កីឡាបរទេស ៖ ខ្សែប្រយុទ្ធរបស់ក្លឹប Paris Saint-Germain គឺកីឡាករ Neymar Jr បាននិយាយនូវពាក្យប៉ុន្មានម៉ាត់ ដែលធ្វើឲ្យអ្នកគាំទ្រមានការភ្ញាក់ផ្អើលជាខ្លាំង ដែលគេថាអាចនិងរួមអាជីពជាមួយមិត្តចាស់ Lionel Messi វិញនៅរដូវកាលក្រោយ តែពុំបានបញ្ជាក់ច្បាស់ថា នៅ PSG ឬវិលត្រលប់ទៅ Barcelona សារជាថ្មីនោះឡើយ។
កីឡាករNeymar បានអះអាងថានៅរដូវកាលក្រោយនេះ រូបគេនឹងទទួលបានឱកាសលេងជាមួយកីឡាករ Lionel Messi វិញហើយ។ខ្សែប្រយុទ្ធវ័យ២៨ ឆ្នាំនិយាយថា៖ “អ្វីដែលខ្ញុំចង់បានខ្លាំងបំផុតនោះ គឺការរួមក្រុមជាមួយ Messi និងរីករាយការលេងជាមួយគាត់ម្តងទៀត”។ ប៉ុន្តែមិនទាន់បញ្ជាក់ថាលេងនៅទីណាឡើយ។
ក្រុម PSG យកឈ្នះលើក្រុម Manchester United ក្នុងលទ្ធផល ៣-១ កាលពីពាក់កណ្តាលសប្តាហ៍កន្លងមកនេះ។ ដោយក្នុងចំណោម៣គ្រាប់នោះ មានខ្សែប្រយុទ្ធ Neymar រកបានដល់ទៅ២គ្រាប់ម្នាក់ឯងទៀតផង។ ទទួលបាន៣ពិន្ទុនេះ បានធ្វើឱ្យក្រុម PSG មានសង្ឃឹមក្នុងការឡើងទៅវគ្គ១៦ក្រុមចុងក្រោយវិញហើយ។ ក្រោយពីចប់ការប្រកួតទៅ កីឡាករប្រេស៊ីលរូបនេះ បាននិយាយថារូបគេនៅរដូវកាលក្រោយនេះចង់លេងជាមួយកីឡាករ Lionel Messi វិញ។ ការអះអាងបែបនេះ ដោយសារតែរូបគេរូបគេចង់លេងជាមួយកីឡាករល្អបំផុតលើលោកនេះម្ដងទៀតនៅលើទីលាន។ Neymar បន្ថែមទៀតថា៖ “គាត់អាចលេងជាមួយខ្ញុំបាន ហើយគាត់ក៏គ្មានបញ្ហាអ្វីនោះដែរ ដោយខ្ញុំច្បាស់ត្រង់ចំណុចហ្នឹង ហើយការពិតទៅខ្ញុំចង់ចាប់ដៃជាមួយគាត់នៅរដូវកាលក្រោយនេះហើយ ដែលយើងនឹងត្រូវធ្វើរឿងហ្នឹងឲ្យបាន”។ តែសាមីខ្លួនមិនបានបញ្ជាក់ច្បាស់ថាការចង់លេងជាលើកទី២នេះ នៅក្រុម Barcelona ឬនៅ PSG នោះទេ។
គួរបញ្ជាក់ថា Neymar បានចាយជាង៤ឆ្នាំនៅ Barcelona ហើយកំឡុងពេលនោះគេរកបាន១០៥គ្រាប់ និង Assist៧៦លើក នៅ១៨៦ប្រកួត។ មុនសម្រេចចិត្តចាកចេញទៅចូលរួមនៅ PSG នាមជាកីឡាករមានតម្លៃផ្ទេរខ្ពស់បំផុតដល់ទៅ២២២លានអឺរ៉ូ៕
