ភ្នំពេញ ៖ កីឡាករម៉ឺន មេឃា អ្នកប្រដាល់នៃសមាគមកីឡាប្រដាល់ក្រសួងការពារជាតិ ឡើងសាកស្នៀតគុនជាមួយកីឡាករថៃយ៉តស៊ិវិត វ៉.ស៊ុងនឺន ខណៈកីឡាករទេស សំខាន់ អ្នកប្រដាល់របស់ក្លិបកងពលតូចលេខ៧០ ជួបប្រកួតជាមួយកីឡាករអង់គ្លេស Peter Trueman នាថ្ងៃសុក្រទី១៥ ខែកុម្ភៈ ឆ្នាំ២០១៩ នៅលើសង្វៀនស៊ីអិនស៊ី។
កីឡាករម៉ឺន មេឃា ត្រូវជួបជាមួយកីឡាករថៃយ៉តស៊ិវិត វ៉.ស៊ុងនឺន ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក តែកីឡាករថៃភាគច្រើនពួកគេពូកែស្នៀតទាត់កាត់ ជង្គង់ និងស្នៀតកាច់ផ្តួលគូប្រកួតឲ្យដួលទាំងជំហ៊។
ចំណែកកីឡាករម៉ឺន មេឃា មួយរយៈពេលចុងក្រោយនេះ គេមើលឃើញថា អ្នកប្រដាល់វ័យក្មេងរូបនេះប្រកួតស្ទើរគ្រប់សង្វៀន និងទទួលបានជ័យជម្នះរហូតផងដែរ។ កីឡាករវ័យក្មេងរូបនេះមិនទាន់ដឹងថាខ្លួនឯងមានស្នៀតខ្លាំងណាមួយ ឬឲ្យច្បាស់ដូចឪពុកនៅឡើយទេ ប៉ុន្តែធ្លាប់ឮម្ដាយសរសើរថាស្នៀតទាត់គឺដូចគ្នា តែនៅស្រាលជាងលោកអេ ភូថង។ អ្នកលេងគុនខ្មែរវ័យក្មេងខាងលើ ប្រាប់ពីចំណុចខ្វះខាតរបស់ខ្លួនដែរថា គួរត្រូវពង្រឹងស្នៀតចាប់ឡាំជង្គង់ឲ្យបានច្រើនជាងនេះ ព្រោះនៅខ្សោយ។ ចាំមើលរវាងម៉ឺន មេឃា និងកីឡាករថៃយ៉តស៊ិវិត វ៉.ស៊ុងនឺន នរណាជាអ្នកឈ្នះ?។
ដោយឡែកកីឡាករទេស សំខាន់ ត្រូវជួបជាមួយកីឡាករអង់គ្លេស Peter Trueman ក្នុងប្រភេទទម្ងន់៧១គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករ Peter Trueman មានវិជ្ជាគុនខ្លាំងប៉ុណ្ណានោះដែរ តែយ៉ាងណាកីឡាករបរទេសគេពូកែកណ្តាប់ដៃ និងមានកម្លាំងស៊ុហ្វខ្លាំង។
រីឯកីឡាករទេស សំខាន់ កាលពីមុនគេជាកីឡាករមួយរូបដែលធ្វើឲ្យអ្នកទស្សនាកំពុងចាប់អារម្មណ៍លើការប្រកួតរបស់គេផងដែរ ទាំងប្រកួតដណ្តើមខ្សែក្រវាត់ លក្ខណមិត្តភាពជាតិនិងអន្តរជាតិដោយគេប្រកួតឈ្នះច្រើនជាងចាញ់។ការប្រកួតរាល់លើកទេស សំខាន់ បានបញេ្ចញស្នៀតកែង ជង្គង់និងកណ្តាប់ដៃប្រកបដោយមោទនភាព និងអំណួតបំផុត វាយសម្រុកទៅកាន់គូប្រកួត ហើយមានចិត្តប្រដាល់ធំ និងមានកម្លាំងស៊ុហ្វខ្លាំង បើគូប្រកួតវាយត្រូវគឺរិទ្ធតែដើរចូលទៅមុខមិនរាថយ និងចាញ់សំឡុតគូប្រកួតឡើយ ដូច្នេះហើយទើបការប្រកួតរបស់គេពីមួយប្រកួតទៅមួយប្រកួតកាន់តែធ្វើឲ្យអ្នកទស្សនាចាប់អារម្មនិងកំពុងគិតថាទេស សំខាន់ ជាកីឡាករដ៍ល្អម្នាក់មិនអាចមើលរំលងបាន។ តែយ៉ាងណាមួយរយៈក្រោយមកនេះទេស សំខាន់ គេឡើងគីឡូខ្លាំងមិនទាន់ដឹងថាគេអាចនូវប្រើភាពរហ័សរហួនរបស់គេបានដូចមុនឬយ៉ាងណានោះទេ។ ចាំមើលកីឡាករឃុន សុខាន ដែលត្រូវជួបប្រកួតជាមួយកីឡាករអង់គ្លេស Peter Trueman នណាជាអ្នកឈ្នះ?៕
