ភ្នំពេញ ៖ នៅលើសង្វៀនស៊ីអិនស៊ី នាថ្ងៃសៅរ៍ទី២៧ ខែមិថុនា ឆ្នាំ២០២០ កីឡាករដែលកំពុងមានប្រជាប្រិយ វង្ស វិឆ័យ អ្នកប្រដាល់របស់ក្លិបកងពលតូចទ័ពពិសេសឆត្រយោង៩១១ ស្វាគមន៍កីឡាករនី សុភី អ្នកប្រដាល់នៃក្លិបកុលបុត្រគុនខ្មែរខណ្ឌទួលគោក មកសងសឹក ខណៈកីឡាករតាញ់ មករា អ្នកប្រដាល់នៃសមាគមន៍កីឡាប្រដាល់ក្រសួងការពារជាតិ ជួបអេលីត សាន់ អ្នកប្រដាល់មកពីក្លិបប៉ែនកាក់គុនខ្មែរ។
កីឡាករវង្ស វិឆ័យ ត្រូវជួបកីឡាករនី សុភី ក្នុងប្រភេទម្ងន់៦៩គីឡូក្រាម អ្នកទាំងពីរធ្លាប់ជួបគ្នាជាច្រើនលើកមកហើយ មានឈ្នះមានចាញ់ទៅវិញទៅមកម្តងមក។ ស្នៀតខ្លាំងរបស់វង្ស វិឆ័យ គឺជង្គង់ និងកណ្តាប់ដៃ ប៉ុន្តែការប្រកួតលើកនេះត្រូវបានអ្នកតាមដានកីឡាលើកឡើងថា វង្ស វិឆ័យ មានភាគរយឈ្នះហាសិបភាគរយប៉ុណ្ណោះលើកីឡាករនី សុភី បើទោះជាគេកំពុងឡើងកូដ វាយកម្រចាញ់គូប្រកួតទាំងកីឡាករក្នុងស្រុក និងកីឡាករបរទេស ហើយធ្លាប់ឈ្នះនី សុភី ម្តងក៍ដោយ។
អ្នកប្រដាល់នី សុភី នរណាក៏ទទួលស្គាល់ថា គេមានស្នៀតជង្គង់ល្អដែរ ពេលប្រកួតរាល់លើក សុទ្ធតែផ្តួលដៃគូតស៊ូពីក្បាច់ជង្គង់ពិឃាតរបស់គេនេះតែម្តង។ ការប្រកួតទាំងថ្នាក់ជាតិនិងអន្តរៈជាតិ សុភីគេចូលចិត្តប្រើស្នៀតកែងនិងជង្គង់នេះណាស់ ដែលអាចវាយចេញជាប្រយោលក៏បាន ចូលកៀកក៏បានហើយមានប្រសិទ្ធិភាពទៀត។ តែយ៉ាងណាកាលជួបជាមួយវង្ស វិឆ័យ នីសុភី ហាក់ចាញ់ស្នៀតជង្គង់ទៅវិញ ទើបធ្វើឲ្យគេចាញ់ទាំងមិនអស់ចិត្ត។ ចាំមើលការប្រកួតនេះនី សុភី អាចសងសឹកទៅលើវង្ស វិឆ័យ បានដែរឬយ៉ាងណា?។
ដោយឡែកកីឡាករអេលិត សាន់ ឡើងសាកស្នៀតគុននិងកីឡាករតាញ់ ក្នុងប្រភេទទម្ងន់៦០គីឡូក្រាម អ្នកទាំង២មិនធ្លាប់ជួមគ្នាទេកន្លងមក។ កីឡាករអេលិត សាន់ គេជាកីឡាករវ័យក្មេងស្រករក្រោយមែនតែការប្រកួតរបស់គេពិតជាធ្វើបានល្អ ហើយស្នៀតខ្លាំងរបស់គេគឺល្អទាំងព្រមតែម្តង ការប្រកួតកន្លងមកគេចូលចិត្តវាយដកថយដើម្បីមើលចំណុចខ្សោយរបស់គូប្រកួត បើគេដឹងពីចំណុយខ្សោយហើយ គឺវាយសម្រុកយកឈ្នះតែម្តង។
ចំណែកកីឡាករតាញ់ មករា បច្ចប្បន្ននេះគេក៏ជាអ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា ដែលអ្នកតាមដានកីឡាប្រដាល់កម្ពុជាកំពុងតែចាប់អារម្មណ៍ចំពោះស្នៀតគុនរបស់កីឡាកររូបនេះ ដែលឡើងប្រកួតម្តងៗធ្វើឲ្យអ្នកទស្សនាជក់ចិត្តជាខ្លាំងនោះ។ តាញ់ មករា ជាអ្នកប្រដាល់ដែលមានកណ្ដាប់ដៃ និងកម្លាំងជើងទាត់ខ្លាំង តែមិនសូវសំបូរច្ចេកទេសនិងល្បិចកលប្រកួតប៉ុន្មានឡើយ ក៍ប៉ុន្តែគេមានកម្លាំងស៊ុហ្វខ្លាំង។ ពីមុនមករាគេវ៉ៃអាងតែលើកម្លាំងបាយតែប៉ុណ្ណោះ តែមួយរយះមកគេវាយចេញដោយកណ្តាប់ដៃដាល់ត្រូវចំគោលដៅបានច្រើន មួយៗតែធ្ងន់ចំណែក ឯការពាររបស់គេ ក៏បានល្អនិងរឹងមាំផងដែរ។ ចាំមើលតាញ់ មករា និងអេលិត សាន់ នរណាជាអ្នកឈ្នះ?៕
