២សប្តាហ៍ដើមខែកក្កដាក្នុង​វិបត្តិកូវីដ១៩នេះមានភ្ញៀវទេសចរដើរទស្សនាជាង៣១ម៉ឺននាក់

0
3428

ភ្នំពេញ ៖ រដ្ឋមន្ត្រីក្រសួងទេសចរណ៍ បានលើកឡើងថា ក្នុងដំណើរកម្សាន្តទេស​ចរក្នុង​វិបត្តិកូវីដ១៩ បុគ្គលិកបម្រើការ និងអ្នកគ្រប់​គ្រងមានការយកចិត្តទុកដាក់អនុវត្តិវិធា​នសុខាភិបាល និងវិធានសុវត្ថិភាពទេសចរណ៍បានល្អប្រសើរ ហើយសម្រាប់រយៈពេល២សប្ដាហ៍ ខែកក្កដា ឆ្នាំ២០២០ ភ្ញៀវទេសចរផ្ទៃក្នុងដែលបានធ្វើដំណើរកម្សាន្តនៅទូទាំងប្រទេសមានចំនួនសរុប ៣១៣,៣០០នាក់ កើនឡើង១.៦៧% បើធៀបនឹងរយៈពេល២សប្តាហ៍ចុងខែមិថុនា ក្នុងនោះភ្ញៀវជាតិមានចំនួន ៣០៧,៨០៩នាក់ កើនឡើង ២.៥៤% និងភ្ញៀវបរទេសមានចំនួន ៥,៤៩១នាក់ ថយចុះ ៣០.៨៩%។

តាមរយៈបម្រែបម្រួលភ្ញៀវទេសចរតាមសប្តាហ៍ ក្រសួងទេសចរណ៍សង្កេតឃើញថាចំនួនភ្ញៀវទេសចរផ្ទៃក្នុងហាក់ស្ថិតក្នុងចំណុចថេរមួយ ហើយចំនួនភ្ញៀវទេសចរសរុបក៏ស្ថិតក្នុងរង្វង់ ៦០-៦៥ម៉ឺននាក់ ក្នុងមួយខែ ថយចុះ៣៥-៤០% បើប្រៀបធៀបនឹងមុនវិបត្តិកូវីដ១៩។ ស្ថិរភាពនៃចំនួនខាងលើ អាចបណ្តាលមកពីរដូវនេះជារដូវវស្សា។

លោករដ្ឋមន្ត្រី ថោង ខុន បានបន្តថា ទេសចរជាយុវជនចូលចិត្តធ្វើដំណើរកម្សាន្តបែបផ្សងព្រេង ទៅកាន់តំបន់អេកូទេសចរណ៍។ចំណែកនៅខេត្តសៀមរាប ដែលធ្លាប់តែជាគោលដៅទេសចរណ៍សំខាន់ នៅមិនទាន់អាចទាក់ទាញភ្ញៀវទេសចរដូចមុនកូវីដបាននៅឡើយដែរ ដោយកម្ពុជានៅមិនទាន់អនុញ្ញាតឱ្យមានការៀបចំព្រឹត្តិការណ៍ទេសចរណ៍នានា ដើម្បីជួយទាក់ទាញភ្ញៀវ ក្រៅពីទស្សនាប្រាសាទ ហើយសេវាកម្សាន្តមួយចំនួន ពិសេសនៅ Pub Street មិនទាន់មានការអនុញ្ញាតឲ្យមានដំណើរការឡើងវិញ ខណៈគោលដៅខេត្តសៀមរាបជាគោលដៅដែលភ្ញៀវត្រូវតែសម្រាកមួយយប់យ៉ាងតិច ខុសពីខេត្តគោលដៅមួយចំនួនទៀត ដែលភ្ញៀវអាចទៅមកវិលល្ងាចបាន។

ក្នុងករណីខេត្តសៀមរាបងើបឡើងប្រហាក់ប្រហែលនឹងខេត្តផ្សេងនោះ ចំនួនភ្ញៀវទេសចរផ្ទៃក្នុងអាចនឹងហក់ឡើងដល់ចំណុច ៨០-៨៥% ថយចុះ ២០-២៥% ប៉ុណ្ណោះ បើប្រៀបធៀបនៅមុនពេលមាន Covid-19។កម្ពុជាសង្ឃឹមថា ចំនួនភ្ញៀវទេសចរផ្ទៃក្នុងនេះនឹងហក់ឡើងខ្ពស់មកវិញនៅខែសីហាដោយ​សាររាជរដ្ឋាភិបាលសម្រេចឲ្យមានថ្ងៃឈប់សម្រាករយៈពេលយូរ និងនៅខែកញ្ញាក៏ដល់រដូវបុណ្យភ្ជុំបិណ្ឌ ចំណែកឯខែបន្តបន្ទាប់ទៀតក៏សម្បូរថ្ងៃឈប់សម្រាក ហើយស្ថានភាពកូវីដ១៩ ក៏អាចនឹងកាន់តែធូរស្រាលជាងនេះ។

លោករដ្ឋមន្ត្រីបានបញ្ជាក់ថា ក្នុងដំណើរកម្សាន្តទេសចរ បុគ្គលិកបម្រើការ និងអ្នកគ្រប់​គ្រងមានការយកចិត្តទុកដាក់អនុវត្តិវិធានសុខាភិបាល និងវិធានសុវត្ថិភាពទេសចរណ៍បានល្អប្រសើរ៕

Facebook Comments
Loading...