ព័ត៌មានក្នុងប្រទេស

សម្តេច ហ៊ុន សែន បញ្ជាក់ជាមួយរដ្ឋមន្រ្តីក្រសួងជំនាញ៣ ដែលបានតាមដានស្រាវជ្រាវពីសារធាតុពុល ដែលបង្កគ្រោះថ្នាក់ដល់ពលរដ្ឋ

May 25, 2018

17008

នៅក្នុងកិច្ចប្រជុំពេញអង្គគណៈរដ្ឋមន្ត្រីនាព្រឹកថ្ងៃទី ២៥ ឧសភា ២០១៨ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ជាមួយរដ្ឋមន្រ្តីក្រសួងជំនាញ៣ ដែលបានតាមដានស្រាវជ្រាវពីសារធាតុពុល ដែលបង្កគ្រោះថ្នាក់ដល់ពលរដ្ឋនៅឃុំកន្ទួត ស្រុកចិត្របុរី ខេត្តក្រចេះដែលបណ្តាលឲ្យពលរដ្ឋចំនួន១៣នាក់ស្លាប់បាត់បង់ជីវិត និងជាង២០០នាក់ផ្សេងទៀត ត្រូវបានក្រុមគ្រូពេទ្យជួយសង្គ្រោះ និងព្យាបាលផុតពីគ្រោះថ្នាក់ដល់អាយុជីវិត។

ខាងក្រោមនេះ គឺជាសេចក្តីប្រកាសព័ត៌មានរបស់ក្រសួងទាំង៣ដើម្បីជម្រាប ជូនសាធារណជនជាតិ និងសារព័ត៌មានអោយបានដឹងអំពីមូលហេតុពិតប្រាកដ។

– ក្រសួងឧស្សាកម្ម និងសិប្បកម្ម ក្រសួងរ៉ែ និងថាមពល និងក្រសួងសុខាភិបាលសូមជំរាបជូនដំណឹង ដល់សធារណៈជនអោយបានជ្រាបថាៈ

ការពុលនៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ បណ្តាលមកពីស្រាស ដែលមានលក់ ឬផលិតនៅក្នុងមូលដ្ឋាន ហើយដែលមានសារធាតុមេតាណុលកម្រិតខ្ពស់ និងទឹកព្រែកទេ និងអូរគគី មានសារធាតុគីមី មានកំហាប់ខ្ពស់ ដែលបណ្តាលមកពីថ្នាំសំលាប់ស្មៅ និងថ្នាំសំលាប់សត្វល្អិត។

– ក្រសួងឧស្សាហកម្ម និងសិប្បកម្ម ក្រសួងរ៉ែ និងថាមពល និងក្រសួងសុខាភិបាល បន្តសហការគ្នាដើម្បីបង្ការ ទប់ស្កាត់ និងជៀសវាងនូវបញ្ហាដែលកើតឡើងដោយយថាហេតុ៕