កីឡាបរទេស ៖ ក្រុមហង្សក្រហម Liverpool បានបរាជ័យក្រោមថ្វីជើងក្រុម Aston Villa ក្នុងលទ្ធផល៧-២ ឯណោះ រីឯក្លឹបបិសាចក្រហម Manchester United ក៍បានរងបរាជ័យក្រោមថ្វីជើងរបស់ក្លឹមមាន់ខ្នាយមាស Spurs ក្នុងលទ្ធផល ១-៦ យ៉ាងចាស់ដៃផងដែរ ក្នុងការប្រកួតពានរង្វាន់ English Premier Leaegue នៅយប់ថ្ងៃទី៤ ខែតុលា ឆ្នាំ២០២០នេះ។
ក្រុមការពារតំណែងជើងឯក Liverpool បានបរាជ័យក្រោមថ្វីជើងក្រុម Aston Villa ក្នុងលទ្ធផល ៧-២ ឯណោះព្រោះក្រុមហង្សក្រហម អវត្តមានកីឡាករសំខាន់២នាក់គឺអ្នកចាំទី Alisson និងខ្សែប្រយុទ្ធ Mane។ អត់មានកីឡាករ២នាក់នេះហើយ ធ្វើឱ្យក្រុម Liverpool ហាក់ដូចជាបាត់បង់អ្វីម្យ៉ាងដែលធ្វើឱ្យពួកគេលេងដូចមិនមានអារម្មណ៍ទាល់តែសោះ។
ក្នុងការប្រកួតទល់ Aston Villa នេះ គឺជាប្រកួតមួយដែលក្រុម Liverpool អន់បំផុត ពោលគឺបង្កើតកំហុសច្រើនមែនទែន រហូតធ្លាយគ្រាប់ដល់ទៅ៧គ្រាប់។ លោក Klopp បាននិយាយក្រោយចប់ការប្រកួតថាសមាជិកក្រុមបានបាត់បង់ការប្រមូលអារម្មណ៍លេងទៅហើយ។ ពួកគេមិនបានអានការប្រកួតយល់ឡើយ ទើបធ្វើឱ្យការសហការគ្នាមិនបានល្អ និងមានប្រហោងច្រើនមែនទែន។ នេះជាការប្រកួតដែលអន់បំផុតរបស់ក្រុម Liverpool តាំងពីលោកមកចូលដឹកនាំ។
ដោយឡែកក្លឹបបិសាចក្រហម Manchester United បានរងបរាជ័យក្រោមថ្វីជើងរបស់មាន់ខ្នាយមាស Spurs ក្នុងលទ្ធផល ១-៦ ហើយជួនថ្ងៃតែមួយនោះក្រុមហង្សក្រហម Liverpool ក៏ទទួលមេរៀនធ្ងន់ពីក្រុម Aston Villa ដល់ទៅ ៧ គ្រាប់ផងដែរ។
មានកំណត់ត្រាអាក្រក់ជាច្រើនបានកើតឡើងសម្រាប់ក្រុមទាំងពីរ ដោយក្នុងនោះ CTS Sports ធ្វើការបង្ហាញដូចតទៅ៖ក្លឹប Man Utd បានរបូតគ្រាប់បាល់ ៤ គ្រាប់គិតត្រឹមតង់ទី ១ ក្នុងក្របខ័ណ្ឌ Premier League ជាលើកដំបូង ក្នុងចំណោមការប្រកួតផ្លូវការ ១ ០៧៩ លើកចុងក្រោយបង្អស់។
ការរបូត ៦ គ្រាប់ក្នុងប្រកួតនៅ Premier Leagueសម្រាប់ Man Utd កាលពីយប់មិញគឺជាលើកទី ៣ នៃប្រវត្តិសាស្រ្តក្លឹប ដោយពីរលើកកន្លងមកមានកាលប៉ះ Southampton ឆ្នាំ ១៩៩៦ និងកាលប៉ះ Man City ឆ្នាំ ២០១១។Liverpool របូត៧គ្រាប់ក្នុងមួយប្រកួត ជាលើកដំបូងរាប់ចាប់តាំងពីខែមេសា ឆ្នាំ ១៩៦៣ កាលនោះធ្លាប់ចាញ់ Spurs ៧-២។វាជាភាពអាម៉ាស់បំផុតមួយដែលក្រុមការពារជើងឯកត្រូវរបូតគ្រាប់បាល់ចំនួន៧គ្រាប់ ដែលខកខានកើតមានតាំងពីសម័យកាលឆ្នាំ១៩៥៣ ពេល Arsenal ចាញ់ស្ពឹកមុខក្រោមថ្វីជើងរបស់ Sunderland។ នេះជាលើកទី១ក្នុងប្រវត្តិសាស្រ្ត ការដែលLiverpool និងMan Utd ត្រូវរបូតដល់ទៅ ៦គ្រាប់នៅការប្រកួតជុំតែមួយ។ គួរបញ្ជាក់ថា គិតត្រឹមថ្ងៃចន្ទនេះ Liverpool ឈរចំណាត់ថ្នាក់ទី៤ ស្របពេលដែលMan Utd នៅក្រោយមួយប្រកួតឈរចំណាត់ថ្នាក់ទី ១៦ ក្បែរបាតតារាងក្របខ័ណ្ឌកំពូលអង់គ្លេស៕
