នៅរសៀលថ្ងៃទី ១៥ ខែ មិថុនា ឯកឧត្ដមឧត្តមសេនីយ៍ឯក ប៉ុល ពិធេយ្យ ប្រធាននាយកដ្ឋាននគរបាលប្រឆាំងការជួញដូរមនុស្ស និងការពារអនីតិជន អគ្គស្នងការដ្ឋាននគរបាលជាតិ បានប្រាប់ថា បុរសម្នាក់ដែលវាយធ្វើបាបក្មេង ហើយត្រូវបានគេថតវីដេអូបង្ហោះចែកចាយតាមបណ្តាញទំនាក់ទំនងសង្គម Facebook នោះ ត្រូវបានកម្លាំងនគរបាលប្រឆាំងការជួញដូរមនុស្ស និងការពារអនីតិជនឃាត់ខ្លួនបានហើយ។
បុរសជាជនសង្ស័យមានឈ្មោះ ហិន សុផាន់ណា អាយុ៣៩ឆ្នាំ ត្រូវបានឃាត់ខ្លួន នៅថ្ងៃទី ១៥ ខែមិថុនា ឆ្នាំ២០១៨ នៅចំណុចផ្ទះលេខ៧៣ ផ្លូវមុន្នីរ៉េត សង្កាត់ស្ទឹងមានជ័យ ខណ្ឌមានជ័យ។ ចំណែកជនរងគ្រោះឈ្មោះ ហេង ឡិថុន ភេទ ប្រុស អាយុ៥ឆ្នាំ។
ឯកឧត្ដមឧត្ដមសេនីយ៍ឯក ប៉ុល ភិធេយ្យ បានបញ្ជាក់ប្រាប់អោយដឹងទៀតថា ពេលនេះជនសង្ស័យកំពុងត្រូវបានសាកសួរចម្លើយនៅនាយកដ្ឋានប្រឆាំងការជួញដូរមនុស្ស និង ការពារអនិតិជន ដើម្បីកសាងសំណុំរឿងបញ្ជូនទៅសាលាដំបូងចាត់ការតាមនិតិវិធីច្បាប់ ។
គួរបញ្ជាក់ថា វីដេអូដែលបានបង្ហោះលើបណ្ដាញទំនាក់ទំនងសង្គម បង្ហាញអំពីបុរសម្នាក់ពាក់អាវពណ៌លឿងបានវាយទាត់ធាក់លើកុមារយ៉ាងព្រៃផ្សៃបំផុតបង្ករអោយមានការរឹះគន់កក្រើក Facebook ។
