញពីប្រទេស។ ក្រុមរ៉ាឌីកាល់នេះបានចូលទីក្រុងកាប៊ុលដោយមិនជួបប្រទះនូវការតស៊ូណាមួយឡើយ។ កាលពីថ្ងៃទី៦ ខែកញ្ញា ក្រុមចលនានេះបានប្រកាសថា ខ្លួនបានគ្រប់គ្រងទៅលើទឹកដីទាំងមូលរបស់ប្រទេសអាហ្វហ្គានីស្ថាន ហើយនៅថ្ងៃបន្ទាប់ គឺថ្ងៃទី៧ ខែកញ្ញា ក្រុមចលនានេះបានប្រកាសអំពីសមាសភាពរដ្ឋាភិបាលបណ្តោះអាសន្ន ដែលភាពស្របច្បាប់របស់ខ្លួនមិនទាន់ត្រូវបានទទួលស្គាល់ដោយប្រទេសណាមួយនៅឡើយទេ។

កាលពីថ្ងៃទី៩ ខែកុម្ភៈ ឆ្នាំ២០២០ មន្រ្តីសហរដ្ឋអាមេរិក និងក្រុមតាលីបង់បានចុះហត្ថលេខាលើកិច្ចព្រមព្រៀងសន្តិភាពមួយនៅទីក្រុងដូហា។ ក្រុមតាលីបង់បានសន្យាថា ពួកគេនឹងមិនប្រើប្រាស់ទឹកដីអាហ្វហ្គានីស្ថានសម្រាប់សកម្មភាពបង្កការគំរាមកំហែងដល់សន្តិសុខរបស់សហរដ្ឋអាមេរិក ឬសម្ព័ន្ធមិត្តរបស់ខ្លួនឡើយ៕

ប្រភព TASS

Facebook Comments
Loading...