ភ្នំពេញ ៖ កីឡាករព្រំ សំណាង អ្នកប្រដាល់នៃក្លិបកងពលតូចទ័ពពិសេសឆ័ត្រយោង៩១១ ដឹកដៃកីឡាករប៉ឺត សង្ឃឹម អ្នកប្រដាល់របស់ក្លិបរហាប់ស្វាយប៉ាក និងកីឡាកេផាន រះ អ្នកប្រដាល់មកពីក្លិបតាព្រហ្មមានជ័យ ឡើងជួបកីឡាករថៃកង ក.គេមថាក្រៃ និងកីឡាករឈោគភិឈិត ស.ធានឆ័យ ព្រមទាំងកីឡាករអ៊ីរ៉ង់V.Khajoueinejad Mahdi នៅលើសង្វៀនCNC នាថ្ងៃសៅរ៍ទី០៧ ខែធ្នូ ឆ្នាំ២០១៩នេះ។
កីឡាករព្រំ សំណាង ដែលមិនសូវមានដៃគូប្រកួតជាមួយនោះ ត្រូវគេផ្គូផ្គងឲ្យជួបជាមួយកីឡាករថៃកង ក.គេមថាក្រៃ ក្នុងប្រភេទទម្ងន់ធ្ងន់គឺ៧៥គីឡូក្រាម រវាងអ្នកទាំងពីរមិនទាន់មានប្រភពណាបញ្ជាក់ថាពួកគេធ្លាប់ជួបគ្នាទេកន្លងមកនៅសង្វៀននេះ កីឡាករថៃភាគច្រើនពួកគេខ្លាំងខាងស្នៀតជើងទាត់ ជង្គង់ និងស្នៀតកាច់ផ្តួល។
ចំណែកព្រំ សំណាង គេជាកីឡាករដែលមានស្នៀតប្រយុត្តិល្អ គឺពេលវាយសំណាងគ្រាន់តែលើកជើងធាក់ ក៏គូប្រកួតពិបាកទប់ដែរពិសេសស្នៀតដាល់ត្រង់ៗ និងស្នៀតកែងវាយទៅលើ គូប្រកួតដែលប្រកបដោយគ្រោះថ្នាក់បំផុត។ ការប្រកួតកន្លងមកបើទោះបីព្រំ សំណាង ការដាល់របស់គេមិនអស្ចារ្យក៏ពិតមែន ប៉ុន្តែ សំណាងមានកាយសម្បទាល្អ ខ្ពស់ ដៃជើងវែង ដែលជាការអំណោយផលដល់ការប្រកួតណាស់។ ចាំមើលកីឡាករព្រំ សំណាង ជាអ្នកឈ្នះឬកីឡាករថៃកង ក.គេមថាក្រៃ?។
រីឯកីឡាករប៊ឺត សង្ឃឹម ជួបជាមួយកីឡាករថៃឈោគភិឈិត ស.ធានឆ័យ ក្នុងប្រភេទទម្ងន់៦០គីឡូក្រាម អ្នកទាំងពីរមិនដែលជួបគ្នាទេកន្លងមក តែកីឡាករថៃម្នាក់នេះធ្លាប់មកប្រកួតជាមួយកីឡាករកម្ពុជា ជាច្រើនអ្នកមកហើយស្នៀតខ្លាំងរបស់គេគឺជើងទាត់ ជង្គង់ និងស្នៀតកាច់ផ្តួល។ ចំណែកប៊ឺត សង្ឃឹម ជាកីឡាករវ័យក្មេងកំពុងតែឡើងកូដ ដែលចេះប្រើក្បាចខ្មែរបុរាណគ្រប់ស្នៀត ចិត្តប្រដាល់ធំ ហើយព្រមទាំងមានកម្លាំងស៊ុហ្វខ្លាំងថែមទៀតផង។
អ្វីដែលធ្វើឲ្យគេស្ងើចសរសើរចំពោះប៊ឺត សង្ឃឹម នាបច្ចុប្បន្ននេះ គឺរបៀបវាយរបស់គេល្អ ប្រកបដោយប្រសិទ្ធភាព ដូចកីឡាកររៀមច្បងរបស់គេប៊ឺត ខាំ អញ្ចឹងដែរ។ រីឯស្នៀតជង្គង់របស់គេមុតស្រួច គូប្រកួតល្មមៗពិបាកនឹងតតាំងជាមួយគេបានណាស់ ដៃគូប្រកួតជាច្រើននាក់ហើយទាំងស្រករមុនទាំងស្រករក្រោយជាច្រើននាក់បានសុំចុះចាញ់និងសន្លប់ ក្រោមស្នៀតជង្គងរបស់គេនោះ។ ចាំមើលកីឡាករប៊ឺត សង្ឃឹម ជួបជាមួយកីឡាករថៃឈោគភិឈិត ស.ធានឆ័យ នេះនណាទទួបានជ័យជំនះ?។
ដោយឡែក កីឡាករផាន រះ ត្រូវជួបជាមួយកីឡាករអ៊ីរ៉ង់V.Khajoueinejad Mahdi ក្នុងប្រភេទទម្ងន់៦០គីឡូក្រាម ការជួបគ្នារវាងអ្នកទាំងពីរក៍ត្រូវបានអ្នកតាមដានកីឡាប្រដាល់ក្នុងស្រុកលើកឡើងថា ភាគរយនៃការឈ្នះគឺហាសិបភាគរយម្នាក់ប៉ុណ្ណោះ ពញរោះកីឡាករកម្ពុជាផាន រះ វាយពេលខ្លះឃើញល្អតែពេលខ្លះវាយអន់ ព្រោះចិត្តប្រដាល់របស់គេតូច ហើយអន់ខាងកម្លាំងសុហ្វទៀតផង។ ចាំមើលផាន រះ ជាអ្នកឈ្នះឬកីឡាករអ៊ីរ៉ង់V.Khajoueinejad Mahdi?៕
